اجتازت مصر فترة عصيبة فى تاريخها الاخير من الرشوة والفساد وعدم استقرار الحكم
ده بيان الثورة اللى كلنا عارفينه واللى قاله باسلوب مؤثر السادات
دلوقت شعورى اننا على مشارف ثورة
بحس ان انا عايشة بالظبط فى الاربعينات
استعمار بس شكله متغير زى عادته
لا وايه الاستعمار بقى حبيبنا وروح قلبنا وبيدينا معونة
واللى يغضب عليه الاستعمار يبقى خارج من الملة
رشوة وفساد وعدم استقرار الحكم واضحين للاعمى
احتكار وسيطرة رأس المال على الحكم واقطاع
حاجات حاسة انه عيب اتكلم فيها من كتر ماهى واضحة
طيب انا مش هارغى هقول اسامى بس
احمد عز وهشام طلعت ويوسف والى ويوسف عبد الرحمن وهايدلينا وممدوح اسماعيل ومحمد فودةوالحباك والسكرى والسويدىوكل ---معاه قرشين عايش علينا بيهم وبيسرق فى قوتنا بمنتهى البجاحة
دى امثلة بس وكمان دماغى مش عارفة مالها مش قادرة افتكر اسامى تانى
الجيش الوطنى اللى الثورة كان نفسها تبنيه انا مش عارفه هو فين- ماعنديش معلومات عنه
نفسى اعرف عدده -- اطمن على سلاحه
اخويا لما راح الجيش عقدنى
حسيت ان مفيش انتماء
لا ده فيه فساد ورشوة وتسلط ومكانوش بيدربوه كتير على ضرب النارعلشان مفيش ذخيرة
العدالة الاجتماعية ؟
لا مش هتكلم عنها
ماما قالت لى ماقولش كلام عيب
الحياة الديموقراطية السليمة
دى الحلم
اللى هنعيش ونموت من غير مانشوفه
الهدف اللى مااتحققش فى مصر من الاف السنين لغاية دلوقت
من فرعون اللى كان ابن الاله
للبطالمة اللى كانوا خلفاء الاسكندر ابن الاله
للرومان والتسلط العسكرى
وبالعند فى ناس مايعرفونيش ومبيدخلوش مدونتى
مش هتكلم عن الحكم العربى
اللى على قلبى زى العسل
انا كنت بحب حاجات كتير فى ثورة يوليو
حتى لو الحاجات دى كانت مجرد شعارات براقة مقدروش ينفذوا منها حاجة
بحب فى ثورة يوليومجانية التعليم وعندى احساس ان دى من الانجازات المهمة جدا
دلوقت الحمد لله بقول على مسئوليتى ان مفيش تعليم فى مصر وللاسف مسيطرة على جدا نظرية المؤامرة حاسة ان الخراب فى المناهج والتقويم الشامل ونظم الامتحانات كل دى حاجات مقصودة
بحب فى ثورة يوليو السد العالى وتأميم القناة
واكره كل واحد يقول لى السد العالى حجز الطمى واثر على خصوبة التربة وان عبد الناصر كان غبى لما أمم القناة
بحب المعانى اللى بيمثلها بناء السد وتاميم القناة
بحب اغنية عبد الحليم عن السد ومش ممكن اشرح للبنات العدوان الثلاثى الا لما اغنيلهم بصوتى الرائع
راح على البنك اللى بيساعد ويدى
قاله حاسب قاللنا مالكمش عندى
او
ضربة كانت من معلم خلى الاستعمار يسلم
جاب سلاحه --طياراته-- غواصاته --دباباته-- واعتدى علشان نسلم
هو مين!! لا ده بعده هو جه يتلقى وعده
بحب اغانى الثورة كلها
بحب الحالة اللى خلقتها الثورة فى الفن
وباكره اغنية اخترناك
وصور الزعيم اللى اجبارى تتحط فى كل مكان حتى فى اوضتنا فى المدرسة
كنت بحب قوانين الاصلاح الزراعى ولما كبرت شوية حسيت انى مش معاها
مع ان مفيش حد من اجدادى من ايام المغفور له مينا موحد القطرين كان باشا واقطاعى والكلام ده
