اجتازت مصر فترة عصيبة فى تاريخها الاخير من الرشوة والفساد وعدم استقرار الحكم
ده بيان الثورة اللى كلنا عارفينه واللى قاله باسلوب مؤثر السادات
دلوقت شعورى اننا على مشارف ثورة
بحس ان انا عايشة بالظبط فى الاربعينات
استعمار بس شكله متغير زى عادته
لا وايه الاستعمار بقى حبيبنا وروح قلبنا وبيدينا معونة
واللى يغضب عليه الاستعمار يبقى خارج من الملة
رشوة وفساد وعدم استقرار الحكم واضحين للاعمى
احتكار وسيطرة رأس المال على الحكم واقطاع
حاجات حاسة انه عيب اتكلم فيها من كتر ماهى واضحة
طيب انا مش هارغى هقول اسامى بس
احمد عز وهشام طلعت ويوسف والى ويوسف عبد الرحمن وهايدلينا وممدوح اسماعيل ومحمد فودةوالحباك والسكرى والسويدىوكل ---معاه قرشين عايش علينا بيهم وبيسرق فى قوتنا بمنتهى البجاحة
دى امثلة بس وكمان دماغى مش عارفة مالها مش قادرة افتكر اسامى تانى
الجيش الوطنى اللى الثورة كان نفسها تبنيه انا مش عارفه هو فين- ماعنديش معلومات عنه
نفسى اعرف عدده -- اطمن على سلاحه
اخويا لما راح الجيش عقدنى
حسيت ان مفيش انتماء
لا ده فيه فساد ورشوة وتسلط ومكانوش بيدربوه كتير على ضرب النارعلشان مفيش ذخيرة
العدالة الاجتماعية ؟
لا مش هتكلم عنها
ماما قالت لى ماقولش كلام عيب
الحياة الديموقراطية السليمة
دى الحلم
اللى هنعيش ونموت من غير مانشوفه
الهدف اللى مااتحققش فى مصر من الاف السنين لغاية دلوقت
من فرعون اللى كان ابن الاله
للبطالمة اللى كانوا خلفاء الاسكندر ابن الاله
للرومان والتسلط العسكرى
وبالعند فى ناس مايعرفونيش ومبيدخلوش مدونتى
مش هتكلم عن الحكم العربى
اللى على قلبى زى العسل
انا كنت بحب حاجات كتير فى ثورة يوليو
حتى لو الحاجات دى كانت مجرد شعارات براقة مقدروش ينفذوا منها حاجة
بحب فى ثورة يوليومجانية التعليم وعندى احساس ان دى من الانجازات المهمة جدا
دلوقت الحمد لله بقول على مسئوليتى ان مفيش تعليم فى مصر وللاسف مسيطرة على جدا نظرية المؤامرة حاسة ان الخراب فى المناهج والتقويم الشامل ونظم الامتحانات كل دى حاجات مقصودة
بحب فى ثورة يوليو السد العالى وتأميم القناة
واكره كل واحد يقول لى السد العالى حجز الطمى واثر على خصوبة التربة وان عبد الناصر كان غبى لما أمم القناة
بحب المعانى اللى بيمثلها بناء السد وتاميم القناة
بحب اغنية عبد الحليم عن السد ومش ممكن اشرح للبنات العدوان الثلاثى الا لما اغنيلهم بصوتى الرائع
راح على البنك اللى بيساعد ويدى
قاله حاسب قاللنا مالكمش عندى
او
ضربة كانت من معلم خلى الاستعمار يسلم
جاب سلاحه --طياراته-- غواصاته --دباباته-- واعتدى علشان نسلم
هو مين!! لا ده بعده هو جه يتلقى وعده
بحب اغانى الثورة كلها
بحب الحالة اللى خلقتها الثورة فى الفن
وباكره اغنية اخترناك
وصور الزعيم اللى اجبارى تتحط فى كل مكان حتى فى اوضتنا فى المدرسة
كنت بحب قوانين الاصلاح الزراعى ولما كبرت شوية حسيت انى مش معاها
مع ان مفيش حد من اجدادى من ايام المغفور له مينا موحد القطرين كان باشا واقطاعى والكلام ده
بس رفضت القوانين دى فى وقت متأخر
بس سؤال بيخطر على بالى هنا
كان فين شيوخنا ايام صدور القوانين دى
ليه دلوقت بس افتكروا ان الملكية الخاصة محترمة فى الاسلام
بحب فى الثورة عدم الانحياز ومؤتمر باندونج ومساعدتها لنكروما
بحب فى الثورة عداوتها لحلف بغدادومساعدتها للجزائر
واكره فى الثورة الغاء الدستور واعفاء نجيب واللى حصل ليوسف صديق
بكره فى الثورة الحكم الشمولى والاتحاد الاشتراكى ونظرية من ليس معنا فهو عدو الثورة والشعب
بكره فى الثورةنظرية تولية المناصب لاهل الثقة وطرد اهل الخبرة
بكره صلاح نصر وشمس بدران وموافى وفيلم الكرنك
بكره فى الثورة الغباء السياسى وعدم المرونة
بكره نظام الحكم الر ئاسى والدستور اللى بيخلى رئيس الجمهورية ابونا وعمنا وانور وجدى ومنقدرش نحاسبه
لا ده كمان فى ناس بتقول عيب نحاسبه
بحب القطاع العام اه والله بحبه ومش هسامح لغاية مااموت اللى خربه وسرقه وبعدين باعه
بحب جدا عمر افندى
ماما واحنا صغيرين كان لازم تدخل تتفرج على عمر افندى حتى لو مش هتشترى حاجة
دلوقت لما بدخله بحس انه كان بيتى وحد خمنى وخطفه منى
بحب الاميرة انجى وعلى اللى اتجوزها لما الثورة قامت
بكره 67 وبحب الصمود والاستنزاف
بحب اكتوبر وبكره كامب ديفيد ومعاهدة السلام
وحاسة ان الثورة انتهت تماما الى غير رجعة بداية من كامب ديفيد
بحب محمد نجيب ومش قادرة اكره اوى عبد الناصر
نفسى اعيش فى ايام ثورة
بس جبانه وخايفة من الفوضى
نفسى يبقى عندنا دستور بجد
احاسب بيه رئيس الجمهوريةوالحكومة
نفسى فى مجلس شعب عنده كرامه
نفسى فى سيادة قانون
نفسى فى ثورة
بالنسبة للاخوة مباحث امن الدولة شعبة مكافحة المدونات
لو فى حد فيهم بيدخل المدونة المغمورة دى
انا نفسى بس ياباشا
بحلم مش اكتر
ولو حضرتك مش عاجبك نلغى الحلم سيادتك وهروح حالا اتفرج على روتانا سينما لغاية الصبح
بلا ثورة بلاقرف