كلاكيت تانى مرة (ابراهيم عيسى)

لافض فوك أستاذى بجد تحليل رائع وصادق وعفوى حقيقى انا سعيدة انك أستاذى اللى مسح بكلامه مرارة الكلام عن منتظر الزيدى فعلا حسن نصر الله بيتكلم من منطلق مكانته الرمزية اللى هو متأكد من تمتعه بيها واللى حصل عليها لاسباب كتير قوى من اهمها انتماؤه وقيادته للمقاومة وبعدين الراجل بيتكلم صح ويمكن ده هو السبب اللى جنن الحكومة من كلامه فاطلقت عليه كلابها بسرعة بس المشكلة ان اول ماخطر ببالى بعد ماسمعت خطابه انت واهم سماحة السيد انت بتأذن فى مالطة المصريين بعد عصور طويلة جدا من الحكم البوليسى وتفريغ النقابات ومؤسسات المجتمع المدنى والاحزاب من مضمونها مش متعودين ينزلوا الشارع بسهولة يمكن لان مفيش عندهم القيادة الواعية اللى تجمعهم بذكاء زى ما حصل فعلا فى ازمة الضرائب العقارية مصر مش لبنان سماحة السيد علشان تنزل تبات فى الشارع لما الزعيم يطلب كده بس انا حاسة ان اليوم ده قرب والحكومة كمان حاسة بكده والا مكنش الريس يطلع علشان يتكلم كلمتين محدش كان عايز يسمعهم اللى يتفهم منهم بجد اننا ماظلمناش الناس دى مصر مش هتفتح المعبر لغاية ما الفلسطينيين يتصالحوا يعنى الخاين ابومازن اللى ايديه غرقانة بدم عرفات والفلسطينيين يرجع تانى غزة يعنى حماس الكخة دى لالنها بتقاوم يبقى لازم تتعاقب ونخلى اهل فلسطين نفسهم يكرهوا ايامها وعلى حسب التحليل الرائع لاستاذى ابراهيم عيسى السيد حسن كلم المؤسسة العسكرية بمنتهى الرقى والحرفية زى ماهو متعود فى لبنان لكن احنا فعلا خدنا على توجيه الرسائل الفاشلة للدول العربية ومش عندنا استعداد حد يوجه لينا اى كلام لاحساسنا الفاضح بكدبنا وعجزنا وانبطاحنا ابراهيم عيسى وحسن نصر الله (شكرا ) انتم الامل ان بلادنا لسه فيها رجالة

فى القلب (غزة )

تحديث

الظاهر انا عدوة نفسى وغاوية اعذبها

امبارح اسمع تامر امين والنهاردة عمرو اديب

بس نفسى اقول كلمتين

باختصار علشان انا واحدة نفسيتى تعبانة

سماحة السيد حسن نصر الله ده

ارجل مافيكم

هو ده اللى عبر عنكم بكلمة واحدة

(أنصاف الرجال )

