إنتقال اضطرارى

مدونتى العزيزة على قلبى

تعانى من بعض المشكلات الخاصة بالتنسيق

حاولت كثيرا التغلب على تلك المشكلات

ولكنه السيد بلوجر ابى الا أن يفرقنا

قررت نقلها الى هنا مؤقتا عسى أن يصلح الله الاحوال

التدريب .... أفادكم الله

بلوجر مازال مصرا على العناد
السطور بيتحكم فيها بطريقة مدهشة
اعترف تماما بفشلى فى تنسيق التدوين
أو حتى ابعاد السطور عن بعضها
-------------------------------
ربنا يجازى ادارتنا الموقرة خيرا
عملت تدريب على التعلم النشط قلنا فرصة نتعلم يمكن نرحم طلابنا الاعزاء من طرقنا التقليدية ونعبر بيهم الى المستقبل
مش عارفة هيعملوا ايه فى المستقبل لكن مش مهم
أولا التدريب اتحدد له اكتر من ميعاد ومكان
لغاية يوم الخميس الماضى الحمد لله اتبلغت نشرة تليفونية للمدارس بأخر تعديل لمكان التدريب
البداية كانت السبت
المكان مدرسة ثانوى بنين
السادة غيراالمدرسين مش هيقدروا يتخيلوا فى ادارتنا يعنى ايه مدرسة بنين
مبدئيا يعنى كل حاجة مكسرة
والمقاعد يبقى من حسن حظك ودعوات الوالدة المستجابة بتلاحقك لو لقيت واحد مناسب تقعد عليه
أول كلمتين سمعتهم أول ما وصلت حوار شيق جدا بين الموجه الاول والمسئولة عن تنظيم التدريب
الموجه الاول مستغرب ان مفيش مدربين موجودين والمسئولة ردت ان كلهم واخدين اعتيادى ومسافرين مصيف
واستغربت ليه الموجه الاول جاى التدريب بنفسه مايبعت كام موجه من عنده يدربونا
اعترض هو لان موجهينه لم يدربوا اساسا على التعلم النشط
ياريت حضراتكم تخلوا بالكم ان دول الموجهين
انا ماانكرش انهم بيشتغلوا بذمة واتعلمنا منهم كتير طول السنة
بس ده كان مجهود شخصى منهم ولا واحد منهم حصل على تدريب
المسئولة عن التدريب شايفة ان كلام الموجه الاول غلط
وان مفيهاش حاجة انهم لم يدربوا كنت ريح نفسك وابعت كام واحد منهم وخلاص
وبعدين انت شايف مفيش حد يدربهم الكلام ده علينا
حسيت ان نفسيتى بدأت تتعب وكده هدخل على اكتئاب والحكاية مش تستاهل
قلت لها حضرتك احنا نعمل ايه دلوقت
بمنتهى الهدوء قالت لى روحوا اقعدوا مع ( بتوع العلوم) اسمعوا كلمتين أو أى حد منكم يكلمكم عن التعلم النشط
وكمان الاربعاء والخميس مش هنكون هنا
هيكلموا المدارس فى التليفون ويستئذنوا يشوفوا نقعد فين
لأن المدرسة اللى استقروا فيها كمكان للتدريب عندها امتحانات ومش مستعدة للتدريب
ربنا يسامح البلوجر والفيس بوك والجرائد والبرادعى علشان اللى حصل بعدها كان صدمة غير متوقعة لها بالمرة
لانى انطلقت فى كلام من نوعية اننا لينا حقوق فى البلد دى
ولما يطلب منا عمل لازم تتوفر ظروف وبيئة مناسبة تساعدنا وتشجعنا على العمل ده
واننا مش هنقعد مع بتوع العلوم لاننا مش قطيع
ومحدش مننا هيدربنا ومصرين لازم يحضر مدرب يدربنا وكمان نستفيد منه
الكلام ده بتاعى
أنا والله لقد خلقنا الله احرارا حفيدة عرابى باشا
المهم الحمد لله كنت منفعلة بس مش مجنونة قوى
كانت نظرات المسئولة عن التدريب واضحة جدا ورأيها فى الانسانة الغريبة اللى جاية تضايقها من أول يوم
اول يوم كان مجرد كلام مع الموجه الاول
وممنوع نمشى بدرى لسبب مقنع جدا ان( بتوع العلوم) قاعدين وماينفعش احنا نمشى وهما لا
وكمان مدير الادارة ممكن يعدى على التدريب فجأة ومايلاقيناش
طيب مااحنا مفيش حد يدربنا
دى حاجات شكلية
المهم تانى يوم مدربة عسولة واثقة من نفسها حست اننا متوترين بدأت بذكاء تسمعنا
حوارات طويلة ومناقشات للصبح نتيجتها اللى اتعودنا عليها
انتم بتعاملوا ربنا واعملوااللى تقدروا عليه
وظبطوا شوية ورق لأى متابع يوصل المدرسة
واطلبوا الستر من ربنا وكفى الله المؤمنين شر القتال
روح الغلاسة كانت مسيطرة على بطريقة بشعة
لو سكت ممكن يحصل لى حاجة وده مش كويس على صحتى
وانطلقت فى أحاديث عن الحقوق والواجبات وان تقوى الله تقتضى من صاحب العمل يوفر لى بيئة مناسبة
(كلمة بيئة فى الادارة عندنا غير مستساغة لان معناها مش طيب بالمرة)
وانى ماينفعش اتعلم النصب و ماينفعش اتعلم ان المدرس الشاطر هو الفهلوى اللى يخم المتابع والكلام اللى زهقنا منه
وعشت فى الدور انى مش لازم اتعلم اخم حد
وان المفروض فى ميثاق عمل وان شغلنا يكون حقيقى مش مجرد موظفين بنظبط ورق
احلى حاجة ان كتير تشجعوا بعد ماكانت شرارة الثورة من عندى وكانت جلسات حكاية
كان فيها دعاية مباشرة وغير مباشرة منى عن تغيير الدستور
واصلاح التعليم والبلد اللى حيلتى باظت وبلادى وان جارت على عزيزة
والاجمل ان مدرسة مش تعرفنى فى عز انفعالنا كلنا
قالت لى بصى خليك انت احمد عرابى وقولى لقد خلقنا الله احراراواحنا وراك
طبعا ضحكنا أنا وصحابى وقلنا مادام فيها عرابى فأنا لها ان شاء الله
دخلنا فى نقاش تانى عن فكرة الرضا بحالنا وحال بلدنا علشان ربنا يبارك لنا
ومقدرناش نقنع المدربة بوجهة نظرنا المتواضعة اننا نرضى بقضاء الله
فى الاشياء الخارجة عن ارادتنا أو اللى استنفذنا معاها كل الوسائل المتاحة بدون نتيجة
لكن الرضا عن أوضاع غلط يبقى سلبية وتخاذل وموافقةعلى المنكر
سامعة سؤال يتردد فى جنبات المدونة
فين التعلم النشط؟
لا تقلقوا احنا كلنا بنطبق تعلم نشط
وبلدنا زى الفل والتعليم بيتصلح
احنا بس اللى محبطين ومعترضين وخلاص ولازم نكون متفائلين
لكن الحقيقة
ان الرغيف كبير والمواصلات فاضية والاسعار رخيصة ولتحيا الوحدة العربية
وعين الرضا عن كل عيب كليلة
والسلام عليكم ورحمة الله وبركاته