بس رفضت القوانين دى فى وقت متأخر
بس سؤال بيخطر على بالى هنا
كان فين شيوخنا ايام صدور القوانين دى
ليه دلوقت بس افتكروا ان الملكية الخاصة محترمة فى الاسلام
بحب فى الثورة عدم الانحياز ومؤتمر باندونج ومساعدتها لنكروما
بحب فى الثورة عداوتها لحلف بغدادومساعدتها للجزائر
واكره فى الثورة الغاء الدستور واعفاء نجيب واللى حصل ليوسف صديق
بكره فى الثورة الحكم الشمولى والاتحاد الاشتراكى ونظرية من ليس معنا فهو عدو الثورة والشعب
بكره فى الثورةنظرية تولية المناصب لاهل الثقة وطرد اهل الخبرة
بكره صلاح نصر وشمس بدران وموافى وفيلم الكرنك
بكره فى الثورة الغباء السياسى وعدم المرونة
بكره نظام الحكم الر ئاسى والدستور اللى بيخلى رئيس الجمهورية ابونا وعمنا وانور وجدى ومنقدرش نحاسبه
لا ده كمان فى ناس بتقول عيب نحاسبه
بحب القطاع العام اه والله بحبه ومش هسامح لغاية مااموت اللى خربه وسرقه وبعدين باعه
بحب جدا عمر افندى
ماما واحنا صغيرين كان لازم تدخل تتفرج على عمر افندى حتى لو مش هتشترى حاجة
دلوقت لما بدخله بحس انه كان بيتى وحد خمنى وخطفه منى
بحب الاميرة انجى وعلى اللى اتجوزها لما الثورة قامت
بكره 67 وبحب الصمود والاستنزاف
بحب اكتوبر وبكره كامب ديفيد ومعاهدة السلام
وحاسة ان الثورة انتهت تماما الى غير رجعة بداية من كامب ديفيد
بحب محمد نجيب ومش قادرة اكره اوى عبد الناصر
نفسى اعيش فى ايام ثورة
بس جبانه وخايفة من الفوضى
نفسى يبقى عندنا دستور بجد
احاسب بيه رئيس الجمهوريةوالحكومة
نفسى فى مجلس شعب عنده كرامه
نفسى فى سيادة قانون
نفسى فى ثورة
بالنسبة للاخوة مباحث امن الدولة شعبة مكافحة المدونات
لو فى حد فيهم بيدخل المدونة المغمورة دى
انا نفسى بس ياباشا
بحلم مش اكتر
ولو حضرتك مش عاجبك نلغى الحلم سيادتك وهروح حالا اتفرج على روتانا سينما لغاية الصبح
بلا ثورة بلاقرف
25 التعليقات:
بوست جامد جداجدا جدا
واحب بهذه المناسبة اقول لك
انتي من الأحرار يا حفيدة عرابي
وبالعند في شرطة مكافحة المدونات
مش هاتفرج علي روتانا سينما
تحياتي
استاذ طارق
اهلا بيك يافندم
النهارده يوم جميل بجد يارب يكمل على كده
تعليق حضرتك الجميل
والكلمة اللى بحبها جدا حفيدة عرابى
وكمان حضرتك مااتفرجتش على روتانا سينما
احب اطمن حضرتك ان انا كمان ماتفرجتش
ونمت بدرى احلم بالثورة
شرفتنى يافندم
حضرتك جيتي علي الجرح واتكيتي جامد
الثوره راااااااحت خلاص
بس والله يا باشا مليش نفس في أي ثوره
ولا حتي في الأحلام
دي حتي تبقي كابوس
استاذتنا
انتى رائعه بمدونتك
بوستك رائع انا معاكى انى كان فى اخطاء وسلبيات فى الثوره بس كان فى عداله اجتماعيه بين طبقات الشعب المختلفه اما دلوقتى
رجعنا لعصر الملك الاوحد
ايام الثوره كان فى واسطه فى دخول الجيش علشان تبقى ظابط دلوقتى الواسطه بقت فى كل حاجه
دمتى رائعه
و إحنا كمان نفسنا
اسامة
شكرا لمرورك ومجاملتك
فعلا الثورة كان ليها مزايا كتير
زى ماكان ليها عيوب
لكن دلوقت بنتحسر على عيوبها