فلما يتكلم ابقوا افهموا الراجل بيقول ايه

عمرو اديب بيتسول وبيقول مصر فقيرة مصر غلبانة هتجيب منين

لا يا باشا ياللى بتدافع عن مصر وعن كرامتها وسيادتها

مرتبات اتباع السلطان امثالك

هى اللى فقرتنا

على اعتبار اننا مصدقين اننا فقرا

صعبان عليكم اوى الرائد الله يرحمه اللى اتقتل برصاص فلسطينى

الرائد الله يرحمه دمه فى رقبة

اللى اجبروه يقفل طاقة الحياة الوحيدة فى وش اخواته

انا مستنية بجد اليوم اللى نجرى فبه على حدود فلسطين وليبيا والسودان

ومحدش يفتح لنا

ساعتها هنقول أكلت يوم أكل الثور الابيض

ملاحظة مهمة

لكل اللى بيعيطوا على مصر

اللى بتتشتم

احنا وحكومتنا والله ا لمقصودين بالسب مش بلدنا المبلية بينا

انا رايحة ادور على حلم من احلام النقاهة

لنجيب محفوظ

بيصور مصر بعد ماولادها كلوا خيرها وقعدوا ياكلوا فى بعض جنب جثمانهاايوه فى القلب غزة طيب كنا بنستعبط وساكتين لغاية ما الهانم وزيرة الخارجية جت تهدد غزة من عندنا ؟هو خلاص حكومتنا وصلت للمرحلة دى من الفشل وقصر النظر مش هتكلم على العروبة والاسلام واخواتنا فى الانسانية علشان الكلام ده مش بيدى مع الحكومة ومع ناس كتير هاعتبر نفسى لمدة 3دقائق بس بتاعة مصلحتىوبراجماتية هو لما مصر تشجع اسرائيل على ضرب غزة حتى ولو ضمنيا حتى ولو عن طريق ا لمقالات اللى بقالها كام شهر بتشتم فى حماس واللى جابوها وبتندب على الشرعية على اعتبار ان حماس جاية يعنى بانتخابات مضروبة زى بتاعتنا والاجمل الكلام الصريح الواضح عن ان مصر مش هتقبل قيام امارة اسلامية على حدودها معلش انا واحدة فهمى على قدى فهمت ان مصر مش عايزة حماس طيب براحة عليا علشان استوعب مصر مش عايزة حماس قوم ايه نولع فيها طيب ماهو الناس لبعضيها مين ممكن يقوم بالمهمة دى علشانا واحنا دايما يعنى فى الخدمة غير اسرائيل زى ماكنا مضايقين من البتاع ده (الاسم الحركى لحزب الله ) واسرائيل قامت بالواجب تصدقوا انتم بتظلموا الحكومة دى بتتهموها انها بتسمع كلام اسرائيل مع انها حكومة واعرة قوى وهى اللى مخلية اسرائيل خاتم فى صباعها اتنين وبيحبوا بعض وقلبهم على بعض ندخل بينهم احنا ليه بس بجد علشان اناهحاول اركز اهو الغباء الحالى لحكومتنا اللى ماوردش قبل كده انها مش فاهمة حسب خبرتى الكبيرة قوى الف باء السياسة والامن القومى صدعولنا دماغنا بتضحيات مصر من اجل القضية الفلسطينية وعن الجحود الذى تعانى منه الشقيقة الكبرى من الصغار الذين لا يعلمون واى عيل صغير فى تانية اعدادى يعرف ان اى حاكم مصرى كان بيدور على مصلحة البلد او حتى بيأمن حكمه بيعمل حاجة من اتنين يحتل الشام اوجزء منها او يخلى علاقته ودية ووثيقة مع حكامها من اول تحتمس اللى هراهم حملات وبعدين ربى ولادهم عندنا علشان يطلعوا ولائهم لمصر او رمسيس اللى تقريبا هزمهم وبعدين سبلهم وعمل معاهم معاهدة سلام لاى حاكم تانى فى اى مرحلة من التاريخ علشان مطولش راى ان أمن مصر القومى جزء كبير منه فى ضمان امن الشام(ملحوظة مهمة انا مقصدش ابدا اننا نحتل غزة او اى بلد تانية)انما كل اللى اقصده ان مش معقول الحكومة الذكية تكون غافلة عن ان غزة اماننا وضهرنا وانها من مصلحتها انه يكون فى غزة حكومة علاقتها حسنة معاها انما نبيع الناس وش كده لا ووزير الخارجية المصرى فاضله شوية ويحلف ان اسرائيل مابلغتناش طيب قالوا للحرامى احلف رسالة الى ذكى حكومة فى تاريخ البنى ادمين (خيبك الله فضحتينا) يعنى لازم تاخدى صفر فى كل حاجة ماسمعتيش عن المثل اللىبيقول اكلت يوم اكل الثور الابيض تصدقى بالله ياحكومة انا مش عارفة اركز من ساعة ماسمعت الخبر بس بجد كل اللى جاى على بالى لك الله يا فلسطين ويارب احنا متبريين من الحكومة دى ليوم الدين ده انا زى مايكون قلبى حاسس من اول ما سمعت عن التلطيش بغباوة فى اى مظاهرة لغزة حسيت ان فى احداث سودة جاية صبرنا يارب على مابليتنا

