كتبت بوست طويل عريض
ووضعت فيه خلاصة أفكارى ومعتقداتى
فظيعة أنا فى الكلام الكبير
أفكار ورؤى ومعتقدات
الحمد لله انه لم ينشر
لسبب واحد
لخوفى الدائم
انى أكون ممن يوقظون الفتنة فيستحقون اللعنة
لكن
رجعت قلت لنفسى الفضفضة حاجة جميلة
نتعاتب
يمكن النفوس تصفى شوية
أول ماأسمع كلمة وحدة وطنية
تيجى فى بالى حاجات كتير
لو المتحدث بيتكلم بسخرية
أفتكر موائد الوحدة الوطنية
والقبلات الباردة المتبادلة بين شيخ الازهر والبابا
لو الكلام جد
تيجى على بالى ثورة 1919
اللى كانت أروع تجسيد للوحدة
وأنا فى الكلية
الدكتورة قالت لى جملة عمرى ماانساها
ان أحد شباب الوفد الوطنيين اسمه ويصا واصف
لما مات بعد وفاة سعد زغلول بفترة
خرج المصريين مسلمين ومسيحيين فى جنازته بهتاف جميل جدا
وجع قلبى بجد
هو
اشكى الظلم لسعد ياويصا
أنا سمعت الجملة وسرحت وسبت المحاضرة
وقلت لنفسى
المصريين فعلا فى الجملة دى نسيوا كل خلافاتهم العقائدية
لدرجة انهم تخيلوا ان سعد وويصا هيتقابلوا فى الجنة سوا
وويصا هيحكى لسعد عن الظلم اللى عاشت فيه مصر من بعده
أنا مش من أنصار ان اصحاب أى دين يتناسوا الاختلاف العقائدى اللى بينهم وبين الاديان الاخرى
لكن من انصار اننا نفتكر شوية حاجات مهمة
احنا ودعنا ويصا الوداع المؤثر ده لسبب قوى جدا
ان كان فى قضية واحدة بتجمعنا وشاغلة كل فكرنا ووقتنا
لا ومش كده وبس
ده اهم حاجة كان عندنا العامل اللى أنا بعتبره سبب أى ثورة فى الدنيا
الا وهو
الوعى القومى
بالبلدى نكون بنفهم
مين عدونا
ومين حبيبنا
وايه اولوياتنا
دلوقت
احنا عندنا مليون قضية ممكن تجمعنا
لكن للاسف
انعدام الوعى بيخلى كل حادثة تافهة تفرقنا
انا من موقعى هذا
امام لاب توبى حبيبى
قررت اخد زمام المبادرة
بما انى مدرسة تاريخ
وفرحانة أوى بصرخة عرابى فى وش الظلم
لقد خلقنا الله احرارا
قررت انى أفضفض
واقول لاخواتى المسيحيين انا زعلانه منهم ليه
ونفسى أفهم وجهة نظرهم من غير تجريح واستهزاء
بسم الله
1- أنا فى كل مراحل حياتى بحترم الشخص المتمسك بتعاليم دينه حتى لو مختلف معى عن المستهتر بتعاليم الاديان
2- أنا بعتبر كونى مسلمة دى نعمة كبيرة جدامن ربنا والأجمل ان ربنا سبحانه أنعم على بيها من غير مااطلبها وأتمنى بكل جوارحى ان ربنا يختم لى حياتى وأنا على ملة الاسلام
بس الحمد لله اعتزازى بنعمة ربنا دى
خلانى أتفهم شعور المسيحى اللى بيشكر ربنا على نفس النعمة
مش زعلانه منه فى دى ولا حاجة
بس يا حفيد ويصا
انت بتعمل حاجات كتير بتضايقنى
مش بترد على السلام
بقولك السلام عليكم
بترد على صباح النور
بتخلينى محتارة
مش عارفة اتصرف ازاى
دايما وابدا بتعتبر الاسلام عدو حريتك والمسئول الأوحد عن عدم تمتعك بالمواطنة الكاملة
مع انى شايفة ان السببب فى كده مش الاسلام بالعكس
النظام اللى بيحكم البلدمن سنين هو السبب
وبعدين علشان تكون السخرية سوداء
الاقى البابا بيشجع النظام
انه
يتمادى فى سحلنا احنا الاتنين
لما يوافق ليه بمنتهى البساطة على التوريث
وماتزعلش منى
البابا بيعمل كده
علشان مصالح طائفية ضيقة
طيب منين بتطالب بالمواطنة
وانت أول واحد بتلجأ للكنيسة تحل لك كل مشاكلك مع الدولة
ليه عايز الحكم علمانى وعمال تشجع العالم الهبلة بتوع الغاء المادة الثانية من الدستور
وانت بتجرى على الكنيسة بتعمل اى مظاهرة جواها
