النهاره فى المدرسة حصل موقف بسيط لكن حسيت فيه أنا شريرة اد ايه
كان عندنا ندوة او اجتماع كده حاجة كانت مضايقانى اوى من حركة سوزان مبارك من أجل السلام
جابوا العيال الغلابة اللى لسه بنقول ياهادى معاهم
وقال ايه بيغسلوا دماغهم علشان يغنوا بالسلام احنا بدينا بالسلام
قوم ايه00؟
انا قاعدة مفروسة زى عادتى ربنا يرزقنى بولد ابن مدرسة زميلتنا
رفضوا اشتراكه فى المعسكرعلشان احنا مدرسة بنات
وكمان هو لسه صغير رايح ياحبيبى لسه خامسة ابتدائى
سألته وانا هفرقع ايه رأيك ياحبيبى فى السلام مع اسرائيل ؟
يقول لى انا مش ممكن أبد ا أوافق اعمل سلام معاهم
ده أنا اجيب مسدس واموتهم
ده أنا نفسى أروح غزة وأعمل نفسى اسرائيلى واموت كل الاسرائيلين
ليه ياحبيبى؟
ده انا طبعا عامله نفسى بريئة
وأنا قلبى المغرض بيرقص من الفرحة
يقول لى ياخدوا أرضنا واعمل معاهم سلام ده كفايه اللى عملوه فى غزة
انتهى كلام الشبل
أنا مش هتكلم كتير عن المعاهدة
ناس زى نوارة نجم مثلا قطعوا الدنيا كتابات عنها وعن سابقتها اللعينه كامب ديفيد
انا هتكلم عن انطباعاتى بس
انا شايفة ان السلام ده كان لازم يكون مرحلة فى تاريخنا وتعدى
مانقفش عندها كتير
ماتبقاش استراتيجية لينا
ماينفعش بالعقل كده عدوى يبقى لسه بيقطع فى لحمى
وأستهبل أنا وأقول السلام استراتيجية عربية
المفروض ان ده كان مرحلة مش قادرين فيها ناخد أرضنا كلها بالحرب
فنحاول نرجع الباقى بشوية تنازلات
لكن المفروض ماتهينش الكرامة
أنا ممكن أفهم برغم الكلام الكتير عن ان السادات بلغ امريكا انه مش هيوسع نطاق الهجوم
لكن أنا مش بعتبره خاين
بحس انه يمكن كان بيلعب على كل الحبال
بيحاول يستخدم دهائه حتى لو فلتت منه الحكاية المرة دى
بس قلبى مش مطاوعنى اتهمه بالخيانه
لكن سوزان مبارك ايه اللى يدخلها فى اللعبة دى
وسلام ايه اللى بيعملوا حركات علشانه
امال لو ماكانتش اسرائيل
مش عايزة تلم الدور شويه حتى علشان ماء وجه حبايبها الزعماء العرب
تيجوا على العيال الصغيرين ياظلمة وعايزين تبوظوا مخهم اللى هو بايظ اصلا
انا الحمد لله لما بشرح الدرس ده بعمل حسابى انه ياخد منى حصتين ورا بعض
حصة احفظ فيها البنات منهج الوزارة الرشيدة
والحصة التانية بالعند فى الوزارة الرشيدة برده اقولهم الكلام ده للامتحان بس
واقعد اغرس جواهم افكارى العنصرية الشوفينية 000
هى بتتكتب كده صح؟الشوفينية 000ولا انا غلطانه؟
واقول لما الصهاينة يخرجوا الاول اعمل معاهم سلام
ياأبلة0000ده البنات بيكلمونى
البنات عندنا بيقولوا ياأبلة وجمعها أبل بضم الالف
دول من سنة 48
وايه يعنى انجلترا احتلت مصر 74 سنه وفرنسا بهدلت الجزائر 130 سنه والهند اللى عانت من الاحتلال الانجليزى 300 سنة
أاختم الحصة باغنية فدائى 0000أصلى دقة قديمة
وكمان الاغنية الخالدة
لابد عن يوم محتوم تترد فيه المظالم ابيض على كل مظلوم اسود على كل صهيونى ومطبع
طيب ليه الرغى الكتير ده فى الايام الحر دى ؟