اسلمى يامصر

ي

اسلمى يا مصر اننى الفدا

أغنية جميلة جدا كنا بنغنيها فى طابور المدرسة زمان

ومش الغنوة دى بس كنا بنغنى

ياأحلى اسم فى الوجود

وخلى السلاح صاحى

وأغنية ماسمعتهاش غير فى المدرسة بتقول

ياعرب والله حرام دمكم يروح هدر

عيشوا فى محبة وسلام ده انتو فى الدنيا بشر

مش حرام الدم سايل

كل واحد فيكم شايل بندقية لجل أخوه

ده غير أغانى عبدالحليم الوطنية

اللى أحيانا كانت بتتذاع فى الراديو

أو باسمعها على الكاسيت

وكانت النتيجة المنطقية لده انى كنت ساعة تحية العلم

واخده الموضوع جد قوى

لدرجة انى والله وأنا فى خامسة ابتدائى

الفت شعر عن وعد بلفور

لكن دلوقت الوضع كالاتى

مافيش أغنية وطنية مهما كانت جميلة

بتدخل دماغى

ده غير الطلبة العباقرة بتوعى

ماكانش حد فيهم يعرف حاجة عن فلسطين

لولا ربنا يديله على قد نيته شارون

لولا دخوله المسجد الاقصى وإستشهاد محمد الدرة

كان زمان طلبة مصر لسه بيسألوا

هو لسه اسرائيل محتلة فلسطين لغاية دلوقت ؟

قوم ايه....؟

أنا عندى سؤال عبقرى

ليه الاجيال الجديدة مش لاسمح الله ماعندهاش انتماء

دى ماتعرفش مصر أصلا

عايزين تصدعوا من كلامى

طيب

بالصلاة على النبى كده

فين لاسمح الله بابتهم ومامتهم

يا اما بيشتغلوا ولقمة العيش فرماهم

يااما بيتخانقوا وبيفشوا غلهم فى العيال

يابيتفرجوا على مسلسلات تافهة فى التليفزيون

يا اما هما كمان مايعرفوش حاجة عن مصر

فين لاسمح الله المدرسة

حيث غرس الانتماء وقم للمعلم

لااااااااااااااااااااا

أنا مش هتكلم

أنا واحدة ناجحة فى الكادر ومستنية الفلوس

لكن بجد فى مدرسين كتير عندهم استعداد يعملوا حاجة كويسة

بس دى بتبقى مجهودات شخصية

والحمد لله انا باحس ان الوزارة بعمايلها معانا

مش عايزانا نتكلم فى حاجة مع الطلبة

ازاااااااااااااااااااااااااااااااااااااااى؟

مناهج مكدسة وبايخة تكره الطالب فى نفسه

مش فى بلده بس

مثلا منهج سنة 3اعدادى التاريخ التيرم الثانى

منهج شهر مارس مش يخلص شرح بس

بما يرضى الله قبل نصف ابريل

بتكلم من أول ثورة 1919 لغاية العدوان الثلاثى

احنا المدرسين بنقول أحد أحد

لمابيخلص

ده غير الاصرار الغريب من واضعى المنهج

على حذف أوتمييع الاجزاء المهمة فى المنهج

اللى بجد ممكن تبنى حاجات مهمة جوه الطلاب

مثلا حد يقرأ منهج تانية اعدادى

ويقولى حس بأيه بعد دراسة السيرة النبوية الشريفة

ولا الفتنة فى أواخر عهد عثمان

ولا الصراع بين على ومعاوية

ولا صلاح الدين والصليبين

وياريت حد يقنعنى منهج 3 اعدادى اللى مليان دش

ليه يعنى يتشطروا بالذات على سياسة محمد على الخارجية

ويحذفوها وليه مايفضلش فى ذهن الطلاب

غير ان محمد على اللئيم ضحك على زعماء الشعب

وانفرد بالحكم

وبعد كده قدر يبنى مصر الحديثة من غير صداع المعارضة

وليه أفهم الطلاب فى سنة تانية

اننا فشلنا فى فتح القسطنطينية 3مرات

وفى سنة تالتة أحذف من المنهج اسم السلطان محمد الفاتح

اللى فتحها بخطط عبقرية

موضوع كبير مش كده؟

بس بجد أنا اتضايقت

أكمل فى مرة تانية ان شاء الله

عفوا استاذى ابراهيم عيسى

