الاجازة خلصت فعلا
زى كل الحاجات الحلوة اللى فى حياتنا ما بتخلص بسرعة
حلو الدخول السينمائى ده ؟
وبكره ان شاءالله هنرجع المدرسة
ولازم أكون حضرت دروس يوم الاحد
ومعايا كمان لوحات وخرايط
اشتريتها على حسابى من المعرض
علشان أعلقها فى الفصل بمناسبة التيرم التانى
وخصوصا انه هيشرفنا لجنة من الاخت الوزارة
علشان احنا عقبال عندكم مرشحين ناخد السلطانية
لاااااااااا
تاج الجزيرة
لاااااااااااااااا
الجودة
ايه الخيبة دى؟
الايعنى ايه جودة؟
وايه هى رسالة ورؤية المدرسة ؟
وايه هى المعايير القومية للتعليم ؟
أول ما اخلص التدوينة
هاجرى بسرعة أطلع الورق
واذاكر الحاجات دى
أصلها أول حاجة هتسألنا عنها اللجنة
وكمان هتسأل عن نظام التقويم الفاشل
وياترى بنطبقه زى ماهو
ولا بنحاول نصلح عيوبه ونتلافى اخطائه؟
لااااااااااااااااااا
كده اللجنة ممكن تزعل مننا
ومتوديناش الجنة
يوووووووووووووووه
قصدى ماتديناش الجودة
والعيال فى الفصل بيقعدوا ازاى؟
القعده القديمه دى ماتنفعش
لازم وشهم فى وش بعض
تقولوش فى الجنة على الارائك متقابلين
ومفيش حاجة اسمها ولى امر يشتكى ان ابنه مش عارف يشوف السبورة
وان فقرات رقبته باظت
دى تعليمات الاستاذ الوزارة ولازم تتنفذ
وماينفعش نعكر مزاج الناس ونقولهم على المشكلات اللى بتقابلنا
نتصرف احنا ومنقولش ايه ادتنا مصر
ومع انى والله مقتنعة جدا بالاغنية دى
لكن يظهر هنا سؤال
مين مصر المشار اليها فى العبارة ؟
هل هى مصر ام الدنيا اللى كلنا نعرفها
ولا هى ام الاستاذ الوزارة ؟
ماعلينا
بلاش نجيب سيرة الام
وكمان أهم حاجة بتهم الاستاذ الوزارة
العنكبوت اللى فى الفصول
لكنه للاسف
لايهتم مطلقا بالعنكبوت اللى اتربى فى دماغ العيال من زمان
بسبب الاخت الوزارة ذات نفسها وسياساتها الفاشلة
كمان الاستاذ الوزارة هيحاول يختبرنا بكل الطرق
ويتأكد تماما اننا نجحنا نحفظ العيال رؤية ورسالة المدرسة
لكن مش هيحاول يعرف العيال حفظوا الفاتحة ولا لا
ولازم كل الفصول يكون موجود فيها
صورة رئيس الجمهورية القائد الاعلى للقوات المسلحة محمد حسنى مبارك
الحمد لله
والله أرحم من صورة ولى العهد
جملة اعتراضية كده على جنب
أنا خريجة بنات عين شمس
وكنت طول الاربع سنين استغرب جدا لما الاقى صورة السادات فين...؟
فى الحمام
اه والله الحمام
حتى بالامارة اللى جنب مسرح الكلية على اليمين
لان اللى الشمال رجالى
ياريت لوحد من جمهورى العريض بيروح الكلية
يتاكد الصورة لسه موجوده فى مكانها ولا ايه
خصوصا انى شفتها بعد ما اتخرجت بسنين ----عقبالك يالى فى بالى
ماعلينا
الاستاذ الوزارة هيكون حريص لما ييجى يقيم المدرسة
يلاقى الصورة والعلم والقسم وقايمة الفصل
اصحوا معايا كده
وكمان يلاقى الجدول
ولوحة باسماء أعضاء المكتب التنفيذى للفصل
ااااااااااااااااااااااااااااااااااااااااااه
لازم نظبط العيال
وندربهم على الاستجواب بتاع المجموعات المدرسية وبكام؟
ايضا الاستاذ الوزارة هيكون حريص على عدة اشياء
منها
ممنوع منعا باتا استعمال السخانات وشرب الشاى والسجائر فى المدرسة
وأول ما يتاكد اننا خبينا كل السخانات
والمدرسين ماشيين بمراوح يداروا على ريحة السجاير
يطلب هو كوباية قهوة محترمة
بس ماتكونش من الفراش
فطبعا نتبارى كلنا علشان نكسب مسابقة احسن مج واظبط قهوة
لكن
بشرى سارة لجميع الاخوة المدرسين
المتابعات كلها من هنا ورايح
محدش هيسالك أخبارك ايه فى المنهج
ولا هيقعد على قلبك فى الفصل
يسمع شرحك ويسأل العيال كل ده كلام فاضى