لانى الظاهر بعانى من ضمن امراضى النفسية من انفصام فى الشخصية
وحشتنى المدرسة والشرح فى الفصول
وكمان حبيت أقدم اعتذار لروح السادات وروح يسرى الجمل
هو ينفع اقدم لروح الجمل اعتذار ؟
ماعلينا
أنا بعتذر لهم من كل قلبى انى بحاول بكل جوارحى أضيع الاثر اللى بيحاولوا يعملوه
الرئيس السادات
أنت بطل الحرب
الكلام ده على راسى
حتى لو فى أخطاء غبية اتعملت فى الحرب
لكن السلام 00000000000000000000سامحنى
19 التعليقات:
بجد بوست جميل ياابله
والمفروض ان السلام خلاص خلص من يوم مافكوا ونقضوا عهد السلام
لكن احنا مصرين على السلام
وانا معاكى فعلا ان احنا لازمماننساش ان السادات واصحابه وجنوده صاحب نصر 73 بعد الله سبحانه وتعالى
تحياتى
بجد احلى حصص كانت عندى فى المدريه هى التاريخ
احنا كلنا تاريخ
لكن نسينا خلاص واللى اتقدم الناس اللى ماعندهاش تاريخ
ياترى المشكله فينا ولا لان عندنا تاريخ
معلش ممكن سؤال فى المدونه التاريخيه دي
مين اللى لازم يطعم عشر مساكين وليه
والحاجه التانيه ممكن تكتبيلنا بوستات عن كل واحد من الشخصيات اللى حضرتك حطاها على الجنب
جزاكى الله خيرا
جيجى
نورتينى ياحبيبتى وشرفتينى
سيبك من الكلام النكد بتاع السلام ده انا كنت سعيدة جدا النهارده
ولد صغير وعسوله واخوه ماشاء الله لاقوة الابالله يقولوا
ازاى مصر تشترى سلاح من امريكا لازم السلاح يبقى عندناعلشان مايدوناش سلاح فاسد
كنت حاسة انى فرحانه فى كل واحد فكر يخرب دماغ العيال السكر دول
ملاحظة سريعة بيتهم ماشاء الله فى منتهى الالتزام ربنا يكرمهم ويزيدهم بصيرة
جيجى
عرابى ياستى هو اللى لازم يطعم عشرة مساكين
هى الحكاية كانت واضحة فى اول قالب للمدونة
بصى ياستى هو مش حبيب قلبى عرابى قال والله الذى لااله الاهو اننا سوف لن نورث ولن نستعبد بعد اليوم
انا قريت فى جورنال من كام سنة مقالة جميلة مش فاكرة لمين للاسف قال فيها ان عرابى لازم لو عايش فى ايامنايصوم ثلاثة ايام تكفير لقسمه لاننا بنورث وبنستعبد
قوم ايه ----جالى تعليق ان كفارة اليمين شرعا لازم تكون الاول اطعام عشرة مساكين وفى حالة عدم الاستطاعة يبقى يصوم الثلاثة ايام
انا اسفة انى موضحتش الكلام ده
بالنسبة للطلب التانى
علم وجارى التنفيذ ياجميل
عارفه الاطفال طول ماهما على فطرتهم النقيه بيقولوا كلام احسن من اكبر سياسيين
ييجوا بقه يكبروا وخصوصا اذا الاهل ماخدوش بالهم منهم قوي كل الافكار دى تنحرف
حقيقى
ماشاء لاقوه الا بالله على الطفل ده ربنا يحميه ويخليه لاهله ويخلى كل الاطفال يارب لاهاليهم والاهالى تاخد بالهم قوى من اولادهم
على فكره بجد انتى سكر
كلامك مظبوط ياجميل
مش الرسول عليه الصلاة والسلام بيقول اننا بنولد على الفطرة وان الابوان همااللى بيمجسان او ينصران
مش هتيجى على الوعى السياسى
سيدتى لقد خلقنا الله احرارا
اقرأى تاريخ السادات جيدا ياسيدتى..لتعرفين من هو السادات !!