عفوا استاذى ومثلى الاعلى صدمت جدا بمقالك المنشور بالدستور وكررت قراءة المقال عدة مرات لعل فهمى الاول يكون خاطئا ولكنى اقنعت نفسى بان العبرة بكاتب المقال حتى لو اختلفت مع رأى كاتبه ومع الاحترام الشديد لخبرتك ومهنيتك الصحفية التى لاغبار عليها فان لى عدة ملاحظات اولا تكلمت فى المقال عن مهنية الصحفى الذى يمتلك وسائل يعبر بها عن ارائه وعن مقتضى وظيفته وعهدى بك سيدى صحفيا جريئا استخدمت وسائل عديدة للتعبير عن رايك فماذا كانت النتيجة؟وهل المطلوب منا نحن فقط ودائما الالتزام بالمهنية والقواعد الاخلاقية فى تعاملنا مع اعدائنا ام اننا بدون ان نشعر تغلغل الاحساس بقوة اعدائنا فى انفسنا لدرجة جلدنا لانفسنا بقسوة ورغبتنا الدائمة فى اثبات حسن نيتنا واخلاقنا لحثالة البشر اذا كان المعنى الذى سيصل للغرب من حادثة الحذاء هو عدم مهنيتنا وسوء اخلاقنا فمعنى ذلك اننا مطالبون دائما بتحسس موقف الغرب منا قبل ان نخطو اى خطوة وهذا دليل دامغ على انسحاقنا النفسى قبل السياسى والاقتصادى والعسكرى امام الغرب ثانيا لاشك ياسيدى ان قذف الناس بالاحذية عمل غير مقبول اطلاقا ولكن لى سؤال وانا اعلم اجابته عندك هل هناك اى وجه للمقارنة بين قذف الاعداء بالاحذية وبين قذف هؤلاء الاعداء لنا بالقنابل العنقودية وتخريبهم لبلادنا واحتلالهم لاراضينا واثارتهم للطائفية والمذهبية والفتن لعن الله من ايقظها بالبلدى المطلوب منى انا بس اكون مؤدبة واستقبل ضيوفى باحترام حتى لو ضيفى ده دنس الارض والعرض ثالثا مين قال ان بوش ضيفنا ده ضيف الزعماء العرب المنبطحين ضيف المالكى الخاين ضيف اى حد غيرنا هل نملك ياسيدى طلب رفض زيارة بوش لو حدث هذا فى المستقبل اعدك اننا لن نقذفه وامثاله بالاحذية رابعا على اى اساس وجود بوش لد ينا يمنحه الامان الامان يمنحه لبوش من دعوه لاحتلال المنطقة الامان يمنحه لبوش من سمحوا لقواته بعبور قناة السويس وبناء قواعد له فى الخليج الامان يمنحه لبوش المارينز العرب وايتام الديموقراطية الامريكية لقد قا لها نزار قبانى على اعتقد (من بدأ المأساة ينهيها ) ولقد تعلمنا منك يا سيدى ان هؤلاء الروساء باستبدادهم فاقدى الشرعية فضيوفهم منطقيا ليسوا ضيوفنا خامسا تتحدث ياسيدى عن ان ضرب بوش بالحذاء يهبط بمستوى خلافنا مع اعدائنا ومن قال لك اننا نريد لمستوى اختلافنا معهم ان يرتقى هل المطلوب منا دائما التمسك بقواعد الاتيكيت والتحضر حتى مع قاتلى اباءنافى اى شرع وفى اى دين جاء ذلك؟سادسا لماذانغمة المعايرة هذه يا سيدى انت ترى اننا تشطرنا على راجل واقف فى مؤتمر صحفى ومش واخد باله لا ياسيدى احنا اتشطرنا على رئيس اكبر دولة فى العالم حتى ولو كان فى ايام ولايته الاخيرة حتى لو كانوا يسمونه البطة العرجاء احنا اتشطرنا على اجهزة الامن والاستخبارات العراقية والامريكية التى لم تستطع ان تمنع عن الرئيش قدرا كان لابد ليصيبه احنا اتشطرنا على رئيس فاشل وقاتل لابائنا واولادنا صحيح فعلنا معه كان بسيطا وعفويا ولكن مين قال ان العفوية لاتكيب احيانا الم تكن كلمة عرابى الخالدة امام الخديو فعلا عفويا الميكن اشتعال ثورة 1919 فعلا عفويا اطلق فيه المصريين نيران سخطهم المكبوت على الانجليز وكنه ياسيدى ليس فعلا طفوليا ولا عاجزا ولا ساذجا ونحن ندرك تماما ان هذا الفعل لن يحرر بلادنا ولن يطفى نار الفتنة التى اشعلها المحتل المضروب بالحذاء وكنه بدون ان تعايرنا ياسيدى اقصى ماامتلكته ايدينامن افعال سابعا