ونقول مهما كان ارحم من اللى احنا فيه
مهندس مصرى
ربنا يحقق احلامنا
اللهم امين
دكتور ياسر
هو جرح واحد بس ؟
لكن ماينفعش يحرمونا حتى من الاحلام
عموما الايام دول
وهما اكيد ايامهم قربت
او ايامنا احنا ونخلص احسن
السلام عليكم
انتى بتحبى حاجات كتير وبتكرهى حاجات كتير وتقريبا كلنا معاكى فى اللى بتحبيه
بنحب انجازات ناصر ونكره سقطاته
بنحب ايجابيات الثورة ونكره سلبياتها
بنحب العبور ونكره الذل
كلها حاجات فى الماضى كنا بنحب منها حاجات ونكره حاجات ...بس للاسف بقينا بنكره الحاضر كله
السلام عليكم
على فكرة علي الله يرحمه ماااات وشبع موت
ثانيا
نفس الموضوع دا كنت هاكتب عنه بس السنة اللي فاتت
توارد خواطر بأه
بس الجهاز عطل يوميها ومكتبتش
فايدة الثورة الموجودة حاليا حاجة واحدة
ان اليوم دا أجازة
سيدتي العزيزه لقدخلقنا الله احرارا
لقد مرت مصر فى المائتين سنة الاخيره بأربعة ثورات ثورة عمر مكرم 1805 وثورة عرابى 1882 وثورة 1919 والثوره التى نحتفل بها 1952 وبقليل من التأمل و
التدقيق نكتشف انها ثورة واحده ،اختلفت ازمانها وتباينت مظاهرها ووتنوعت مقدماتها ونتائجها وتغيرت اسماء زعمائها وابطالها ولكنها بقيت
واحده فى جوهرها اولا واخيرا ثورة شعب واحد ثوره بدات مع بداية القرن ال19 وانتهت فى منتصف القرن ال20 اى قرن ونصف وهناك خصائص نفسيه وروحيه لهذا
الشعب فى ثوراته الاربع من السهل مشاهدتها خاصه فى الثلاث الاولى 1-انطلاق
شرارة الثوره من الشعب فىتلقائيه تدهش اعداء الشعب 2- خروج قائد الثوره من باطن النظام . تجسد الثوره فى شخص قائدهاوتحول القائد الى ما يشبه البطل الاسطورى 4-عدم التحضير للثوره باعتبارها انفجارا .5- خلو الثوره عند انفجارها من برنامج معد
ويكون هدفها تحيق الحريه .
اما ثورة 1952 فتختلف بأن 1-قادة الثوره كانوا ينتمون الى الطبقه المتوسطه الصغيره فعمر مكرم فى 1805 كاننقيب الاشراف وفى الثوره العرابيه كان محمود سامى البارودى من الطبقه المتوسطه الكبيره ام زعماء ثورة 1919
فكانوا جميعا قبل الثوره باشوات او بكوات 2- ثورة 1952 هى الوحيده التى كتب لها النجاح واستولت على السلطه.
3- ثورة يوليو هى الوحيده التى صمدت فى وجه الضغوط وانواع التدخل الخارجى.
4-ثورة 1952 هى التى خرجت من النطاق السياسى الى النطاق الاجتماعى .5-ادراك ثورة يوليو ان الارتباط الوثيق بين اجزاء المنطقه العربيه .وترتب على هذا ان آثارها تجاوزت المنطقه العربيه الى المحيط الافريقى والاسيوى حتى كان لها الفضل فى خلق العالم الثالث.
اما زعيم الثوره عبد الناصر الذى رحل 1970 بعد فترة الاحلام الكبيره والعواطف الجياشه والرؤى البعيدة المدى وقد ضربت بانتكاسة 1967 ورحل رغم صموده المشهود فى فى الثلاث اعوام
اسابقه لوفاته.وقد رحل والارض محتله
والامه فى شتات واوضاع فى سوء.
ولكن ليس بنهاية القيادات يقيم تاريخها فنابليون مات منفيا سجينا ومحمد على مات محاصرا باتفاقية 1840 .
آسف للأطاله..ولكنى اعتبره التزاما على
نحو الشباب الصاعد....