السادات هو الضابط الوحيد المتهم فى قضية مقتل امين عثمان والذى حصل على البراءه وهو الذى تعاون مع الالمان فى عوامة الراقصه حكمت فهمى ..وهوالذى
ادار ملف اليمن بعد ثورة اليمن 1962 فورط الجيش المصرى فىحرب استمرت لما بعد النكسه .وهوالذى اتصل بكمال ادهم مستشار ملك السعوديه وعملا لحساب
الامريكان ..فى مقابل مرتب سنوى ..وهو
الذى قال عنه كيسنجر فى مذكراته لقد
جلسنا معا كى استطيع ترويض القرد الاسود فوجدته يقفز على حجرى مسلما
لما اقوله.. ولو كان قد طلب من الامريكان انسحاب اليهود من سيناء فى مقابل الغاءه معاهدة التعاون والصداقه1972 مع الروس لفعلنا ..
ولكنه لم يفعل..!!
اقرأى يا سيدتى مذكرات اسماعيل فهمى ومحمد ابراهيم كامل وحافظ اسماعيل ومحمد رياض..واعلمى منالذى يقول لبيجن
انا موافق على كل ماتقوله ..اماهو دور اسامه الباز فى فرملة تنازلات السادات..
ان جميع جواسيس اسرائيل وهم بالمئات لميقدموا لاسرائيل مجتمعين واحد على مائه مما قدمه السادات..
مما سبق هل لازلتى مقتنعه انه ليس بخائن..
اسف للاطاله..
العجوز والبحر
نصائح حضرتك بشأن القراءة جارى تنفيذها ان شاء الله
لكن ده هياخد وقت
انا عايزة اقول لحضرتك انى مكنتش بكتب تاريخ انا بكتب احساسى ومشاعرى حتى انا قلت قلبى مش مطاوعنى
اكيد مفيش حد بيكتب تاريخ هيقول قلبى مش مطاوعنى
انا بكتب اللى نفسى فيه يعنى بتمنى انه يكون مش خاين
وصلت لمرحلة انى بضحك على نفسى ومش عايزة حد يثبت لى انه خاين
اما بالنسبة لامين عثمان
فانا رغم رفضى التام والمطلق لاسلوب الاغتيالات السياسية
لكن بقنع نفسى مع انى مش بدى تبريرات ان الظروف كانت مختلفة وكفاية ان وفاته كانت بسبب اقتناع ناس بنفس الفكرة
وبالنسبة لحكاية الالمان انا سمعت ودى مش معلومة تاريخية علشان مااتحاسبش عليها ان الملك فاروق كان ليه اتصالات بالالمان وان الفترة دى احنا كنا رسميامستقلين وفعليا زى ماحضرتك عارف
علشان كده كان الاتصال بالالمان فى نظر البعض وقتها مع رفضى للاسلوب ده كان فى نظرالبعض وطنية
اما ملف اليمن فاللى سمعته برده انه ماكانش للسادات الدور البارز اوى فى عهد عبد الناصروفى ظل سطوة عبد الحكيم عامر
وموضوع كمال ادهم والمرتب السنوى برده سمعت ان مشايخ الخليج كلهم بما فيهم عبد العزيز ال سعود كان بياخد مرتب من بريطانيا وبعدين امريكا
متهيألى انا مش مضطرة اوضح انى رافضة ده كمان
اللى عايزة اوصله ان التاريخ المعاصر وكمان الحديث على اد مايبان سهل فى دراسته لكنه مثير جدا جدا للجدل لظروف كتيرة واضحة لحضرتك طبعا
فاكيد احنا معندناش حكم قاطع على الاحداث ولو حضرتك عايز رأيى ولا اى فترة من التاريخ
انا اللى اسفة جدا على الاطالة لكن حضرتك طول براحتك
العجوز والبحر
انا اسفة
مش بصدق هنرى كيسنجر حتى لو قال الحقيقة
نقطة كمان بعد اذن حضرتك
انا معرفش السادات خاين ولا لا لكن انا بمشاعر ساذجة جدا بحب حرب اكتوبر وبتمنى من قلبى مايكونش خاين
بتمنى
عمال أبحث عن مكان أعلق فيه مش عارف لغاية ما لقيت حته صغيره واكتشفت انها رابط التعليق
بقالي يومين على كده
............................
