وفاة مايكل جاكسون

زعلت جدا النهارده لما سمعت خبر وفاة مايكل جاكسون

أنا عمرى ما سمعته

وكنت دايما بتضايق منه

ومش من هواة الاغانى الاجنبية أبدا

بس كنت بحس انه انسان ضايع

عايز يكون حاجة ومش عارف

كنت بحس ان الحاجات الغريبة اللى بيعملها فى شكله وشعره

مش مجرد انها تقاليع فنانين

لا ده فى رأيى بيعير عن عدم رضاه عن نفسه وعن حياته وعن لونه

وان كل النجاح اللى حققه ده ماكانش كافى انه يخليه يحس بالرضا

اتضايقت جدا لما سمعت عن الشائعات الاخلاقية اللى كانت بتطارده

لكن النهارده لما أجله انتهى

وأنا فاهمه طبعا ان حسابه على الله

واننا ماينفعش نقول ده فى الجنة وده فى النار

حسيت بجد انى حزينة وانى خايفة على نفسى

وانى مش مستعدة اواجه مصير زى مصيره

الايام دى عماله اذاكر كلام كتير مهم جدا

باختصار

ان جوهر ديننا الامر بالمعروف والنهى عن المنكر

لو كان مايكل صادف فى حياته أشخاص بيحبوه بجد

مش مخابيل أو مستفيدين منه

ولو كان عنده استعداد يسمع نصيحة

مش يمكن كانت نهايته تكون أفضل من كده ؟

من فترة كنت بشوف برامج بتتكلم عن ممثلة امريكية اسمها انا نيكول

ماتت تقريبا بسبب جرعات زايدة من الكحول والمخدرات

وكانت حياتها مادة خصبة للشائعات ومجلات الفضايح

مش عارفة ليه بعد ماتجاوزت مشاعر الضيق منها رجعت تعاطفت معاها

حسيت انها مظلومه وضايعة وكانت محتاجة ايد تتمد ليها بالخير

لما ماتت سعاد حسنى الله يرحمها

وكانت الاخبار كلها عن انتحارها

شخصية عزيزة جدا على قلبى قال ماتت كافرة يالا بلاش قرف

أنا مقتنعة طبعا بحكم المنتحر ده مش موضوع للنقاش

بس لفت نظرى نفس الفكرة

الناس اللى حواليها بشر كتير جدا

يااما بيستفيدوا يااما بيشجعوا على الباطل

حتى أقرب الناس ليها

حتى فى ذكرى وفاتها كل سنة مش بيرحموها

بيسترزقوا من وراها

طيب هى سعاد لوكانت عاشت حياة مستقرة

ولقت أب يوجه ويربى كان ده بقى حالها

لو حد قالها فى شبابها ان جمالها مش هيدوم

وان كل المنتفعين دول هيكونوا أول اللى هيدوسوا عليها

مش يمكن كانت اتغيرت؟

عارفين بيخطر على بالى مين كمان

الملك فاروق

مش عارفة أنا مالى النهارده نفسيتى واجعانى ليه

لكن بجد بحس ان فى بشر كتير ليهم حق علينا

حق النصيحة

لما أسمع الكلام عن استبداد فاروق

أو الروايات المشكوك فيها عن سقطاته الاخلاقية

أحس انه بيصعب عليا

اتربى فى بيئة غير مشجعة

أب قاسى وام مقهورة ياما صدقت يتفتح لها الباب

وطلع هو ابن وحيد مدلل

وجد الخيانه من أقرب الناس ليه

كفاية ان والدته اتنصرت وهاجرت

متهيألى ان دى طعنة هتفضل تنزف لحد مايموت

أنا أكيد مش بقصد أخلى مسئولية الناس دى عن حياتهم اللى ضاعت هدر

ولابقول ان حياتى ماشية صح وانى مطمنة على مصيرى

بس أنا حاسة اننا لينا دور لازم نقوم بيه على اد مانقدر

ننصح بعض ونتعلم ده يكون ازاى

علشان ننقذ بعض

أنا بيلفت نظرى وأنا كمان بعمل كده

اننا بندافع عن بعض عصبية مش اكتر

ياريت ده يكون على حق ولله

أنا أعرف ناس كتير أخلاقيا ودينيا ملتزمين جدا

لكن مفيش الامر بالمعروف ده

أنا درست والله الولاء والبراء

واتناقشت فيه كتير مع اساتذتى اللى بكن ليهم كل احترام

أصل أنا كل ماتكلم عن حد مش مسلم أومسلم مختلف معانا فى المذهب

الاقى الناس بتبص لى باستنكار

بيحسسونى ان عقيدتى والعياذ بالله مشكوك فيها

متهيألى تعاطفى مع بنى ادمين ماتوا

من غير ما يتهنوا حسب الظاهر أمامى بالقرب من ربنا سبحانه وتعالى

مش مرتبط بالولاء والبراء لانى منضمتش ليهم

ولا----

ربنا يستر---

أنا بحب جدا الايه الكريمه دى

لعن الذين كفروا من بنى اسرائيل على لسان داود وعيسى بن مريم ذلك بما عصوا وكانوا يعتدون كانوا لا يتناهون عن منكر فعلوه لبئس ماكانوا يفعلون

والاحداث اللى حصلت دى بتفكرنى باية سورة الكهف

قل هل ننبئكم بالاخسرين اعمالا الذين ضل سعيهم فى الحياة الدنيا وهم يحسبون انهم يحسنون صنعا

صدق الله العظيم

اللهم ارحم موتانا واسترنا فوق الارض وتحت الارض ويوم العرض عليك

اللهم لاتجعلنا ممن قلت فيهم

ومن أعرض عن ذكرى فأن له معيشة ضنكا ونحشره يوم القيامة اعمى قال ربى لما حشرتنى أعمى وقد كنت بصيرا قال كذلك اتتك اياتنا فنسيتها فكذلك اليوم تنسى

اللهم ارزقنا الرضا حتى ترضى

اللهم احسن خواتيمنا

وأمتنا على ملة الاسلام