بنجاواتى
شكرا لزيارتك يافندم
هى مشكلة فعلا اننا بنكره الحاضر بكل مافيه
مفيش مشروع قومى نتوحد عليه زى زمان
مصعب صلاح
السلام عليكم
كل اللى بيهمك الاجازة
ماشى يامصعب
لن انسى لك هذا الموقف
سيدى العجوز والبحر
السلام عليكم
قرأت تعليق حضرتك صباحا ولم استطع الرد لاستعجالى ولرغبتى فى اعادة القراءة اكتر من مرة
شكرا جزيلا على المعلومات القيمةوالاسلوب الشيق والقدرة على الربط بين الاحداث
لكن اسمح لى ببعض الاستفسارات
1-خروج قائد الثورة من باطن النظام فى الثلاث ثورات الاولى
انا مش فاهمة النقطة دى
هو عمر مكرم لما يكون نقيب الاشراف يبقى من باطن النظام
وكمان حضرتك نسبت الثورة العرابية لمحمود سامى البارودى
طيب فين عرابى وباقى زمايله المصريين اللى عانوا من اضطهاد عثمان رفقى ليهم
وكمان عرابى حسب معلوماتى كانت اصوله بسيطة جدا ومدخلش المدرسة الحربية واترقى من تحت السلاح
فمستواه الطبقى اقل حتى من زعماء 52 اللى حضرتك وصفتهم انهم من الطبقة المتوسطة
ولا حضرتك تقصد ان البارودى كان هو رئيس النظار فى وزارة العرابيين؟
2-انا مش ضد الثورة بس حضرتك قلت هى الوحيدة اللى صمدت ضد التدخل الاجنبى
ازاى يافندم طيب 67 كانت ايه؟
3-يوليو هى الوحيدة اللى انتقلت من السياسى للاجتماعى
ده لانها الوحيدة اللى تولت السلطة لا عمر مكرم ولا العرابيين ولا سعد ورفاقه وصلوا للسلطة
غير سعد لمدة 10 شهور ووزارة العرابيين استمرت من فبراير لمايو 1882 فاكيد لا البارودى ولاغيره كان ممكن ينتقل من السياسى للاجتماعى
4- متفقة تماما مع حضرتك ان موت الزعيم حتى لو ماحققش احلامه واماله مش نهاية للثورة وانا بحترم جدا الصمود والاستنزاف ومتأكدة ان اكتوبر كانت انتاج مشترك من ناصر والسادات
لكن انا مستغربة جدا من المثال اللى حضرتك ذكرته الخاص بمحمد على مش فاهمة بصراحة ايه علاقة محمد على اللى كان بيبنى لمصلحته هو مش مصلحتنا بكلامنا عن الثورات اوحتى عن نابليون ياريت حضرتك تفهمنى النقاط دى
انا مستنية رد حضرتك وشكرا جزيلا على المجهود والرغبة فى تعليمنا
عجبتنى اوى الحته بتاعة عمر افندى دى
اصل انا كمان كنت بحبه
الا قوليلى يا اوختشى
الفيلم اللى فى روتانا سينما
كان اسمه ايه ؟؟
اصله فاتنى حتة كبيرة اوى منه
هههههههههههههه
==========
بجد تسلم ايدك
بوست هايل
العزيزه لقد خلقنا الله احرارا
اسف فى التأخير فى الرد لسفرى دبى ..
بالنسبه لعمر مكرم وهل كونه نقيب الاشراف يكون من باطن النظام كان اول
ظهور لعمر مكرم فى ميدان السياسه 1791
بعد رجوع القائد التركى حسين باشا الجزائرلى الى بلاده الذى اتى فى حملة تأديب
ابراهيم بك ومراد بك ولكن حزب الامراء
لم يستطع المحافظه على السلطه بعد عودة الجزائرلى وانتهز مراد بك وابراهيم بك
الفرصه وارسلا رسولا من قبلهما يفاوض الحكومه فى ان يعودا الى القاهره ويشتركا فى الحكم وكان رسولهما هو السيد عمر مكرم وكان قد اتصل بالاميرين فى مدة وجودهما فى الصعيد فأختاراه لما توسما فيه من القدره والنفوذ فأقام فى القاهره يومين تمكن فيهما من تمهيد عودة صديقيه الى الحكم فهاانتى يا عزيزتى ترى
انعمرمكرم كان صديقا للنظام القديم بل
كان رسولا له..