السؤال الأهم
انتم هاجمتم الرجل ولم تقولوا البدائل للحصول على الأرض
اليهود ما كانوا هايخرجوا من سيناء لولا هذه الاتفاقيه
الرجل لم يذهب لمعاهدة السلام من أجل سواد عيونهم
ولكن كان عنده مبدأ هام وهو أهمية الحصول على الأرض
انظري إلى الآخرين وما فعلوا
البلاد العربية كلها قاطعتنا وقتها
انظري إلى سوريا ماذا فعلت؟
يافرحتي بانهم قالوا لا للسلام
ارضهم محتله حتى الآن
لا وشوفي الخيبه- حتى لم يعرفوا كيف يطوروا جيشهم للحصول على ارضهم
وكانت معاهدة السلام دي اكبر مصلحه لفلسطين
لأن لو كنا نحن مقاطعين اليهود ما كان هناك وسيط بين فلسطين واليهود
المحصلة النهائي من هذه الأمور ان الأرض معنا
اعتقد ان الأرض أغلى بكثير من ذهاب السادات لإسرائيل
يوجد آخرين يتغنون بجمال عبد الناصر
وهذا على الرغم من انه أضاع سيناء والمه العربيه كلها
وأسمعهم يقولوا ان شرف الأمه في جمال عبد الناصر
ويقولوا على السادات أنه خائن!!
وهذا من غرائب الزمان
الناس تقوم بشتم الرجل الذي كسب الحرب واعاد لنا الأرض بينما يمجدون رجل أضاع الأرض ولا ادري كيف هذا؟؟؟
لورنس العرب
اهلا بيك يافندم
هو فعلا قالب المدونة غريب شوية ومليان مشاكل
ربنا يسهل استحمله لغاية ماارتاح من تعبى فى اللينكات
الاجابة على السؤال الاهم
تصدق بالله
انا مقتنعة جدا بذكاء الراجل ده وشايفه من وجهة نظرى المتواضعة ومالهاش قيمة عند ربنا ان الحسنات اللى خدها من اكتوبر تغفر له بأذن الله البلاوى التانية اللى عملها واذا كانوا بيقولوا على عبد الناصر كاريزما وده ممثل وكده انا شايفة انه لايخلو من الكاريزما وصفات السياسى الناجح اللى لازم يبقى لئيم
ومقتنعة اكتر ان الارض لظروفنا وقتها ماكانش ينفع تيجى بالحرب بس
السلام كان ضرورى لان ظروفنا كانت بتمنعنا ننتصر الانتصار الساحق اللى يخلينا نفرض شروطنا
بس عارف الحديث بتاع من سن سنه حسنه
هو ده اللى اقصده العالم صدقت
انا عندى شعور ان السادات فى اواخر ايامه كان مصدق ان ممكن يكون فى سلام مع اسرائيل
ده اللى مزعلنى منه
زى ماقلت فى البوست ان السلام معاهم لازم يكون مرحلة وبس
لكن مش نغنى كل يوم ليه
مش نحفظ العيال فى المدارس مزايا السلام بالنسبة للعرب ولمصر واننا لو عملنا سلام هنوفر نفقات الحرب
الكلام ده ماينفعش يتقال عمال على بطال
لازم نربى العيال يبقى عندهم كرامه
الاطفال فى عهد النبى كانوا بيتسابقوا علشان النبى صلى الله عليه وسلم يوافق يدخلهم المعارك
وبعدين أنا ماقلتش عليه خاين
مع انى شايفة انه كان ممكن يكون انصح من كده ويقلل التنازلات اللى قدمها
تصدق حتى مبارك نفسه بحترمه لغاية فترة الحرب بس
حاسة ان الحرب دى وسام على صدورهم
متفقة مع رأيك تماما بخصوص سوريا والعرب
بس بصراحة العرب ماينفعش تحطهم فى حساباتك دول خارج الزمن وخارج الحسابات