منطقى جدا
لما انت ضهرك يكون الكنيسة
انا ضهرى يكون الجامع
زعلانه منك لما بتشجع الدولة اللى مالهاش ملة غير مصلحتها الضيقة ضدى
وتقول على متطرفة وارهابية لو حسيت منى انى بمارس حقى انى احب دينى واتمنى يطبق شرعه
مش انت حفيد ويصا
اللى حطم سلاسل البرلمان
يبقى انت ديموقراطى
واهم حاجة فى الديموقراطية
رأى الاغلبية
ليه زعلان ان الاغلبية معايا
ليه
فى خناقة كيرة قايمة بينك وبين الدولة على عدد المسيحيين
هى البلد دى مش بتعمل تعداد
وبمنتهى البساطة ممكن نعرف عددنا اد ايه
ليه بتلعب مع الدولة فى العدد ده
انا شايفة بمنتهى البساطة الارقام كلها تعلن
لان على اساسها نحدد
انت محتاج كنائس اد ايه
بدل الخناقة الدائرة باستمرار على بناها فى السر
اقولك اكتر حاجة وجعتنى منك بجد
انك شايف ان نجلاء الامام من حقها تعتنق المسيحية
لكن انا مش من حقى افرح بوفاء قسطنطين
مش من حقى حتى اطمن عليها
واعرف اذا كانت لسه على قيد الحياة
كفاية فضفضة النهارده
يمكن
لو حسيت انك ياحفيد ويصا عايز تسمع
يمكن
ارجع افضفض تانى
26 التعليقات:
السلام عليكم
الموضوع ده كبير جدا
وعاوز دماغ تمام تتكلم فيه
بس انا هموت من النعس
اروح انام وارجع بكرة ان كان فى العمر باقى ابقى اتكلم معاكى
ســــــــلام
فضفضى ... يمكن لما نواجه بعض بالحقايق ..نقدر نلاقى حل او اتفاق
..تحياتى ...وهرجع تانى ..انا متابع
معلش البلوجر علق
تحياتى بيطرية ومش بايدى
اجدع ناس والله
كأنك عارفة اللى كان نفسى اقوله لاول واحدة مسيحية اتعرفت عليها وبقينا زملا كان نفسى اقولها كلام زى ده بما انى لسه زقردة
بصى هاكمل كلام بعدين عشان نونة خالتك عايزانى
للأسف أنا متشائم فيما يخص هذا الملف لأني أرى أن مرحلة من الاحتقان ترسبت لسنوات طويلة ولن يفيد العتاب الآن ... احنا في مرحلة القوة والاستقواء وربنا يسترها علينا
المعتصم
زميل الهم التدريسى
اهلا بك
انا مستنية رأى حضرتك
ادينا بكره
well
ادينى بفضفض
بس ايه
فضفضة بكبت
ماسكة لسانى على الاخر
تحياتى لك
ومستنية رجوعك
ست الدكتورة
ازيك
والمرضى عاملين ايه على حسك
هو احنا برده عندنا امهات تنادى على عيالها وهما مشغولين فى الكمبيوتر
الواحد ياما هيشوف
سلم لى على طنطى
استاذ تامر
اهلا بحضرتك
اولا بارك الله فيما رزق
هى متأخرة شويه
والمفروض تكون فى مدونة حضرتك
بس معلش
ثانيا
انا كنت كتبت كلام كتير ومسحته
وقلت اخلى اول مرة كلام خفيف
مش كل اللى جوايا
ثالثا
بالنسبة للاستقواء
دى من الحاجات الكبيرة اللى قلت اخليها لبعدين
بس انا شايفة انه مرتبط بضعفنا احنا
وانهم شايفين ان الدولة كنظام وسيادة قانون فى انهيار
فبيستغلوا الفرصة صح من وجهة نظرهم
تحياتى لحضرتك
يا سلام
بمنتهي العفوية لخصتي القضية
عرضتيها بمنتهي الاحكام والحرفية والبساطة
وعلي الرغم من روعة الفضفضة دي لكن احب انك تبدأي في محاولة العلاج
ولو حتي مع اللي قلتي له سلامو عليكم وقالك صباح النور
صباح الفل
الاسبوع الماضي كانت هناك حادثه
2 مسيحيين قتلوا واحد جواهيرجي مسيحي وسرقوا محله
الخبر كان عابر في الجريده ولا كأن حاجه حصلت
عارفه لو كان القتيل او القاتل بس مسلم
كانت الدنيا انقلبت حريقه
إذن هناك من يسعى للنفخ في النار
هم موجودين خارج البلد - مسلمين ومسيحيين- وبيستغلوا البطاله والظروف السيئه في اشعال الفتن
