اسلمى يا مصر اننى الفدا
أغنية جميلة جدا كنا بنغنيها فى طابور المدرسة زمان
ومش الغنوة دى بس كنا بنغنى
ياأحلى اسم فى الوجود
وخلى السلاح صاحى
وأغنية ماسمعتهاش غير فى المدرسة بتقول
ياعرب والله حرام دمكم يروح هدر
عيشوا فى محبة وسلام ده انتو فى الدنيا بشر
مش حرام الدم سايل
كل واحد فيكم شايل بندقية لجل أخوه
ده غير أغانى عبدالحليم الوطنية
اللى أحيانا كانت بتتذاع فى الراديو
أو باسمعها على الكاسيت
وكانت النتيجة المنطقية لده انى كنت ساعة تحية العلم
واخده الموضوع جد قوى
لدرجة انى والله وأنا فى خامسة ابتدائى
الفت شعر عن وعد بلفور
لكن دلوقت الوضع كالاتى
مافيش أغنية وطنية مهما كانت جميلة
بتدخل دماغى
ده غير الطلبة العباقرة بتوعى
ماكانش حد فيهم يعرف حاجة عن فلسطين
لولا ربنا يديله على قد نيته شارون
لولا دخوله المسجد الاقصى وإستشهاد محمد الدرة
كان زمان طلبة مصر لسه بيسألوا
هو لسه اسرائيل محتلة فلسطين لغاية دلوقت ؟
قوم ايه....؟
أنا عندى سؤال عبقرى
ليه الاجيال الجديدة مش لاسمح الله ماعندهاش انتماء
دى ماتعرفش مصر أصلا
عايزين تصدعوا من كلامى
طيب
بالصلاة على النبى كده
فين لاسمح الله بابتهم ومامتهم
يا اما بيشتغلوا ولقمة العيش فرماهم
يااما بيتخانقوا وبيفشوا غلهم فى العيال
يابيتفرجوا على مسلسلات تافهة فى التليفزيون
يا اما هما كمان مايعرفوش حاجة عن مصر
فين لاسمح الله المدرسة
حيث غرس الانتماء وقم للمعلم
لااااااااااااااااااااا
أنا مش هتكلم
أنا واحدة ناجحة فى الكادر ومستنية الفلوس
لكن بجد فى مدرسين كتير عندهم استعداد يعملوا حاجة كويسة
بس دى بتبقى مجهودات شخصية
والحمد لله انا باحس ان الوزارة بعمايلها معانا
مش عايزانا نتكلم فى حاجة مع الطلبة
ازاااااااااااااااااااااااااااااااااااااااى؟
مناهج مكدسة وبايخة تكره الطالب فى نفسه
مش فى بلده بس
مثلا منهج سنة 3اعدادى التاريخ التيرم الثانى
منهج شهر مارس مش يخلص شرح بس
بما يرضى الله قبل نصف ابريل
بتكلم من أول ثورة 1919 لغاية العدوان الثلاثى
احنا المدرسين بنقول أحد أحد
لمابيخلص
ده غير الاصرار الغريب من واضعى المنهج
على حذف أوتمييع الاجزاء المهمة فى المنهج
اللى بجد ممكن تبنى حاجات مهمة جوه الطلاب
مثلا حد يقرأ منهج تانية اعدادى
ويقولى حس بأيه بعد دراسة السيرة النبوية الشريفة
ولا الفتنة فى أواخر عهد عثمان
ولا الصراع بين على ومعاوية
ولا صلاح الدين والصليبين
وياريت حد يقنعنى منهج 3 اعدادى اللى مليان دش
ليه يعنى يتشطروا بالذات على سياسة محمد على الخارجية
ويحذفوها وليه مايفضلش فى ذهن الطلاب
غير ان محمد على اللئيم ضحك على زعماء الشعب
وانفرد بالحكم
وبعد كده قدر يبنى مصر الحديثة من غير صداع المعارضة
وليه أفهم الطلاب فى سنة تانية
اننا فشلنا فى فتح القسطنطينية 3مرات
وفى سنة تالتة أحذف من المنهج اسم السلطان محمد الفاتح
اللى فتحها بخطط عبقرية
موضوع كبير مش كده؟
بس بجد أنا اتضايقت
أكمل فى مرة تانية ان شاء الله
8 التعليقات:
ياسلام عليك ايه الجمال ده نفسي اقول زيك وخاصة ان احنا زمااااااايل بس مع اختلاف التخصص طبعا انا بعمل اعمال واقفلها وانت عليك تفكيها وربنا يعينك بقى ومستنيه الياقي
ويجعله عااااااااااامر
للأسف التعليم باااااااااااظ فى مصر
و بقى دون المستوى فعلا
و الكلام يا اما بيتعاد و بيتزاد
يا اما بيكون عكس بعضه
المناهج بايظة فعلا
المهم تحاولى انتى تحققى الصح و المظبوط و تشرحى بالأسلوب اللى شايفاه مجدى