ماالغرض من الحديث الدائم عن ان هذا الفعل لم يكن ليحدث فى عهد صدام او لايمكن ان يحدث مع اى زعيم عربى حاليا لان العواقب معروفة تماما للجميع هل تلمح ياسيدى حاشاك كما قال غيرك ان ذلك الحدث كان بسبب الديموقراطية التى نشرها بوش فى العراق انا استعبد ان يكون هذا تفكير استاذى ومثلى الاعلى ثامنا هل رمى الحذاء على بوش تعبيرا عن سياسة الغضب العربى ضد سياسات بوش هذا سؤالك اما اجابتى رمى الحذاع تعبير سريع وعفوى وصادق وشجاع ضد اجرام بوش وليس منتظر ولسنا معه بمسئولين عن تدنى اعمال المقاومة ضد القوات الامريكية ولا عن العمليات الارهابية وليس مجرد عدم حدوث هذه الفعلة سابقا دليلا على سؤء اخلاق من صنعوها لعلها تكون سابقة حسنة تاسعاحتى انت ياسيدى ! لماذا لاتدعونا نفرح لماذا تسحبوننا من نشوة الفرحة الى النقاش والتنظير والتحليل بوش وانضرب بالجزمة واحنا فرحنا وحسينا برمزية الحدث وانها رسالة من ربنا لينا ان الضربة ممكن تصيب من حيث لاندرى ولا نحتسب ونه لابد عن يوم محتوم تترد فبه المظالم ايوه انا انا عارفه الجزمة اللى لبست فى العلم الامريكى ماردتش المظالم و\لكن مين عارف يمكن فرحتنا بالاهانة اللى لحقت امريكا فى شخص بوش تشجعنا اوتكون خطوة فى طريق طويل جدا لاسترداد حقوقنا وحريتنابجد مش قادرة امنع نفسى دايما باغنى المجد ده ابننا والفارس الكرار راكب على مهرنا والكدابين عارفين

مش قادرة أمنع نفسى أنا فرحانة فيك يابوش

قصيدة روعة للخال الابنودى

هل يمكن لمن أنجب أن يعجز عن تسمية مولوده !؟

أنا عجزت

رغم الاعتصار

وطول الانتظار

أن أهب القصيدة اسما

كلماعثرت على اسم

أحسست أنه سوف يؤذيها

هل منكم من يهبنى اسما

دون الاعتداء عليها

ملقيتلهاش عنوان

ولحد ماتنشف منابعهاالبترولية

وتجف ربوع أراضيها.