إنذار وأشياء أخرى

انذار شديد اللهجة الى السيد بلوجر
أنت تعلم ماذا فعلت
ولكنك لا تدرى سيدى ما هى حدود صبرى عليك

وما هى الاجراءات التى يمكن أن أقوم بها اذا استمرت تلك المعاملة الغير كريمة منك

-------------------------

حملة مفيدة جدا من مجموعة من المدونين المتميزين

كانت بدايتها اقتراح من مدون متميز صاحب رحلة البحث
مع استعداد عالى جدا عند كتير من أسرة التدوين نتيجة لجهود خيخة المتواصلة من سنتين تقريبا
لإنجاح حملة التبرع بالدم
http://bloggersbloodbank.blogspot.com

فى انتظار مشاركتكم واقتراحاتكم
لكن ده خلانى أفكر شوية اننا لينا حقوق كتير فى البلد دى مهضومة
وان الحكومات الموقرة واجبها الاساسى انها توفرلنا الظروف المناسبة للعمل والرعاية الصحية وقت المرض
فى سنة اولى اعدادى
درس عن نظام الحكم بيوضح ان من أهم واجبات فرعون
اللى هو فرعون
انه يوفر وسائل الحياة الكريمة لشعبه
يعنى بالبلدى يخلق بيئة مناسبة للناس تعمل قدر طاقتها
ورزقها على ربنا فى الاول والاخر
لكن احنا من زمان قوى والدولة بتنسحب من كل ما يخصنا
بعد اذنكم لو حد ممكن يقولى تعريف بسيط للدولة حديثا وايه واجباتها
يمكن أنا بظلمها

-----------------------

أليس غايبة عن المدونة من كام يوم
وأنا عايزة أشكرها على حاجات كتير
اخرها انها علمتنى انزل اليوتيوب على المدونة
وبهذه المناسبة
عايزاكم تشاركونى الاستمتاع بقصيدة تميم ( الى جداتنا )
تقريبا انا عندى الايام دى ادمان ممتع جدا لشعر تميم






كنت ناوية أفضفض

لكن خليها لوقت تانى لما نشوف حكاية السيد بلوجر ايه

فى ذكرى حطين

ياأيها الباكى وراء السور أحمق أنت!!؟
أجننت !؟
لا تبكى عينك أيها المنسى من متن الكتاب
لا تبكى عينك أيها العربى
واعلم أنه فى القدس من فى القدس لكن لا أرى فى القدس الا أنت

أنا جسمى عليل

سيدى وصالك

مقال رائع لعمر طاهر فى الدستور

http://ahmnkyadonia.blogspot.com/2010/07/blog-post.html

وأنا جسمى عليل