عصر المدرس اللى بيشرح فى الفصل خلص خلاص
المدرس دلوقت حسب توجيهات السيد الوزير
هيشرح 5دقايق بس ويتناقش مع الطلبة باقى الحصة
اللى هى طويلة جدا بالمناسبة
35دقيقة
لان الدولة دلوقت سياستها انها تعلم الطالب يعتمد على نفسه
ده مش كلامى أنا
ده كلام واحد من متابعين الوزارة اللى شرفونا أول السنة
بس اختكم قالتله
لا دى الحكومة بتعلمنا انها باعتنا زى ماباعت البلد والغاز
كمان الاستاذ الوزارة لازم يتاكد اننا أول بأول شغالين فى ملفات الانجاز
ولما اشتكيت ان وظيفتى الاصلية انى مدرسة
ومش عارفة أقوم بيها من كتر الدوشة بتاعة ملف الانجاز
الاستاذ الوزارة كتر خيره نصحنى بعد ماأغلب المدرسين مشيوا
ان المدرس الشاطر هو اللى يكروت المتابع
ويخمه
ويفهمه ان كل حاجة تمام
لذا من موقعى هذا
ارجو منكم الدعاء
ليمكننى الله تعالى
من كروتة اللجنة علشان نخلص منهم بسرعة
لكن
فى شمعة منورة فى وسط الضلمة دى عارفين ايه هى ؟
انى يوم الاحد ان شاء الله
أو الاتنين بالكتير هتكلم عن الثورة العرابية
ده طبعا بعد ماأحفظ الرؤية والرسالة
وأحط صورة الريس
وأشيل العنكبوت
و.........و........
ياريت تطمنوا علينا
السلام عليكم
19 التعليقات:
السلام عليكم
موضوع جميل يلفت النظر والله المفروض يمسك التعليم واحد عايز ينفع امته مش واحد بيجمع فلوس
وبالمناسبة حضرتك معتبرة الحصة االي هي 35 دقيقة طويلة
هههههههههههههههههه
انا حصتي 45 دقيق
وكلهم شرح
وارجو ان لاتحرميني من طلتك البهية في مدونتي
حتى ولو كنت اتاخر في كتابة المواضيع
لأني امر بفترة لا يعلم حالي بها الا الله
مودتي
هو صحيح ربنا خلقنا احرار؟؟؟؟
اومال ليه انا حاسة ان الدنيا نفسهاقيد,,,,شوفتي الصورة بتاعتي
اللي في المدونة؟؟
هو انا كنت عايزة اسالك في شوية حاجات فنية 1-ملف التعريف فيurl
بيتكتب فيه ايه بالظبط؟2_المدونة متظهرش اصلا علي الويب,.,,معلش في الرزالة.....
حمد الله على السلامه كل دي غيبه يااختي
كلامك وحشني اوي والله وربنا يعينك بكره بقى
عايزاك تطمنيني على طول
وعلى فكرة الاجازة خلصت من غير ماتعرفيني اعمل مدونه ازاي
ومعلش انا برده انشغلت اليومين اللي فاتو
ماعلينا طمنيني بقى على التطورات مستنيااااااااااكي بفارغ الصبر
ايوة
بيقيموكوا علشان يدوكوا شهادة
الايزو
محمد صلاح مالك ياباشا زعلان من ايه انا زرتك فى المدونة بس لاحس ولاخبر ايه اللى مزعلك --عارف انا بكره ان شاء الله فى المدرسة هكلم الطلبة بتوعى عنك ولو ماردتش بسرعة وقلت مالك هعمل لك استدعاء ولى امر
تخاريف هانم الغضبانة ----نورتينى ---بس ده مايمنعش انى اقولك نهار مش فايت انت بتشككى فى كلام نور عينى عرابى ----فعلا ربنا سبحانه وتعالى خلقنا احرارا الا من عبوديته بس واكيد انت عارفة ان عبوديتنا له سبحانه اسمى الحريات والدنيا ياقمر قيد لانها دار اختبار والامتحان دايما قيد مش كده ولا ايه؟ اعذرينى اصل المهنة بتحكم كتير وتلاقينى فى كل حاجة عمالة ارغى واللى اقوله اعيده -------------بس بجد عايزة اهنيكى على دماغك الحلوة هى تبان فى الاول انها مطرقعة شوية بس زى العسل ---الظاهر انا حظى حلو الايام دى عمالة اتعرف على دماغات حلوة
عزيزتي حفيدة عرابي
كنت لسة ناوي اسالك ليه ماكتبتيش بوست جديد لقيت هذا البوست الظريف
بالمناسبة انا بنتي في تالتة اعدادي و رايحة المدرسة بكرة برضه
سيبك من اللجنة و العك الوزاري و الجودة و التقييم
المهم انك تعلمي تلامذتك اللي انتي مؤمنة بيه و يكفي عنوان مدونتك
