زهقاااااااااااااانه

لا أنا مش نايمة

أنا زهقانه وطهقانه ومضايقه

بس مش زى ريكو

انا زهقانه من الشغل والناس

مطحونه ايام الامتحانات

ونفسى فى اجازة ارتاح واخلص مشاويرى واشوف اللى ورايا فى البيت مش عارفه

لا وكمان تلاقى كل واحد والتانى مش بيرحمك

انت بتشتغل

طيب

خد على دماغك واشتغل كمان

لكن فلان

لا ده رايق

ده ممكن مايعرفش يشتغل والدنيا تبوظ

يقعد من غير شغل احسن

واللى مزهقنى اكتر

انى مضايقة من نفسى مش عارفه الاقى طريقة بعد العمر ده اتعامل بيها مع الناس

ارتاح ويريحونى

لو اخدت كل حاجة على اعصابى زى عادتى

الكل يزعل حتى ولو كان بيدلع فى الشغل

لو جيت على نفسى وتماسكت وحاولت اكون هاديه واطنش وافوت واستحمل

الناس زى ما يكون بيصعب عليها يعدى يوم واتنين عليا فى المرحلة الجديدة يقوموا يجيبوا اخرى

واقعد مع نفسى تانى واقنعها زى المدمنين انى هاتغير

لكن

مش عارفة اتغير يابشر

انا باخد كل حاجة على اعصابى ودمى بيتحرق بسرعة

وده طبعا بيشل تفكيرى وبيخلينى اتعصب

طبعا انا مش بغلط فى الناس

بس العصبية بتديهم مبرر للزعل واكون انا فى النهاية الغلطانة

طيب اسكت مكلمش حد ؟

مش عارفة

بيصعب عليا نفسى وبحس انى هيجيلى اكتئاب

وبعدين ده امتع حاجة فى الشغل هى كلامنا مع بعض

لو رحت الشغل ومكلمتش مع الناس دى متبقاش عيشه

جربت من كتر خنقتى

انى اقلل كلامى شويه ومبقاش عبيطة واتكلم كتير لكن طبعا الطبع غلب التطبع وبرجع لعادتى تانى

كنت كتبت فى بوست قبل كده عن الاشراف العام فى المدرسة وخدت قرار ان السنة الجاية ان شاء الله اذا عشت هكون اشراف دور وبس

وده طبعا بعد مااعترفت لنفسى انى فشلت فيه

ياترى اسيب الكنترول كمان

ما هو ده سبب تعب اعصابى دلوقت

خنقة بجد كل واحد عايز مصلحته وبس والباقى يولع

كنت مهديه اعصابى على الاخر

وصدقت الابتسامة المرسومة على وشى

لغاية ما حصل اكتر من موقف النهارده خلانى جبت القديم والجديد

المهم

نختصر الكلام

انا بسأل دلوقت

افتح الشبك ولا اقفله

الشباك اللى هو قلبى

افتحه للناس واتعامل معاهم بقلب صافى

واستحمل المقالب والرخامة

ولا اصدر الوش الجبس

ولا اخد بعضى واطلع على احمد عكاشة

بس هو الكشف بتاعه 250 جنيه

ده انا ممكن يجيلى استبحس من تمن الكشف بس

الا من ناصح ؟

تخاريف

استاذ /جلال عامر

كل مقالاته فى المصرى اليوم جميلة

بس النهارده لذيذة اوى

قلت اخليكم تقروها معايا

مادام مهندس مصرى حط لنا نكت

نحط كمان تخاريف

كلمات راقصة
بقلم جلال عامر ١١/ ٥/ ٢٠٠٩
■ البعض يطالب بحل مجلس الشعب وتفكيك القبة.. الأفضل إما أن نطلق سراحه أو نحبسه فى دار ابن لقمان ونطلب فدية.

■ بعد القضاء على الخنازير.. البعض فى انتظار أنفلونزا تنتقل عن طريق «الخمر».

■ انتشرت جداً درجة «الدكتوراه» المضروبة.. فى الأسواق «دكتوراه» صينى لكل المقاسات.. بعد عام واحد من استعمالها تتحول إلى «إعدادية».

■ أحياناً أشعر بأن مبعوث الأمم المتحدة الذى يزور المنطقة يحمل معه مقترحات بخصوص «العلاوة».

■ أنا مع الحكومة فى عدم رفع العلاوة، لأن رفع العلاوة سوف يؤدى إلى تركيز الثروة فى أيدى الفقراء، وممكن ينحرفوا ويعملوا حفلات ماجنة ويشربوا عصير مانجة.

■ فى قرار متسرع أعلن السيد وزير التربية والتعليم أنه لن يتم تسريب الامتحانات هذا العام.. انتظروا وقفة احتجاجية لأولياء الأمور.

■ أقرَّ مجلس الأمن مبدأ الأرض مقابل السلام، وهو المبدأ الذى تؤمن به مصر، إذ توزع الأرض مقابل السلام عليكم.

