لسه شايفة الخبر حالا فى اليوم السابع المستشار جودت الملط استقال
وطبعا الريس رفض الاستقالة
الراجل ده أكيد بيستهبل
المستشار طبعا
احنا بلد ممنوع فيها الاستقالة مهما كانت الاسباب
الا لو كان المسئول بيدلع علينا زى ما عمل فاروق حسنى قبل كده
عموما بصرف النظر عن الاستقالة وأسبابها
وكلام اليوم السابع
انها بسبب المضايقات اللى حصلت من نواب الوطنى بتحريض من الننوس عز
كلمة كده على جنب هما نواب الوطنى البعدا دول مالهموش ملة
مازهقوش من دور الإمعة
ماتعبوش من التسقيف
طب كمال الشاذلى كان مرعب ولما بيزغر بترعب وأنا قاعدة فى بيتنا
هو الننوس بيزغر لهم ازاى يعنى ؟
ماعلينا تانى
دى مش أول مرة المستشار يتخنق من الهجوم عليه
بس اللى شدنى فعلا ان المستشار قبل كده دافع عن الحكومة بعد ما هاجمه
والمجلس وافق على الميزانية ببساطة زى العادة
مفيش فايدة لازم أقعد أرغى
الكلام ده فكرنى بشخصية بحبها جدا وليها فى قلبى مكانة كبيرة جدا
اللى صورته منورة فوق ده
ايوه هو محمد شريف باشا
وبما انى مدرسة وكمان لسه جاية من عنبر العقلاء عند احمد سعيد
فيسعدنى ويشرفنى
ان أحدثكم اليوم عن بنى ادم محترم
يانهار ابيض
محترم؟
اه والله
وعنده كرامه كانت واجعاه جدا
لا ووطنى ومن عيلة كبيرة
وشهم ونبيل وابوه اسمه شريف
هو الراجل الحقيقة أجمل مافيه زهده فى السلطة
وبالرغم من كده كانت المناصب بتتحايل
عليه استقال أربع مرات وبيعتبروه أبو النظام الدستورى فى مصر
الطلبة بتوعى كل ما أقولهم شريف باشا استقال
يضحكوا ويقولوا هو ماوراهوش غير كده
اقول لنفسى مش غلطانيين والله ماتعودوش على كده
لكن هو اتولى وزارات الداخلية والحقانية والخارجية
وكان ساعات بيحمع بين الخارجية والحقانيه وطبعا رئاسة الوزاء
واستقال أول مرة
لما اسماعيل اضطر يوافق على وجود لجنة اوربية
للتحقيق فى أسباب تعثر مصر فى سداد الديون
كان صعب عليه اوى يقف ويشرح للجنة اجنبية حاجات داخلية لمصر
وقتها كان حتة وزير حقانية وخارجية بس
وتانى مرة استقال فى أول عهد الخديوى توفيق
اللى ما كانش طايقه ورفض مشروع الدستور اللى اتقدم بيه شريف
وهو متأكد ان النتيجة هتكون استقالة شريف
علشان هو مش على مزاج توفيق
اللى ياما صدق استقالته وعين مكانه رياض باشا البنطلونى
أرخم رئيس وزراء حصل فى تاريخ البنى ادمين
ولما حبيب قلبى عرابى أصر على عزل رياض
اتعين شريف فى سبتمبر 1881 وبالرغم من خلافاته مع العرابيين فى مجلس النواب
لكن الراجل زى العادة ما قبلش التدخل الاجنبى
وكرامة أهله نقحت عليه
لما المحروقين بجاز انجلترا وفرنسا
تدخلوا فى شئون مجلس النواب المصرى
وطلبوا عدم استحقاقه مناقشة الميزانية
فاستقال فى فبراير 1882
وبعدين استقال مرة تانية واخيرة 1884
لما انجلترا حاولت تجبر مصر
على التخلى عن السودان بعد الثورة المهدية
باريت نتابع السياسة المصرية السودانية اخبارها ايه الله يكرمكم
من أول مصر والسودان هته واحده
لغاية ماابراهيم سعده كان بيحرض الريس على ضرب السودان
الاجمل ان شريف فى كل مرة كان بيتولى فيها الوزارة
كان بيصر على النظام الدستورى
وهو اللى انشأ مجلس شورى النواب فى عهد اسماعيل
لا ودستوره كان بينص على مبدأمسئولية الوزارة أمام مجلس النواب
كلام كبير مش كده؟
المهم
هو زى عائلات كتير وقتها
أاصله تركى ووالده كان قاضى القضاة فى مصر
وبعدين مدته خلصت وسافر الاستانة
ورجع اتعين تانى فى الحجاز فلما عدى على مصر
اللئيم محمد على شاف ابنه معاه
وحس ان الولد ده نبيه فطلب من ابوه انه يكمل تعليمه برعاية محمد على
ده أيام ما كانت مصر بترعى الموهوبين
واتخرج من المدرسة الحربيه وسافر فرنسا
واتجوز بنت سليمان باشا الفرنساوى اللى بنى الجيش لمحمد على
ياترىفى وجه شبه بين محمد شريف وأى مسئول فى مصر ؟
سِؤال عيب جدا حد يساله فى الايام السودة اللى احنا عايشينها دى
كان معكم لقد خلقنا الله احرار ا
أفظع مدرسة تاريخ حصلت فى تاريخ البنى ادمين
أسعار دروس خصوصية لا تقبل المنافسة