علميهم ان الله قد خلقهم احرار وان لا يقبلوا الأستعباد بعد اليوم
تحياتي
ايمان ياحبيبتى اللجنة جاية بكره ويانروح الجنة ياما فاضلينا زلطة ونطلع برة ---انا مش بهرج والله كل يوم والتانى يعملوا لينا اجتماع ويقولولنا حفت الجودة بالمكاره لازم نشد المئزر علشان ناخد الجودة ونقبض 3000 جنيه فى الشهر وناخد 3شهور مكافأة والا المدارس هتتباع لرجال اعمال وهنتشرد فى الشارع طبعا الكلام ده مابيدخلش ذمتى بنكلة بس ادينا بنسمع -----ادعيلى ربنا يصبرنى عليهم وسلملى اوى على الباشمهندس والامامير سلمى وشوشو
احمد سعيد اهلا بيك عندنا يافندم انا متابعة مدونتك دايما ومش لاقية كلام جديد اقوله اكتر من الكلام اللى الناس كلها بتقوله --انت ونوارة حقيقى بتتقمصوا شخصيتى الفذة وتقعدوا طول النهار تقولوا ياترى ياهل ترى هى كانت عايزة تقول ؟ايه وتقوموا كاتبينه على طول مش عارفة ياربى ايه الناس دى
استاذ طارق مش قادرة اقولك انا سعيدة اد ايه ان حضرتك زرت المدونة وسعادتى اكبر والله بكلمتك الجميلة جدا اللى بتهزنى حفيدة عرابى يارب استحقها --وبعدين بنت حضرتك فى تالتة اعدادى طيب اديها درس الله يخليك ده نحن نحطم الاسعار تحطيما---عارف حضرتك ايه اللىمفرحنى انى بكره ان شاء الله الساعة الواحدة ظهرا (اصل مدرستى عشوائية فترتين ) هاكون بقول بسم الله الرحمن الرحيم انحاز الخديوى توفيق للاجانب ومش هتخلص الحصة ان شاء الله الا لما اجيب سيرة عرابى واعيش حياتى اسبوعين كده ولا حاجة اخلى الطلبة بتوعى يقولوا يسلم فمك ياعرابى (زى مسلسل الثلاثية ) -- الحمد لله ده انا فى طلبة كانوا عندى وهما فى الجامعة دلوقت يقولولى اول ما يشوفونى لقد خلقنا الله احرارا وبصراحة احيانا بيقولوا ----(لف وارجع تانى)
كل اجازة وانتى بخير
معلش مهو لازم نفتكس وننفذ الأفتكاسة وبعدين نكتشف انها فكست ومش نافعة >> الكلام على موضوع الجودة والحاجات دى
تحياتى
زمان قالوا مصائب قوم عند قوم فوائد
الجودة دي بقي جت مصلحة ليا
كل المدارس اجباري لازم يكون عندها انترنت وغصب عنهم لازم يشاركو في الـdsL
بالمناسبة هي الاجزة خلصت بسرعة ولا انا بيتهيألي انا اتفاجأت ان اخويا بيجهز علشان المدرسة الصبح
ربنا معاكم
foxologyاهلا بيك يافندم ---بس لو سمحت حاسب على كلامك مين اللى بيفتكس هو عشان يعنى كل يوم والتانى يقولو الغاء الصف السادس وعودة الصف السادس ---الثانوية العامة بتحسين لا مفيش تحسين ---الكادرطب ابقوا قابلونى لو شميتو ريحة الفلوس حرام عليك ماتظلمش الوزارة بتاعتنا
استاذ تامر اهلا بيك وبعدين النت بيقطع ياباشا النت بيقطع حرام عليكم طول النهار ادور عليه فى المدرسة مش لاقياه --ربنا يسامحكم انتم هتكونوا السبب فى حرماننا من الجودة
السلام عليكم ورحمة الله وبركاته
ايه يابنتي دا
دانتي مدرسه :D
انا الاول افتكرتك طالبه وقلت ايه التطور الرهيب اللي حصل في التعليم من ساعة ما سيبناه دا والكلام الغريب اللي بقى الطلبه يقولوه ويتعاملوا معاه دا :D:D
أحلى حياة -- نورتينى يافندم بس الله يكرمك طالبة؟ عارفة امبارح بالصدفة دعيت على الطلبة بتوعى اللى يضايقنى فيهم ربنا ينتقم منه ويطلع مدرس
السلام عليكم
ها بشريني طلابك قالوا ايه عني انشاء الله هيكون كويس
الدرس انتهى لموا الكراريس
السلام عليكم
أشمعنى التعليم يعنى إللى حيكون جوهرى
مامصر كله ماشيه بالبركه وكمان بالمنظره والحركات
وربنا يشفى
ودمتِ فى خير حال
إرسال تعليق