الزراعية

وينام الموت

. يتمطع فى البرد وفى الشرد

وتعودكل النباتات العالية للارض

بالجوز والفرد

وينطفى فى خدود صباياها لهيب الورد

ولحد اما يموتوا

كل ملوكها ورؤساءها وامراءها

وولاد اولاد كل ملوكها ورؤساءهاوامراءها

ولا يفضل منهم حد

لحد الكثرة ماتصبح قلة

ولحد قصور امراءها

ماتتلطع على واجهاتها الجلة

ولحد الشمس ماتتطلع من الغرب

ولحد ماتفنى من غير حرب

كل جيوشنا وعساكرنا الانية

وجيوش وعساكر كل الاجيال الجاية

وكل الخلق فى كامل ارجاء الامة

اصحاب ضمايرها

وقلالات الذمة الاغنياء

والفقراء

.سراق المال

والاجرا محتكرى الصحة

..واصحاب العلة فى كل ملة

حنموت

وولادنا تموت

واحنا لسه بنقول عنها

الارض المحتلة

خلاص هاكتئب

يعنى ياربى

فرحت خلاص

وبعد مابخرت المدونة

ووصل لى

الله اكبر الله اكبر

أول تعليق

وقلت يابت فاضلك تكة

وتوصلى للعالمية

وتبقى زى غادة برايد العسولة

اللى زعلوها

تقوم الباشمهندسة سبهللة

اول بنى ادم

تعتب البلوج فى تاريخ البنى ادمين

تتصادر مدونتها بامر زوجها العزيز

ربنا يسامحك ياللى كنت السبب

تكسر بخاطرى

وتقل فرحتى وانا لسه باسمى فى التدوين

طبعا اللى فى بالى

مش زوج الباشمهندسة سبهللة

واخد بالك يا --------

مالوش لازمة

قبل العيد شرفنا فى المدرسة

متابع من الوزارة

علشان يشرح لنا نظام التقويم الفاشل

اللى الوزارة الرشيدة فرضته علينا السنة دى

ياريت تلاحظوا الكلام ده بعد بداية الدراسة باد ايه !؟

لكن ماعلينا

احنا فوضنا امرنا لله

وقلنا نقضيها السنة دى نفهم فى النظام الرائع ده

ولما الاستاذ المتابع فتح باب الاسئلة

وطبعا الراجل طيب

ومتوقع الاسئلة كلها فى فنيات تطبيق النظام

اتسحبت أنا من لسانى وسألته

ليه مادة الدراسات الاجتماعية أصبحت درجاتها من40 ومش من60 زى الاول

رد عليا رد صدمنى

قال ان ده هو الصح

ولو كان الامر بيده كان خلاها من4

لانها مادة مالهاش لازمة

وان اوربا والدول المتقدمة ماحدش منهم عنده ثانوية ادبى غيرنا

وانها المفروض تبقى مجرد مادة نشاط

طبعا اختكم اذبهلت

وكان فاضل شوية واكل دراع حد من زمايلى

وماقدرتش أجمع كلام أقوله

غير ان مش معقول دلوقت اصدق ان ال4سنين اللى درستهم فى الكلية دول كلام فاضى

و الدكاترة الافاضل

اللى فهمونى يعنى ايه فلسفة التاريخ

وربط المنهج بالاحداث الجارية

وغرس المواطنة والانتماء

كانو بيضحكوا علينا وبيقلبوا عيشهم على حسابنا

أنا ياناس اتعلمت من دكتور صلاح العقاد

ويونان لبيب رزق

ومحمد عبدالرءوف

وغيرهم كتير

وقضيت أجمل اربع سنين فى عمرى

اسمع واتعلم وادعى ربنا ان المحاضرة ماتخلصش

دكتور محمد عبد الرءوف كان أب لينا

وكنت باحس انى قدام بحر

وكان بيسافر بينا فى كل الازمان

ودكتور يونان أول ماسمعنا انه هيدرس لنا

زعلنا وقلنا الدكاترة الكبار دول والمشهورين

مش بيشرحوا حاجة وبيتكبروا على الطلبة

لكن فوجئنا بكم التواضع

والشرح الوافى والاسلوب الرائع والجديد فى عرض المادة التاريخية

وكمان نصف ساعة من كل محاضرة

نسأل فيها فى أى مجال حتى السياسة

والراحل العظيم الكفيف صلاح العقاد

اللى للاسف مادرسلناش غير 8 محاضرات بس

ومكناش بنقدر نكتب وراه زى مايكون بيقرأ من كتاب

من كتر تنظيم أفكاره

لكن حبيبى بجد

كان دكتور محمد عبد الرءوف

العسل

المتواضع

البحر

اللى كان السبب انى اعمل دبلومة علشان أشوفه تانى وأسمع منه

الى كل هؤلاء الافاضل

خلاص زمن اللللللللللللللللللللللللللللللللللللللللللللللللللللل

خلص خلاص

مع عظيم أسفى لكم

كل اللى اتعلمته منكم

مالوووووووووووووووووووووش لازمة

وحسبى الله ونعم الوكيل

أول تدوينة

بحب عرابى جدا

ومن ضمن أحلامى

انى ان شاء الله لما أدخل الجنة

أقعد معاه وأشوف بنفسى مظاهرة عابدين التانية

لما البطل عرابى

قال كلمته المشهورة

لقدخلقنا الله أحرارا

وأظرف حاجة عجبتنى

لما قرأت ان عرابى لو عايش فى أيامنا

كان لازم يطعم عشرة مساكين

طبعا لانه أقسم

أننا لن نورث ولن نستعبد بعد اليوم