■ على طريقة بيانات عام ١٩٦٧ تصدر الوزارة كل ساعة بياناً تقول فيه «قتلنا ٣٥٠ خنزيراً وأصبنا ٩٦ وحاصرنا ٢١٤ وأسرنا ١٨٤»، ثم يستعرضون منظر الأسرى فوق العربات.. شكل المعركة من واقع هذه البيانات أن الخنازير سوف تحتل القاهرة ويتنحى وزير الصحة.

■ هناك مجهود ضخم مبذول، فكل عشرة أمتار يستوقفنى «شحات» تبدو على وجهه آثار «التنمية».

■ الاستقرار - الرخاء - التنمية.. التطعيم الثلاثى عن طريق الفم.

ايه رأيكم ؟

جميلة مش كده؟

سيادة الرئيس ---شكرا

سيادة الرئيس شكرا

أنا متنازلة عن الصدقة اللى الحكومة الموقرة تفضلت بيها

وقررت اتبرع بيها

لحل الازمة الاقتصادية العالمية

وسد العجز فى الدين الداخلى

وتوفير فرص عمل جديدة

ومكافحة انفلونزا الخنازير والطيور وما قد يستجد

ومحاربة القراصنة فى المحيط الهندى اللى كانوا السبب فى انخفاض ايرادات قناة السويس

سيادة الرئيس شكرا

على المقلب الكبير اوى اللى خدناه من سيادتك

بس الحقيقة احنا نستاهل اكتر من كده

لانكم من فترة طويلة اوى بتلعبوا معانا على المكشوف واحنا مصدرين وش الغباوة ومش عايزين نفهم

تعليم وفشل الحمد لله وربنا ما يكلل جهودكم بالنجاح لانى واثقة ان الليل ليه اخر

اقتصاد انا معرفش فى عهدكم ايه هو مفهوم الاقتصاد

سياسة خارجية وبقينا كلنا موافى بنسهل مصالح اسرائيل

سياسة داخلية --------------

عدم انتماء وفقر وفساد وبلطجة وشغل جلا جلا لما طلعتوا العفاريت على جتتنا

لكن توصل ياظلمة تبقى العلاوة كده

مستكترين فينا بلدنا

هى كانت فلوس او بلد ابوكم

انا كل يوم والتانى بحس انى ظلمت الراجل الطيب

الخديو توفيق

لما قال لقد ورثت هذه الارض عن ابائى واجدادى

ماهو الراجل ماغلطش اهوه

سيادة الرئيس

انت وكل اعضاء حكوماتك الموقرة من اكتوبر 81 للنهارده

انا مش مسامحاكم

وميعادنا يوم القيامة يحكم بينا العدل

ولا يمكن -----

ربنا يسهل ونشوف ذنبنا خلصان فى الدنيا

الباشا الكبير اوى أحمد عز

والنبى ياشيخ تتله وتسكت

علشان انا مخنوقة منك ومن اشباهك

صعبانة عليك اوى الاجور بتاخد كام من الميزانية

بلاش يا باشا

مش لازم اجور

هى الناس دى يخدوا مرتب يعيشهم عيشة كريمة ليه ؟

خدنا عندك نشتغل بالسخرة فى مصانعك

انا مش بهرج

بس حقيقى سياسات غبية رجعتنا قرون لورا

لا وريسنا ملاح ومعدينا

بيغنى علينا فى عيد العمال وهيقاتل مع الحكومة علشان العلاوة

اللى جه على بالى الهتيفة بتوع عيد العمال

الهى ربنا مايحرمكمش من الهبل

انتهزتوها فرصة وقلتم نصر الله متخلف

مبروك عليكم

حالكم وغبائكم ونفاقكم

وحسبى الله ونعم الوكيل

الجودة

شرفنا يوم الاحد 26\4 لجنة متابعة من الهيئة القومية لضمان جودة التعليم والاعتماد

وطبعا احنا كنا عارفين ميعاد اللجنة

بس احنا مستنينها من اول التيرم التانىوحقيقى كان عندنا رعب من اللجنة دى من كتر الضغط علينا

لغاية ما فوقنا نفسنا وقلنا ان اللجنة دى مش ربنا

امال هنعمل ايه يوم القيامة لما تتطاير الصحف ونذهب للعرض على الجبار

بجد اتضايقت من نفسى جدا انى كنت خايفة كده

بس من ضمن اسباب خوفى انى فاشلة جدا فى تظبيط التواريخ والغياب والكلام ده

وان لجان المتابعة اللى شفناها قبل كده كانت بايخة جدا

وهدفها بدون تعصب تصيد الاخطاءوممارسة السيطرة البايخة علينا

المهم يوم السبت عيد تحرير سيناء كنا كلنا فى المدرسة

اتغسلت المدرسة من اول وجديد وشكلها حقيقى كان جميل جدا وقبل ميعاد المدرسة بساعة كاملة كنا فى اماكننا