اما اننى نسبت الثوره العرابيه الى محمد سامى البارودى فهذا لم اقله .. لقد ولى زعماء الشعب محمد على على مصر واثبتت
هذه الواقعه ان للشعب اراده وانها تنفذ وعلى الرغم من كل عيوب محمد على فانه لم يكن لاحد من منافسيه سواء البرديسى او الالفى ان يحقق لمصر ما حققه لها من اقامة الدوله ومن انشاء جيشها
واسطولها ولكن محمد على الذى انشأجيش مصر العظيم من ابناء الفلاحين الذين اثبتوا انهم اثبت واصلح فى ميدان القتال من الالبان والاتراك والديلم وكل الاجناس ولكن محمد على لم يكن يثق فى المصريين ضباطا لجيشه فقد خاف على سلطته منهم واحس بغريزته ان وصول الجندى المصرى الى مرتبة القياده معناهاى انقضاء عهد الحكم الاجنبى المتمثل فى شخصه. حتى جاء احد ابنائه وهو محمد سعيد وكان قد اختلف مع الباب العالى
تركيا واحس انه لاسند له فى خصومته مع
السلطانالا الشعب المصرى فاصطنع له سياسه مصريه.
ويقول احمد عرابى فى مذكراته (ان سعيدا
دعا عددا من رجال الدوله ليخطب فيهم فقال ايها الاخوان انى نظرت فى احوال هذا الشعب المصرى من حيث التاريخ فوجدته مظلوما مستعبدا لغيره من امم الارض فقد توالت عليه امم ظالمه كثيره..
وحيث انى اعتبر نفسى مصريا فوجب على ان اربى ابناء هذا الشعب واهذبه تهذيبا حتى
كى اجعله صالحا لان يخدم بلاده خدمه صالحه
وقد وطدت راىىان نقل هذاالرأى من الفكر الى العمل ..)
ويقول عرابى انه بعد ان فرغ من خطبته
خرج الامراء والعظماء من الاتراك والجراكسه حانقين مما سمعوا وخرج المصريين
فرحين بما قاله سعيد ..
ونفذ سعيد سياسته فامر بتجنيد ابناء العمد والمشايخ وكانوا يعفون من الخدمه العسكريه وجند عرابى ضمن هؤلاءوخذ يترقى بناء على سياسة سعيد الجديده فى السلك العسكرى فعين ملازما 1858 وهو فى السابعه عشره حتى وصل رتبة البكباشى سنة 1860 فقائم مقام 1961 ثم حظى بثقة سعيد نفسه فعينه مرافقا ياور له فى رحلته الى الحجاز وهكذا نرى ان عرابى لم يكن بعيدا عن النظام الذى ثار عليه .
نأتى بعد ذلك الى ثورة 1952 التى صمدت فى وجه كل انواع الضغوط الخارجيه .
وقد صمدت حتى بعد نكسة 1967 فلم تعلن الهزيمه بل اعتبرتها هزيمة معركه وليست هزيمة حرب ..ولكن للأسف فبعد حتى نصر اكتوبر استسلمت قيادة مصر الجديده الى
نظرية ان 99فى المائه من اوراق اللعبه فى ايدى امريكا وانها لاتستطيع محاربة امريكا حتى ووصلنا للزياره المشؤومه للقدس 1977 وبداية عصر الانهيار العربى
وتسول السلا م من العدو ولقد عرض ديان فى عام 1969 عودة سيناء الى مصر كامله
فى مقابل خروج مصر من العركه..ولكن
ارجو ان اكون استطعت ان ارد على استفتاراتك ولكى كل موده واعجاب..و
الثورة لو نجحت تبقى عمل عظيم ..نحتفل بيه ..ناخد اجازات .... نكتب ونقرا عنه ..
لو فشلت تبقى خيانة عظمى .... محاولة فاشلة لقلب نظام الحكم ... يعدم منفذيها وكل اللي فكروا فيها .
