أضحى مبارك

كل عام وأنتم بخير

اللهم أصلح أحوالنا وذات بيننا

ولا تولى أمورنا سفهاءنا

اللهم ارزقنا حجا وعمرة

الى بيتك الحرام

اللهم ارضنا بما رزقتنا

وبارك لنا فيما أعطيتنا

اللهم اغفر لنا ولامواتنا

اللهم انك عفو كريم تحب العفو فاعف عنا

الحمد لله رب العالمين

وصلى اللهم وبارك على محمد وعلى اله وصحبه أجمعين

سؤال

ممكن سؤال لو سمحتم00 ؟

ليه كم الكراهية الموجودة عند كتير من المدونين المسلمين

لكل مايمت بصلة للاسلام والعروبة ؟

وليه فى إصرار على الفصل بين حبنا لبلدنا وانتمائنا العربى؟

أنا مش هتكلم عن ماتش الجزائر

لانه أكبر من قدراتى النفسية والعقلية

وبحاول أستوعب الاحداث وتداعياتها مش عارفة

بس بجد والله

لما أنت مسلم وشايف ان الاسلام هو سبب التخلف اللى عايشين فيه

ما تشوف لك يااخى أنت وهو ملة تانية تحققوا بيها التقدم لنفسكم الاول

بتخنقونا فى حياتنا ليه ؟

الاسلام سبب التخلف!!!!!

ومصر عرفت التخلف لما دخلها عمرو بن العاص وفرض عليها لغته!!

عمرو بن العاص اللى كان بيحب مصر من قبل الاسلام

وفضل يلح على الخليفة فى فتحها

هو دلوقت المتهم باحراق مكتبة الاسكندرية

عدو الثقافة والتنوير000 !!