11 التعليقات:
لا عجب
الشركات الفاشله لا يستقيل فيها رئيس مجلس الاداره
والموظف الفاشل لا يترك عمله بل يظل به على الدوام ويمكن أن يأتي بواسطه لأبنه لكي يكمل مسيرته
ولهذا فالمسئول والوزير وغيره هم عينه من الناس
انها ثقافه متأصله داخلنا
لا لترك المناصب مهما حدث
يمكن ان يكون ما حدث مع الملط شيء استثنائي - واعتقد انه تقدم بالاستقاله وهو يعلم تماما انها سترفض
كان راجل وطني عنده دم و بيحس
مش زي الأشكال المنحسة بتاعة دلوقت
الا صحيح هو الدرس عندك بكام ؟
:))
لورنس العرب نورت المدونة يافندم--كلامك صح طبعا دى ثقافة تأصلت جوانا من زمان ------بس انت بجد توهتنى من اوتوبيس لميكروباص لتوك توك ده انت لورنس يعنى الامبراطورية التى لا تغرب عنها الشمس فهمنى طيب؟
مهندس مصرى اهلا بيك يافندم شرفتنى بس سِال محرج هو انت جيت امتى اصل انا كنت لسه فى مدونتك ولفيت لفة صغيرة كده لقيت تعليقك منور مدونتى ---ياريت تكون جيت الاول مع انها مش منطقية -----------ثانيا انا هاموت واكلم حد فى الموضوع ده انا كتبت البوست وتانى يوم بدور على تفاصيل الخبر مش لاقياه فى اىمكان لدرجة انى شكيت فى نفسى بس هو اكيد اليوم السابع بيشتغلنى مش معقول حالتى تكون اتدهور ت كده-------ثالثا لو قلت لك الدرس بكام هصعب عليك وهتصعب عليا نفسى بلاش احسن-------شرفتنى يافندم يجد والله من غير مجاملة انا سعيدة جدا ان التدوين خلانى اتعرف على شخصيات وطنية وفاعلة زيك وحبيبتى نوارة واحمد سعيد وحنا السكران وناس كتير جدا بتدونى امل كبير ربنا يوفقكم
للأسف يا فندم أنا جيت التاني مش الأول
:)
بعد ما شفت تعليقك عندي
و لو اني بأشوف تعليقاتك من زمان في مدونات كتير
بس من كترة المدونات اللي بأتابعها على النت و مش ملاحق عليها بقيت قليل قوي لما اشوف مدونات جديدة عن اللي عندي في الريدر
انا اللي اتشرفت بزيارتك لمدونتي و حأدعوكي كالعادة لتصفح البوستات القديمة فيها على مدى سنة و نص فاتت لإني مقتنع إن القديم عندي أحسن من الجديد
:)
و نصيحة بلاش تثقي في اليوم السابع لإن شكلها كده مش مريح
و مواضيعها و خطها التحريري يقلق
و ربنا يكرمك على الكلام الحلو الكبير اللي بتقوليه علينا ده
دا إحنا غلابة
:)
مسمعناش فعلاً عن حد استقال فى البلد دى
وبعدين هوه اللى بيقع على منصب حلو وبن حلال وفيه عربية بتوصله ... يسيبه ليه؟؟
بس أول مره أسمع عن بن شريف ده
شكله راجل كان محترم بجد
ده كفاية عليه موضوع الحقانية ده
Wallah el donia ma fihash Amaaaaan rabbena yostor mn el Gay.
tfaddalo Zoro modawanti ya Gama3a o 2ololi ra2yoko 2eeeeeeeeh;)
tc
زمان ايام محمدشريف كانت مصر زى كمبيوتر ومسطب عليه نسخة اكس بى بروفشنال محترمة اخر اصدار
اما دلوقتى مصر هى هى نفس الكمبيوتر
بس مسطب عليه نسخة 98 وكمان نقصة ملفات ..والصورة مش واضحة ..اصل الصورة بالمقلوب
..بلد ممنوعة فيه الاستقالة ..يبقى انت اكيد اكيد فى مصر
انا زمان كنت بحب التاريخ اصل كنت داخل ادبى بالاكراه بس دلوقتى قناة الجزيرة كرهتنى فيه
وشكلنا هنرجع نحن تانى لايام درس التاريخ على يدك
وشكرا على الدرس الجميل
sweet jeje اهلا بيك نورتينى انا حاولت والله وسلت لك تعليق فى مدونتك بس الظاهر كان فى مشكلة فانا ماشفتوش عموما انا نفسى اقولك النبى عربى
دكتور ياسر والله وماليك عليا حلفان انا زرت مدونتك وعجبنى جدا موضوع طوابير العيش وكتبت لك مرتين عن حكاياتى المريرة مع الطابور بس انا متأكده المره دى ان العيب منى لانى مقدرتش انشر تعليقى ادعيلى الله يكرمك اعرف اتعامل مع الكمبيوتر كويس شرفتنى يافندم واتمنى ما تكونش اخر مرة
well ازيك يا باشاايه اخبار الكشاكيل؟ الظاهر انك كنت طالب شقى وبعدين الدروس اجبارى الايام دى او انت عارف ايه اللى ممكن بحصل من اعمال سنة لضرب لتعقيد ل------علىفكرة عجبتنى اوى حكاية نسخ الويندوز بما انى بيل جيتس عصرى واوانى زى ماانت شايف
إرسال تعليق