انا مختلف مع حضرتك :)
بكره كل دول لأن ولا واحد فيهم حب غير نفسه ومجده الشخصي وحساباته الفردية
والنتيجة احنا عايشين دلوقتي ازهى عصور الديمقراطيه :)
تحياتي
سبهلله
اهلا بيك
كويس انك كنت بتحبى عمر افندى انا كل ما بدخله دلوقت بقعد اقول حسبى الله ونعم الوكيل
اما الفيلم فكان دعونى نائما
من تأليفى واخراجى
العجوز والبحر
حمدالله على سلامتك
واسفة اذا كنت بزعج حضرتك
لكن انا مختلفة مع حضرتك فى بعض النقاط
اولا انا مش شايفة الحادثة اللى حضرتك حكيتهادليل على ان عمر مكرم من باطن النظام لان كلمة من باطن النظام اورسول النظام انا حاسة انها اهانه لعمر مكرم اللى ليه مواقف وطنية كتير
ثانيا انا معنديش اى قدر من الاحترام لشخصية محمد على
انا مع حضرتك انه لا الالفى ولا البرديسى كان ممكن يعملوا دولة زى اللى بناها محمد على
لكن انا النوايا بتفرق معاياجدا
محمد على كان هدفه مصلحته هو وبس وكل الاصلاحات اللى عملها المصريين لم يستفيدوا منها شى
هو ماكانش بيبنى مدارس ومصانع وجيش واسطول علشان خاطرنا بدليل انه بعد فرمانى 1841 اتغير كل الحال ده
كمان هو لم يعتمد على المصريين فى الجيش الا لانه فشلت تجاربه فى الاعتماد على غيرهم فجندهم على مضض وفى مناصب صغرى زى ماحضرتك قلت
اكيد محدش بيبنى دولة وبيخاف يعمل من اهلها جيش الا اذا كانت الدولة دى ليه ولعائلته بس
شكرا لحضرتك على المتابعة والاهتمام
استاذ تامر على
متفقة مع حضرتك تماما ان الثورة لو نجحت تبقى عمل عظيم ولوفشلت تبقى خيانه عظمى ومحاولة لقلب نظام الحكم
لكن هنعمل ايه ده قدر المهزومين فى الدنيا
انا كنت بتكلم مع استاذ تاريخ من فترة وكان متحامل على الحسين بن على وبيتهمه بمحاولة قلب نظام الحكم وتكدير الامن العام وشق صف المسلمين
وكان ردى
لانه اتهزم بس لكن لو انتصر كان زمان دولته بيتألف فيها مراجع دلوقت
الحمد لله ان فى اخرة فيها الجزاء
اما بالنسبة للنقطة التانية من تعليق حضرتك
انا لازم احببهم لنفسى علشان مااكرهاش واكرههم يافندم
السلام عليكم
مدونة مش هنسكت أصبحت مفتوحة للأعضاء فقط وتدعوكم للمشاؤكة معنا في ملتقاها وم الاثنين المقبل الموافق 3/8/2009 الساعة العاشرة مساءا بتوقيت القاهرة كميعاد للقائنا عبر الشات لمناقشة أوضاع المدونة وما ستئول إليه المدونة في الفترة المقبلة ومراجعة ما وصلنا إليه منذ إنشاء المدونة
نسعد بحضوركم واهتمامكم عبر الإيميل الخاص بالمدونة : marwa_elsherbiny09@yahoo.com
ايه ده انتىحطالى تهنئه عندك
انتى بجد مش معقوله
بحبك قوى وعايزاكى تدعيلى كتيييييييييير اولا ان الموضوع يتم على خير انا خايفه مايكملش انا مش مصدقه
والحاجه التانيه دعواتك فى زواجى ودراستى ربنا يوفقنى فيهم
ده رجاء منى لقلب صادق انه يدعيلى بجد
على فكره اسمي جهاد
بحبك فى الله والله العظيم
بالنسبه للبوست
تعرفى ان بحب قوى فيكى حبك لمصر
ده الاهم اننا نحب اللى عملحاجه لمصر ونكره فيه الحاجه دي
مايبقاش مجرد ازدراء لاشخاص كلنا عارفين ان يمكن اخطاوا لكن الاكيد فى حاجه قدموها لمصر احنا بنشكرهم عليها وضدهم اذا عملوا حاجه ضد اغلى بلد مصر العزيزه والحبيبه
بحبك يامصر
جيجى حبيبتى
الف مبروك ياجميل
ربنا يكمل الحكاية على خير ويتقبل منك ويكون حج مبرور بأذن الله
اما عنك ياجميل فربنا يشهد انى حبيتك فعلا من غير مااشوفك
حاسة فيك بصفات كتير ربنا يديمها عليك
علشان كده يمكن تستغربى ان على اد ماموضوع الحج ده كان مفأجاة
بس انا اخدته من زاوية تانية
انه اكد لى نقاءك اللى اهلك للدعوة دى من ربنا سبحانه وتعالى
وبعدين ياجيجى ياللى على اسم اغلى صديقة لى
لو ماحبتش مصر احب مين يعنى ؟
وانا صغيرة كانوا بيعلمونا فى المدرسة بيت شعر جميل اوى
بلادى وان جارت على عزيزة
واهلى وان ضنوا على كرام
نورتينى ياقمر
إرسال تعليق