مع ان كل المؤرخين متأكدين انها أحرقت فى عهد كليوباترا السابعة

على يد يوليوس قيصر

بسبب معركة دارت هناك فامتدت السنة اللهب للمكتبة وأحرقتها

ليه كارهين أوى عمرو بن العاص

وروحهم الوطنية بتوجعهم لما بتيجى سيرته

مع انهم بيرحبوا بشدة باجانب كتير دنسوا تراب بلدهم

وبيستشهدوا دايما باقوالهم

ليه صعبان عليهم أوى ان مصر غيرت لغتها للعربية

مع ان محدش فيهم درس الكتابة الهيروغليفية

ومستحيل يقدر يستخدمها دلوقت

ولما عمرو وصل مصر

كانت ماتت من زمان

حتى من غير ماتنال شرف التحنيط

أنا هادية خالص ومش عصبية اهوه

الاسلام وحش

الاسلام ده يع خالص

مصر لو تخلت عن الاسلام

ستعود لركب الحضارة

الذى تركته بمجرد دخول الغازى عمرو بن العاص اليها

متشكرين يااساتذة

أحب أبلغ حضراتكم

ماتعملوش حسابى معاكم

أنا عاجبنى جدا التخلف اللى صنعه الاسلام

وأسفة انى أبلغ حضراتكم

انى سعيدة جدا انى بشتغل مدرسة

و ناوية اكثف جهودى الفترة الجاية

علشان أزرع بذور التخلف والانحطاط فى نفوس الطلاب

والاجمل انهم طالبات

يعنى ان شاء الله فى المستقبل هيكونوا أمهات

وهيعلموا ولادهم الكلام اللى هيسعموه منى

غصم واقتدار على رأى اللمبى

أنا شريرة وسادية

وهستغل وظيفتى ضدكم

هاعملهم غسيل مخ

هافهمهم ان الاسلام نعمة من ربنا

وهو الدين اللى ربنا سبحانه وتعالى اختاره لينا لنتعبده به

وان تخلفنا بسبب ناس عندها انسحاق نفسى تجاه الغرب

ناس حاسة انها ضعيفة

انها هوا

انها مخوخه

ومش مسنودة على حاجة

هفهمهم ان عمرو ده ارطبون العرب

اللى كان بيموت فى حب مصر من قبل الاسلام

وان ربنا شرف مصر بالاسلام

وان كل واحد فينا بيصلى وبيصوم

وبيوحد ربنا

لعمرو نصيب بأذن الله فى أجره

كل شوية هاسمعهم الاية الكريمة

ومن أعرض عن ذكرى فأن له معيشة ضنكا ونحشره يوم القيامة أعمى

هخليهم يمشوا فى الشارع

ويتفرجوا على التليفزيون

ويقرأوا مدونات

وييجوا يقولولى

شافو ا كام واحد أعمى القلب النهارده

هكلمهم عن المنافقين

اللى خطرهم عن الدين اكبر من الكفار

وهحكى لهم حكاية عبد الله بن سلول

لما الغل أكل قلبه من محمد صلى الله عليه وسلم

وقال لئن رجعنا الى المدينة ليخرجن الاعز منها الاذل

وهخليهم يستنتجوا لوحدهم

مين هو الذليل الحقيقى

ساعدنى يارب

عرفات

اتفق معه او اختلف كما شئت

ارفعه الى أعلى سماوات الوطنية والبطولة

او إنزل به الى دركات الجحيم

وألصق به صفات الخيانه والعمالة

من حقك أن تبدى اعجابك بذكاءه

أو تبدى احتقارك لسياساته

من حقك أن تهتف كلما تذكرته

بكلماته الاثيرة والشهيرة

ياجبل مايهزك ريح

ومن حقك أن تنسى كل أفعاله

ولا تتذكر له الا قبلاته السمجة لكل من يقابله

ولكنى كلما تذكرته

لا يخطر على بالى الاعدة مشاهد

أغلبها أخيرة

مشهده وهو فى الطائرة يودعنا جميعا

وكأنه على يقين أنها النهاية

جلست يومها أبكى بشدة

بكاء لم أبك مثله يوم وفاته

لا تفارق خيالى يده الملوحة لنا

وابتسامته التى يحتار فى وصفها البشر

عرفات

بماذا كنت تحس وقتها ؟

هل كنت فى وعيك ؟

أم أن السم أفقدك هذا الوعى ؟

أم هى البصيرة ..؟

والحقيقةالالهية التى تهبط على البشر

يوم يقال لهم فبصرك اليوم حديد

أيضا مشهد زهوة وهى تودعه فى المطار

أبكتنى بشدة دموعها

على أب

لم تره بقدر ما سمعت عنه

حرم الموت زهوة من أبيها كما حرمتها منه الدنيا والسياسة

مشهده فى الامم المتحدة وهو يتحث عن البندقية وغصن الزيتون

عرفات

أيا كان حالك معنا

ايا كانت سيرتك فينا

بصرف النظر عن أوسلو التى أكرهها كما لم أكره الاكامب ديفيد قبلها

بغض النظر عن كل ما قيل وما سيقال

لا أجد فى ذكرى رحيلك

الا

صورتك ملوحا لنا بشدة بتحية الوداع

ولا أجد الادموعى التى أذرفها كلما تذكرت هذا المشهد

أنا سامحتك

على كل ما خيل لى أنك ارتكبته فى حقنا

والله أعلم بحالك ونيتك

ودعائى الى الله سبحانه

أن يتغمدك وأمواتنا ونحن أجمعين برحمته

الوزيرة والهانم ست ستها