ضياع الأنتماء له اسباب كتير لكن فيما يخص الزاوية التي ركزتي عليها
اعتقد ان اللسبب في المدرس لأنه هو الذي يقوم بتشكيل الوعي عند الطلبة في مرحلة التكوين
وهنا دوره اهم من الأسرة
في زمنا الحالي المدرس مطحون مثل باقي الشعب و لا فاضي يشكل وعي او يناقش الطلبة هو عايز يعدي الشهر ويحسب مرتبه مع الدرس الخصوصي علشان يغطي المصاريف
زائد انه بدا يفقد الأنتماء هو كمان
يعني المشكلة عويصة
تحياتي
علي فكرة دي اول مرة ادخل عندك بس بحد دماغك عجبتني اوي بالذات الموضوع ده لأن انا كمان مهتم بيه اوي اليومين دول فعلا انا كمان بدأت الاحظ ان الوزارة عايزة ترسخ مبادئ معينة في مخ الطالب والمبادئ دي كلها مش مظبوطة ولا حتي فيها اي حاجة صح
حتي موضوع الرؤية والرسالة والكلام الفارغ ده ليه مغزي غير معلوم
الموضوع فعلا كبير ومش ح ينفع يتناقش كدة ده عايز وقت كبير
ربنا معاكي
استاذ طارق الا نتماء مسؤلية جهات عديدة وللمدرس دور كبير ولكن ياسيدى للاسرة دور اكبر لما الطفل يلاقى والده كل شوية بيسب فى البلد واحوالها ولما ايسمع الكلمة المأثورة عند المصريين يارب تولع يعمل ايه االمدرس فى وضع زى ده حتى لو مش مطحون وبعدين انا لسه عندى كلام كتير فى الموضوع ده مثلا يعنى دور الدولة واجهزة الاعلام اللى بتقوم بدور عكسى
استاذ تامر سعدت بمرورك وسعدت جدا لما قريت عنوان مدونتك (ضد الحكومة) لا بجد يجنن بس لسه حقيقى لم اقرأ المدونة اما بالنسبة للوزارة ومجهوداتها فانا يافندم متاكدة من كلامى لانى من كام سنة كنت فى تدريب فاشل زى العادة فى الفيديو كونفرنس وقابلنا تقريبا علشان مش فاكرة مستشار الدراسات فى الوزارة ووجهناله اتهام ان حذف سياسة محمد على الخارجية من المنهج ده بطلب من امريكا وكان الكلام كتير ايامهاعن طلبات امريكا من الدول الاسلامية تغيير مناهج التاريخ والدين بعد 11 سبتمبر طبعا الراجل قطع نفسه حلفان امريكا مالهاش دعوة -- امريكا مالهاش دعوة بس طبعا محدش صدقه لانه اولا ماعرفش يجيب سبب مقنع ثانيا لان فى مصلحة اكيدة فى حذف هذا الدرس مع انى مش بحب محمد على لان الدرس ده وغيره بيغرس فى نفوس الطلاب ان مصر ممكن يكون عندها جيش واسطول قوى وممكن تحقق انتصارات كبيرة لان الجيش وقتها كان جنوده مصريين وان الدول الاجنبية أصرت على تحطيم قوة مصر واذلال محمد على علشان مايفكرش يعيد الكرة تانى --------------- ولسه عندى ادلة كتيرة على كلامى فى تدوينة تانية ان شاء الله شكرا يافندم على مرورك وعلى مجاملتك
دكتورة سمر ايه ياعسل الكلام ده كله ؟ بقى السن الجميل ده يفكر يبقى كئيب لا انا مش مصدقة انت اكيد ياجميل بتتدلع بس شوية نورتينى يافندمبس الكلام على التعليم والله بيوجعنى لانى اعرف زمايلى كتير جدا بيشتغلوا فى اجواء صعبة جدا وبيعملوا اللى عليهم ارضاء لله
يا حي يا قيوم برحمتك نستغيث
يا واحد يا احد يا فرد يا صمد
اللهم كن مع اهل غــزة ، اللهم فرج همهم
اللهم عليك بمن ظلمهم من اليهود واعوانهم من العرب
اللهم ايقظ الضمائر الميتة من امتنا
اللهم انت حسبنا ونعم الوكيل
ولا حول ولا قوة الا بالله العلي العظيم
اخرجوا ايها المسلمين اخرجوا من بيوتكم اهتفوا كفى ظلما كفى قتلاً لاهل غزة ، اخرجوا وأشعروا اهل غزة انكم تقفون معهم ، ولو بالكلمة ..
اخرجوا بارك الله فيكم
لا تنسوا اخوانكم في غزة من دعائكم
||..بحـر الدموع..||
إرسال تعليق