لكن حضرتك برده متحامل على عبد الناصر زى مافى كتير متحاملين على السادات
انا عندى نظرية ساذجة جدا عايشة بيها
هو البنى ادم ده كان متعمد الهزيمة كان مستهتر مثلا ولا حساباته كانت غلط
الاجابة على السؤال بتخلينى اسامح
لو ربنا ادى حضرتك الصبر وكملت ردى للاخر
ياريت تقرا ردى على العجوز والبحر
شكرا لصبرك
ابله
بوستك رائعه
واشكرك على مجهودك الكبير مع الاطفال
اليهود فى حرب غزه الاخيره خدوا توقيع اطفال المدارس على الحرب
استاذ اسامه
اهلا بيك
والشكر ليك يافندم مش انت اللى قلت بعناها بالرخيص
نورت المدونة
وشكرا على كلمة ابلة اللى وحشتنى
اوافقك في الرأب و احييك علي توجيهك لتلاميذك لانقاذهم من غسيل المخ الحاصل لهم
هذا يذكرني بواقعة لا اتذكر اذا
كنت رويتها من قبل في مدونتي ام لا
باختصار عندما كانت ابنتي في المرحلة الأبتدائية سالتني : ليه يابابا انت بتدافع عن الفلسطينيين مش هما اللي باعوا ارضهم لليهود
فسالتها من اخبرها بذلك
فقالت الأبلة قالت كده
وفي اليوم التالي ذهبت خصيصا لمقابلة الأبلة واخبرتها ان ما تقوله للأطفال في منتهي الخطورة لأنه ينشئ جيلا يعتقد ان اليهود اصحاب الأرض بيع و شرا
وليس للفلسطينيين اي حق في المطالبة بارضهم المسلوبة ووعدتها اني سوف احضر لها دراسة وثائقية تبين نسبة من باع ارضه الي نسبة من انتزعت ارضهم قسرا بالمذابح و السرقة بالقوانين الجائرة
وفعلا اعتذرت الأبلة عما فعلته ووعدت بتصحيح الفكرة لدي التلاميذ
احييك مرة ثانية و عذرا للاطالة
تحياتي
tarek momen
رغم إني ليه اعتراضات كثير أوي علي السادات
لكن هوه أحسن واحد فيهم كلهم
يعني لو طلعنا من المقارنه محمد نجيب لأنه ملحقش يعمل حاجه
استاذ طارق
اهلا بيك منورنى
انا دايما بستنى رأى حضرتك
المشكلة ان فكرة بيع الفلسطينين لاراضيهم منتشرة على نطاق واسع
الاستعمار بذكاء لعب فى افكارنا براحته
زى مثلا مابيتقال علىا لثورة العرابية هوجة عرابى
وزى التصنيف البايخ بتاع المعتدلين والمتطر فين
الف شكر على التحية
وحضرتك تطول براحتك البيت بيتك
دكتور ياسر
حمدلله على السلامة يافندم
كل دى اجازة
حقيقى مدونتين من اجمل المدونات حضرتك واستاذ تامر على ياخدوا اجازة كده وقت طويل حاجة تزعل
عايزين نشوف ومضات جديدة
السادات ده مشكلة
كانوا بيقولوا لنا فى الكلية الشخصية المثيرة للجدل اللى الناس مختلفين بشدة عليها تبقى شخصية ثرية ولازم يكون فى نسبة تعاطف معاها حتى لو مختلف مع افكارها
عودا حميدا
السلام عليكم
ف العصر الحديث اسرائيل انتصرت علينا لانها مؤمنة بقضيتها
أنا رجعت يا بشر تاني ادون
بلاش معاكسات أصل اقول لوالدي يجي يضربك
ههههههههههه
تقبلي مروري
مصعب صلاح
حمدلله على السلامة
بس يضربنى يامصعب
انا اللى زعلانة منك بجد المرة دى
إرسال تعليق