أنا دلوقت فهمت ليه الحكومة مصرة

ان نصف أعضاء مجلس الشعب على الاقل يكونوا عمال وفلاحين

علشان يستقر مبدأ جزمتك شرف ياعمدة

انا بحب أضحك على نفسى

وناوية أصدق أى حد هيقول ان الفيديو مزور

مش عارفة ازاى مزور

بس ادينى بحلم

مانكونش وصلنا للمرحلة دى من الانحطاط

كان فى ناس كتير جدا زعلانة من الست الغلبانة

اللى باست ايد الست هانم

نائب رئيس

الحكومة الا سبانية

الظاهر فعلا بوس أيادى أسيادنا

أصبح من موروثاتنا الثقافية

يونان لبيب رزق -- أستاذى وأفتخر

فى المصرى اليوم النهارده مقال عن دكتور يونان لبيب رزق

فرحت جدا لان العظيم ده أستاذى

هو مش درس لنا غير مادة واحدة فى سنة رابعة

وهى تاريخ مصرا لحديث والمعاصر

كنا زعلانين جدا إنه هيدرس لنا

وقلنا لنفسنا

الدكاترة الكبار المشهورين دول

مش بيشرحوا حاجة وبيتعاملوا بكبر ملحوظ

وكمان المادة دى احنا زهقانين منها وحافظنها

إيه يعنى الاضافة اللى هتحصل لنا بدراستها؟

وكمان المحاضرة 8 صباحا

يعنى لازم البهدلة فى المواصلات على الصبح

وشاء الله سبحانه

ان دكتور يونان يخيب كل توقعاتنا

أولا

واقف مستنينا قدام المدرج

بينادى علينا بحنان وأبوة كانت غريبة بالنسبة لنا

أنتم سنة رابعة ؟

أتكسفنا من نفسنا ودخلنا المحاضرة

واحنا مشاعرنا بتتراوح بين الدهشة والخجل منه

وبدأت المحاضرة

لا

وبدأت المتعة

شرح وافى وجميل جدا

والاجمل الطريقة اللى عرض بيها التاريخ

كان بيدرس لنا الاحتلال البريطانى

ودرس لنا بطريقة جديدة

عرض علينا تقرير مهم جدا لسياسى بريطانى شهير هو ا للورد دافرين

ومن دراستنا للتقرير ده بنفهم سياسة الاحتلال البريطانى فى مصر

محاضرات كانت شيقة جدا

والجديد كمان ان المحاضرة ساعة ونصف

بيشرح الراحل ساعة كاملة

ونصف ساعة بتاعتنا احنا

لطرح الاسئلة فى أى موضوع يخطر على بالنا

كنا محتارين نستمتع بالشرح الجميل والمعلومات الجديدة المعروضة بأسلوب رائع

ولا يكون استماعتنا بوقتنا احنا

اللى أزعم أنه شكل كتير من وعينا السياسى

أنا كنت خايفة أتكلم معاه

علشان ماأتعرضش لسخرية أو تجاهل لسؤالى

وفاكرة انى سألته عن حماس وحزب الله

اللى كانوا بالنسبة لى وقتها حاجات جديدة تماما

وكنت عايزة أعرف ليه بيتقال عليهم ارهابيين

وأنا مش حاسة منهم بكده

لكن

مش ممكن

إبتسامته الحانية

وكلامه الهادى وهو بيناقشنى

وبيقول لى أنت اللى هتجاوبى

وأنت اللى لازم تحددى

مين الوطنى ومين الارهابى

شوفى وقررى عملياته بتوجه لمين وقررى أنت

منى الشاذلى كانت عملت معاه حوار رائع

وكنت هموت قدام التليفون علشان أكلمه

لكن الكنترول ربنا يسامحه رفض إتصالى أكتر من مرة

لانى معنديش سؤال ليه

كنت عايزة أشكره بس

ياريتهم كانوا خلونى أكلمه

أول مرة شفته وأنا فى سنة اولى

كانت الكلية عاملة ندوة بمناسبة عودة طابا

وهو كان فى الفريق المصرى

وحكى لنا فى مسرح الكلية عن جهوده هو والفريق المصرى

والمناورات الاسرائليية لكسب القضية

وأنا فى الدبلومة

كان من حظى اننا خمسة أخترنا المادة اللى بيدرسها حضرته

عارفين يعنى إيه

أنا وأربعة بس من زملائى نقعد مع دكتور يونان

ويشرح لنا

مع أن حالته الصحية لم تكن مستقرة بالمرة

واثار التعب كانت بتظهر كتير على وجهه

لكن عمرها ماظهرت فى المجهود المبذول معنا

كفاية انه لما اتوفى بعد تخرجى

قريبة لى كلمتنى تعزينى فيه

من نعم ربنا على

انى خريجة كلية البنات جامعة عين شمس

وبقول بصوت عالى

انى اتهنيت

اه والله اتهنيت

سنة رابعة كنت فى حالة نفسية غريبة

مش عارفة أستمتع بالمحاضرات

ولا أحزن على الوقت اللى بيعدى

لانى خلاص هتخرج

دكتور يونان

واحد

من الاساتذة اللى ربنا كرمنى بيهم

على سبيل المثال

الدكتورا للى بحس ان عنيا بتدمع لما بفتكره

دكتور محمد عبد الرءوف

ودكتور سعيد اسماعيل على

درس لى فى الدبلومة

لا

ماينفعش دلوقت

هظلمهم

لكل واحد منهم بوست مستقل ان شاء الله

وأملى أن يكتب لهم مجهودهم فى ميزان حسناتهم