واجمل حاجة اننا خدنا بادجات عليها اسامينا ومسمانا الوظيفى كنت مكسوفة البسها فى الاول لكن عجبتنى جدا بعد كده

ووصلت اللجنة فى ميعادها

وجه وقت الاذاعة

وووووووووووووووووووووووووووووووووالميكرفون مش ممكن يشتغل ابدا

مدرسة التربية الرياضية هرت البنات تمارين لغاية ما المدرسين يصلحوا المايك

لكن مين

راسه وميت بتاعة قديمة ما يشتغلش

حقيقى الطابور كان جميل جدا اول مرة بجد اشوفه حلو كده

والبنات كانت فى منتهى الانتباه للطابور والاذاعة من غير مايك

ودى كانت اول سلبية سجلتها اللجنة اننا معندناش مايك استبن ومعندناش خطة لوحصلت ازمة زى دى

كانوا مفهمينا انهم ليهم خطة وان مرورهم على الفصول هيكون فى اليوم الثالث

لكن طبعا الكلام ده ماحصلش والمرور كان من اول يوم

كل واحد فينا كان خايف اللجنة تشوف غلط عنده ويكون هو السبب فى حرمان المدرسة من الجودة ده غير التجريس من زملائه طبعا

وانا كانت حصصى كتير اول يومين ففوضت امرى لله وقلت ربى استرنى ولا تفضحنى

وعدى اول يوم على خير اخرج من فصل يدخلوه اسيب مبنى ينتشروا فيه

فرحت اوى وقلت لنفسى الاول

تانى يوم استعنا باحد ابناء الحى جاب لنا اجهزة للصوت وده تبع فريق المشاركة المجتمعية من فرق الجوده فى المدرسة

وعدى الطابور على خير

وكان عندى اربع حصص ورا بعض

فى الحصة التانيةلقيت زميلنا حلقة الوصل بين المدرسة واللجنة بيقولى انهم اختاروا اسمى عشوائى من المعلمين اللى هيعملوا مقابلة معاهم

طبعا

نسيت كل الكلام اللى كنت مذاكراه عن الجودة والتعلم النشط والتقويم الشامل والهم ده

وقلت لا اله الا انت سبحانك انى كنت من الظالمين ------ربنا افتح بيننا وبين قومنا بالحق

ورحت على اللجنة

لقيت ناس فى منتهى النشاط والذكاء والظرف

صحيح خرجت من عندهم بعد اكتر من ساعة ونصف مش شايفة تقريبا وعندى صداع فظيع بس كنت سعيدة جدا بيهم

اكتر واحد استجوبنا لانه كان استجواب بجد كان تبان عليه كده سمات التدين وكان عسل بجد وكلامه وروحه مريحة لاعصابنا وده مايمنعش انه عصرنا بس بأدب

كان فى واحد تانى بجد بجد مشفتش حد لئيم زيه فى حياتى يسأل السؤال بكذا طريقة ويوقعنا فى بعض ويدينا معلومات غلط علشان نتراجع عن اقوالنا

هو مااستجوبناش كتير

بس تعبنا جدا ولا لما كان بيسأل البنات ماكانوش بيأخدوا فى ايديه غلوة ويعترفوا علطول لما نكون احنا مستحملناش

لكن احنا الحمد لله ما قلناش غير الموجود فعلا فى مدرستنا

والغير موجود ماكدبناش فيه

لاننا فاهمين ان كل كلمة من كلامنا لازم يكون عليها دليل

ولما بتكون حاجة مش عندنا كنا حتى بنستغرب من كلامهم معانا فيها

لكن اكتر حاجة عجبتنى فى تقييمهم لينا

تركيزهم على علاقتنا كمدرسين مع بعض ومع الادارة وادلتنا على علاقتنا الحسنة دى

واسئلتهم الذكية

بس الاجمل اننا كنا بنحقد عليهم من مرتباتهم اللى غيرنا خالص لكن هما وصلونا لمرحلة اننا حاسين هما بيتعبوا اد ايه

طبعا مدرستنا فيها حاجات كتير غلط

بس احنا فهمناهم اننا كنا تحت الصفرو اننا طورنا من نفسنا ودى اهم اهداف الجودة

وان اللى هما شايفينه دلوقت بكل سلبياته حاجة جميلة جدا واننا نفسنا اتفتحت للتطوير

طبعا هما كانوا معانا 4ايام وحاولنا نفهم منهم نجحنا ولا ايه؟

كانت اجمل كلمة قالوها انهم قضاة بيسجلوا حالنا لكن الحكم مش منهم

طبعا انا لسه ماحكتش كل حاجة عن تجربتنا معاهم

دى هتاخد اكترمن بوست

بس المهم دلوقت دعواتكم لينا

بالنجااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااح