5 فصول
كل فصل40 طالبة
كل 15 يوم لازم أعمل تقرير مفصل فى منتهى الخطورة يشبه تقارير الاطباء عن حالة المرضى
التقرير لا بد أن يوضح مستوى الطالبة فى الاسئلة الشفوية والاداءات التحريرية التشخيصية
والنشاط المصاحب للمادة الدراسية
وأى قرار وزارى يصدر لازم نسخة منه تكون فى دفتر تحضيرى
والمدرس المعترض سيرمى به فى قفص للاسود الجائعة
هل المطلوب منى أفهم القرار الوزارى وانفذه
ولا أحفظه كورق فى دفتر التحضير
لا اجابة
ايضا
مطلوب منك يامدرس منك ليه
دفتر درجات ودفتر غياب
ودفتر متابعة طالبات ضعيفات ودفتر متابعة طالبات موهوبات
ودفتر لنشاط المادة
ودفتر لمتابعة كراسات الطالبات فى فصول زملائك
وكشف مسجل فيه تقديرات الاداءات والانشطة التشخيصية
وكشف تانى تسجل فيه درجات الانشطة والاداءات التقويمية
ده غير دفتر تحضير سيادتك
ولازم تتابع كراسات البنات
وفى نشاط لازم تتأكد انه اتنفذ بعد كل حصة
والخرائط
ماينفعش تكون مدرس دراسات اجتماعية ومفيش خرائط فى كراساتهم
طيب ترسم الطالبة بنفسها ؟
ممنوع يامدرس
مسموح فقط انها تستخدم ورق شفاف وتنقل خرائط كتاب المدرسة
خرائط الكتاب مش واضحة ومنقولة من الاطلس
امتعاض واستهجان واستنكار
أنا مش هقدر انفذ ده وأكرره فى الفترة البسيطة دى
لا طبعا تقدروا فى وقت كبير جدا تشتغلوا فيه
أنا وظيفتى الاصلية مدرس وعندى منهج ومهارات أنميها وقيم أغرسها
لا اجابة....................
ملف الانجاز ده فاشل والتقرير ده صعب جدا نعمله
ثورة عارمة وغضب هادر وتهديدات تنهال علينا ورعب لابد ان يجتاحنا من الوزير المرعب الذى لن يسمح ولن يتوانى ولن................
مش عارفة لن ايه تانى
المهم انى فهمت انه يأكل خروفين على العشاء
طيب
نقترح طريقة نتابع بيها الطالبات ونوصل المتابعة لولى الامر
بس ماتكونش دوشة وضياع وقت زى دى
احنا مش جايين نتناقش
لان دى تعليمات عليا
مين قال التعليمات دى
القرار 219
أنا أخدت تدريب على القرار ده ومافيهوش الكلام اللى حضرتك قلته
نظرة ساهمة ورد بكلام غير مفهوم
يافندم أنا دربت على القرار ده والقرار ماطلبش كده
بالعكس القرار ده من القرارات القليلة اللى فيها رغبة فى الاصلاح
برضه نظرات ساهمة ورد بكلام غير مفهوم
يافندم ليه التعامل معانا بالطريقة دى ماينفعش كده
أهم حاجة تقوى الله سبحانه وتعالى واننا نشتغل بضمير ونعتبر العيال دول ولادنا علشان ربنا يبارك لكم فى رزقكم وعيالكم وفلوسكم
ايه يعنى الفلوس
ياما ناس عندها فلوس وجالها امراض معرفتش تعالجها او ولادها مش متفوقين
يافندم ونعم بالله ماقلناش حاجة جعلنا الله واياك من المتقين
بس طلباتكم كتير جدا وكل يوم والتانى ييجى حد المدرسة يطلب طلبات مالهاش لازمة غير انها عكس اللى طلبه المتابع اللى قبله وبعدين دول200 طالبة انا مسئول عنهم انفذ الطلبات دى كلها ازاى
وبعدين ده الريس نفسه بيسافر بره لما يحب يتعالج
الجملة الاخيرة دى بتقال همسا
ياجماعة انتم مكبرين الموضوع الحكاية كلها ورق
ظبطوا ورقكم ومحدش هيكلمكم
انا متعاطف معاكم وكنت مدرس فى يوم من الايام وفاهم كل كلامكم
أهم حاجة لما يوصلك متابع غريب تكونوا ظبطتم ورقكم
فى ابتسامة خبيثة ورخمة وصفراء وبايخة تصاحب كلمة ضبطوا ورقكم
مش عارفة كان لازمته ايه الكلام عن تقوى الله لما الحكاية انى أكون شاطرة فى الكروته
ده جزء من حوار متكرر ودائم مع كل متابع بيوصل المدرسة حاليا
عرابى باشا
سامحنى لن أستطيع ان أكمل حاليا لماذا كنت دائما فى قلبى
لكن
الن تأتى مرة أخرى لتقول لهم لقد خلقنا الله أحرارا
وهل مازلت مصرا أننا لن نستعبد بعد يومك الخالد
لا أظن ياسيدى
24 التعليقات:
في أوربا والدول المتقدمه فيه مساعد للمدرس
أصل المدرس مش سوبر مان عشان يعمل كل ده لعدد 200 طالب
ولي عوده
فعلا يعني
ازاي هتتابعي العدد دا كله
مع تصنيفه الموهوبات عاليمين والضعيفات عالشمال والنص نص في النص :)
فعلا يعني مش سوبر مان
والله حجات مماثلة جدا بردو بتحصلنا
ربنا يصلح الأحوال
دمتِ بخير حفيدة عرابي
ربنا يعينك يا عرابية بجد
تعرفى بتوع الكليات عنهم نفس الدوشة ديه بمسمى الجودة :-) اسألى دكتورة ستيتة عنها :-(((
كله ورق و خلاص
و مدام الورق بيقول كله تمام يبقى كله تمام :-((((
الحقيقة حاجة ثانية :-((
ممكن تستعينوا بدفتر التموين الكبير ده بدل كل الدفاتر دي كلها ... اللي اصدر القرار ده شكله مستورد دفاتر :)
احياناً بحس ان اللي بياخد القرارات دي هو شخص عنده عاهات نفسية معينة يريد الانتقام من البشر لأنه بقرة :)
كان الله في العون :)
لورنس العرب
أهلا بحضرتك
حلوة حكاية أوربا والدول المتقدمة:)
فى عرف وزارتنا سوبر مان وسوبر وومن كمان
فى انتظار العودة
هبة النيل
أهلا بك
لا دى حاجة سهلة جدا
مادام الاساتذة فى الادارةقرروا يبقى احنا نقدر بس مش عارفين قدراتنا الحقيقية
دى عالم ....
ولا بلاش
الطيب أحسن
تحياتى لك
واندتى
وحشتينى ياسواحة
ووحشتنى عرابية
أنا قرأت الموضوع فعلا عند دكتورة ستيتة
كلنا فى الهم شرق ياحبيبتى
ربنا يعين ويقوينا
استاذ تامر على
أهلا بحضرتك
دايما اقتراحات حضرتك سديدة
عجبتنى حكاية دفتر التموين الكبير:)
المشكلة الجديدة مكانتش فى الدفاتر ده ابتلاء ربنا من زمان
لكن انى اعمل تقرير لكل طالبة على حدة فى ملف انجازها كل اسبوعين ده كان كتير بجد
بس انا قلت بعد الشخص الغريب ده مامشى احاول اقنع المديرة لانها كانت موافقاه على كلامه فى حضوره
لقيتها بصراحة بتقولى تقرير ايه يابنتى طيب انت معاك 5 فصول
مدرسين الحاسب الالى والتربية الفنية
معاهم 12 فصل
يعملوه ازاى
سيبك منه
وقد كان
بس تخيل حضرتك مدرس معاه 12 فصل
ومواد محتاجة متابعة وتوجيه وشغل عملى
هما اقتنعوا ينتحروا خلاص
تحياتى لحضرتك
والله يابنت عرابى
باشا ياحبيبتى من
دا عندنا فى الطب
والطبطبة نفس الكلام
وتقارير وتشخيص وأصل
وصورة ومتابعة وكلام كتير
والمهم ظبطوا ورقكوا والأ
الويل والثبور وعظائم الأمور!
دكتورةnorahaty
عاملةايه ياجميل
عارفة انا افتكرتك وهو بيتكلم لانه قالنا ايه يعنى ما الطبيب لازم يكتب تقرير مفصل عن حالة كل مريض
وانا رديت عليه ان الطبيب معندوش 200 مريض كل 15 يوم
طبعا ماردش على بس الظاهر ان الطبيب عنده اكتر من كده فى مستشفيات المحروسة
ربنا يقوينا جميعا
عاااااااااااااااااااادي
ده نموذج مثالي للقرار الذي يتخذه المسئولين امام رؤسائهم لاظهار ان( هناك شغل) بينما القرار منفصل عن الواقع يخاطب اشخاصا افتراضيين
انصحك دوما ان تتعاملي مع الأمر ببرود افتراضي لأن ايا من هذا زوبعة وتذهب لحالها
تحياتي
احنا بلد الورق
وفوت علينا بكره ياسيد
ااااه من الروتين الليخ خنقنا من عيشتنا ومطفيش على البلد استثمارات بمليارات الدولارات في كل المجالات
لو كان الروتين رجلا لقتلته
بس الغريب بقى لما المليارات بتيجي تطلع وتهرب من البلد لبرا البلد بيكون الروتين محترم وفي حاله وملوش دعوه بحد
لا دا التعليم بتاعنا بخير ان شاء الله
خصوصا في عهد الوزير ابن الوزير!!!
ربنا يعينك على هذه الأشغال الشاقه
تقبلي مروري وتحيتي
تايه فى وسط البلد
أهلا بحضرتك
شكرا جزيلا على النصيحة
أنا محتاجة فعلا حد ينصحنى بالبرود الافتراضى
يارب الزوبعة تروح لحالها بسرعة
ويتأخروا شوية قبل الزوبعة القادمة
تحياتى لحضرتك
قلم رصاص
أهلا بحضرتك
اللى يضايق يافندم انهم بيتكلموا فى جودة وابداع
وانهيار روتين
عموما اسوء متابعة بتجيلنا بتكون من الادارة
مش بيفهموا فى أى حاجة
أما الوزارة بيفهموا حقيقى
لكنبيعملوا نفسهم مش فاهمين:)
تحياتى لحضرتك
السلام عليكم
واضح أن المتابع مش مقتنع أصلاً بكل ما يطلبه وأهو بينفذ عليكِ التعليمات وخلاص وكده بيرضى ضميره بتظبيط الورق
فظبطى له الورق وخلاص
ما إحنا بلد تظبيط ومنظره وخلاص !!!
لحد ربنا ما يفرجها
.. مش عندك تلاجه أبقى حطى أعصابك فيها كل يوم ساعه وخلاص !!!
ودمتِ بخير حال
أنا شايف إن النظام دي كويس جدا على فكرة
و المفروض يبقى هو ده شكل العملية التعليمية بجد
بس قبل ما نطبق النظام ده
محتاجين حاجة بسيطة خالص
على طريقة انسف حمامك القديم
يعني ما تجيش تقولي إنك عاوز تحقق معايير الجودة
و كل فصل فيه أربعين خمسين طالب
و كل خمس فصول مسئول عنهم مدرس واحد
و كل مدرسة منظرها يقطع الخميرة من البيت
و يجيب كلاكيع نفسوية للمدرسين قبل الطلبة
نطبق معايير الجودة أوكيه ماشي
بس نهتم بشكل المدارس و نظافتها
الفصل ما يزيدش بأي حال من الأحوال عن عشرين طالب
كل مدرس مسئول عن فصل واحد بس .. بالكتير قوي اتنين
و بالتوازي مع ده كله نزل مناهج تحبب المدرسين في مهنتهم و تحبب الطلبة في العلم
شوية حاجات كده يبدو انها معدومة الإمكان في الظروف الحالية
بس السلم بيتطلع على درجات
ماينفعش ننط على الدرجة العاشرة قبل ما نمر على اللي قبلها
و إلا هنقع و تتكسر رقبتنا
مش كده ولا إيه ؟ :)
آه صحيح بالمناسبة
بأحيي حضرتك على ما تتمتعين بيه من صبر و تؤدة للدرجة اللي خلتك تقرأي البوست بتاعي كله .. لأ و تعلقي كمان
ده أنا ما عملتهاش :)
و بالمسبة للدكتور محمد سعيد رمضان البوطي
فأنا جنبه صفر على الشمال
أطلع إيه أنا علشان أتضايق منه
أنا بس كنت بأدعيله بالمغفرة
لأن له - بتوفيق ربنا و مشيئته - فضل كبير عليا
بكتابه البديع " كبرى اليقينيات الكونية "
غفر الله له
يلا سلام
نيجرو باشا
والله يابنى تستاهل تبقى خبير تربوى
ووزير تعليم
هو ده بالظبط اللى احنا بقوله
فكرة ملف الانجاز
كفكرة بس جميلة جدا
وانك تكون متابع بنظام للطالبات الضعيفات والمتفوقات والموهوبات
وتعمل برنامج لكل فئة فيهم
دى كان بيعملها مدرسينا زمان من غير كلام عن الجوده
لكن منهج بحارب علشان يخلص
مجرد انى اشرح بس وأوجه كام سؤال فى الحصة وخلاص على كده
مع ال5 فصول والتوهان اللى بكون فيه
طيب أقولك على حاجات فاشلة بعملها
مرة بنت سألتنى فى اخر التيرم التانى
عن الثورة العرابية
قلت لها بس ده ياحبيبتى كانت التيرم اللى فات
مهى الدراسة كانت اول فبراير
واول حاجة درستها الثورة العرابية
وبلاد تشيلنى وبلاد تحطنى لغاية ماوصلت لما بعد معاهدة السلام
والله افتكرتها التيرم اللى فات
هل ده معناه انى براجع
انى متابعة الطالبات
استحالة
لكن تطبق الدوشة دى فى 5 فصول بمناهجهم بملفاتهم بباباغنوجهم بسلطاتهم
كل اللى بيسيطر على حضرتك شعور فظيع بالفشل
ودايما على بالك موظف الارشيف العتيد
اللى قدامه اكوام من الملفات مش بيخلص منها حاجة
وتروح البيت ومعاك شنطين تظبط ملفاتهم
حريصة فى البداية أشتغل بضمير فى الملفات ولما الدنيا تبوظ على الاخر ابدأ النصب والتزوير
هيييييه دنيا
البوست بتاعك جميل لدرجة انى بعد ما قرأته
كل شوية كنت أدخل المدونة أقرأ شوية وأمشى
الفكرة والاسلوب أجمل من بعض
وكمان الصدق اللى خلق الكلام ده مالوش حل
فضل شاغلنى طول النهار لدرجة انى حلمت بالوول بس على طريقتى
بس برضه مش فاهمة حاجة فى الفيس بوك ده
ربنا يكون فى عونك لو وصلت لهنا
تحياتى لحضرتك
واحد من العمال
وعليكم السلام ورحمة الله وبركاته
أهلا بحضرتك
انا من فترة طويلة بحاول أدخل مدونة حضرتك
بس مش بتحمل كلها معايا
مش عارفة ليه
تقريبا ده اللى هيحصل موضوع التلاجة
وتظبيط الورق
الاتنين بيكلموا بعض
لكن تظبيط ورق واحنا بناكل فى نفسنا
ماينفعش
انا فاكرة مرة مجموعة المعارضة كانت بتكلم متابع عن ملف الانجاز
وقلنا كلمتنا الخالدة اننا مش عارفين نشرح فى الفصل منه
مدرس زميلنا حب يهدى الجو شوية
قال لنا
اعملوا ملف الانجاز فى الحصص زى ماالاستاذ عايز
واشرحوا فى الدرس
تحياتى لحضرتك
فعلا هى فى النهايه
ورق متظبط وبس
لسه ما فهمتهاش ولا إيه
حكومه كل إلى يهمها ورق سليم وبس
سيبك أنت من زى ولادنا والكلام إلى بيضيع فى أخر القاعده ده
ربنا يرحمنا ويسترها على الأجيال الجايه
ايييييييييه
حيلك حيلك
دى كلها دفاتر ده اكتر من دفاتر الكلية ذات نفسها
دى يمكن اكتر من دفاتر العيال اللى عندك
معلش ياتيمو ماهو اللى بقى فى المدعوئة اللى اسمها وزراة التربية والتعليم
لازم يتقرف ويتاكل على قفاه ويطهق
ويغنى ريكو زهقان طهقان مضايق
وخصوصا حد زيك بقى بيحاول انه يراعى ربنا فى كل تصرفاته
بيلاقى كل اللى حوالى مش مشجعينه على عمل اى حاجة حلوة
ربنا يثبتك يا تيمو
ويبعد عنك اى كرب
دومتى بكل ود
مرايتى
أهلا بحضرتك
هههههههههه
ساعات بفهمها وساعات مش بتيجى معايا
احيانا سذاجتى بتصور لى انهم عايزين يصلحوا
بس هما الله يكرمهم بيفكرونى بنفسهم بسرعة
تحياتى لحضرتك
ست الضاكتورة
ازيك ياجميل
انا عايزة أقولك على منظرنا بيبقى ايه لما ييجى متابع
بنفكر فى كل حاجة الا الشرح
وبنفكر بعضنا بكل حاجة الا الشرح برضه
خدى كذا واعملى كذا
الحاجات بتاعة تضييع الوقت
ولو المتابعة موجودة طول النهار
بنتعطل
صدقينى والله فى عدم وجودهم بنشتغل احسن
لان طلباتهم أجارك الله
وكل واحد بيقول غير التانى
ربنا يهدى
سلام ياقمر
ربنا يكون في عونك
دي ناس بتهرج
و الوزير واضح انه بيستهبل و مش فاهم أي حاجة في البتنجان
إعملي اللي يخلص ضميرك من ربنا و ابقى ستفي لهم شوية ورق يسد حنكهم
مهندس مصرى
أهلا بحضرتك
بنحاول والله نعمل طلباتهم بس أعصابنا بايظة
عارف حضرتك لازم نكون فى المدرسة قبل الطابور
النهارده خرجت متاخرة شوية
ركبت تاكسى والمدرسة قريبة
ومكانش معايا ولا معاه فكة
دخلت المدرسة بسرعة علشان أمضى لقيت الوكيلة بتقولى بسرعة
انت مش عارفة ان الوزير عندنا
انا اتوترت جدا
وبقيت مش عارفة امضى ولا احاول افك الفلوس واروح للتاكسى اللى واقف بره
ولا افتح دفاترى واقدح زناد فكرى ايه اللى ناقصنى
مع انى معنديش الحصة الاولى
فعلا غصب عننا بنتوتر جدا
لانك مهما كنت جاهز
تلاقى حاجات غريبة جدا بتطلب منك
وتتحاسب على عدم وجودها
يعنى انا بتوترى ده
كنت محضرة دروسى
ودفاترى جاهزة
وكشاكيل البنات لقيتها كلها مصححة
وانا نسيت انى صححتهم:)
ومع ذلك
لا نأمن شرهم
ووجود الوزير طلع اشاعة
معلش على الرغى
شكرا لدعم حضرتك
إرسال تعليق