لكنني الحقيقه لا اعفي بالدرجه الاولى اخواننا المسيحيين من المسئوليه والشكوى الدائمه بالاضطهاد
تايه فى وسط البلد
اهلا بك
شكرا على التشجيع والمجاملة
انا مش بحاول اعالج
بس فى تعاملاتى اليومية
حريصة انى ابنى جسور ثقة كتير كانت اتهدت
ربنا يستر
لورنس العرب
اهلا بك
انا لسه ماخلصتش فضفضة
والادعاء الدائم بالاضطهاد
من اهم الحاجات اللى ناوية اتكلم فيها
بس انا قلت ابدأ بداية هادئة شوية
انا شايفة بصراحة
ان المسلم هو المضطهد حاليا
برده
ربنا يستر
المسلم دا مبيحرقش ولا بيخرب
المسلم دا مش بيشتم ولا بيلعن غيره اللي علي غير دينه
المسلم دا بيدعوا الي سبيل ربه بالحكمة والموعظة الحسنة
المسلم دا كيس فطن .. بيعرف امتي يتكلم وامتي يسكت وامتي يدعو الي الحق
المسلم دا عنده يقين ان الله كان قادرا علي خلق كل البشر مسلمين .. ولكن يهدي الله من يشاء ويضل الله من يشاء
المسلم دا كان المفروض يكون قدوة حسنة لغيره ..
بس لما نقل علمه للي بعده نقله منقوص عن اصله جايز .. او اللي اخده منه تهاون في نقله من جيل لجيل
لحد ما اصبح الكلام في الفرائض التي لا جدال عليها بيتقال فيه كلام جديد..
واقصد بكده واحد زي جمال البنا .. اللي اصحاب العقول الضعيفة هيجدوا في كلامه راحة لضمائرهم
لما يقول ان الصلاة ليست عماد الدين وان الحسنات يذهبن السيئات بمفهومه يسمح للي مش بيصلي انه ميصليش بس يعمل حاجات يكسب بيها حسنات فتقوم دي تمحوا تجبره علي فرض الله وعدم اداء الصلاة!!
المسلم يا اختي الطيبة في الزمن دا بقي مشتت بين شيوخه المعتدلين اللي بيرغبوه في الدنيا للسعي وفي نعيم الاخرة كجزاء لسعيه وعمله وبين شيوخ بتشددوا وبين علمانيين بيهبلوا يمين وشمال
بين مصدر التشريع الديني اللي بيوجهه حسب السياسة ما تشاور
وبين الحاجة والفقر اللي خلتهم سموا الرشوة اكراميه و عطية و بقي الموظف فاتح جيبه لكل حد لينتزع حق حد من حد .. لا ووجد من يحلل له دفعها اذا كان هياخد حقه بيها ؟؟؟ يرضي مين دا ... هو دا المسلم؟؟
المسيحيين مش اقلية ولا مضطهدين ...
انا في حياتي مشفتش مسيحي فقير لدرجة اني وانا صغيرة مرة لقيت ست فلاحة معدية جنبي انا وامي ولمحت في رقبتها سلسلة فيها صليب .. فبعفوية الاطفال بسأل امي "هو في مسيحيين فقراء يا ماما ؟ "
هما ناجحين جدا في انهم يتلموا ويتوحدوا و يشيلوا الخلافات اللي بينهم و يقفوا وقفة رجل واحد في مواجهة كل مصاعب الدنيا اللي بتواجههم سواء بلجوئهم للكنيسة او اتحدهم فيما بينهم
لما يبقي في اتنين داخلين قسم شرطة و منهم حد مسيحي .. الظابط بيضطر ينصر المسيحي علي المسلم علشان ميخرجش المسيحي يصوت ويقول انا مضطهد المسلمين بيعملوا فيا ويسووا ..
ودي حادثة حقيقية تدخلت فيها واحدة مسيحية لواحدة صحبتها مسلمة ضد مسلمين اخرين .. المسيحية دخلت معاهم القسم وقالتله شوفلك طريقة تسوي الموضوع دا علشان يخصني بدل ما نعمل دوشة و كلام كتير وتقلب بفتنة طائفية!!!
انا شفت نماذج كتيرة لمسيحيين محترمين و لم تصدر منهم تجاهي او تجاه حد من اللي عاشروهم اي اساءة و الله اعلم بما تخفي الصدور .. بس علينا الايمان بكلام ربنا " انك لا تهدي من احببت ولكن الله يهدي من يشاء" " ويضل الله من يشاء"
من النماذج دي اللي بتلزم الامتناع عن الطعام او الشراب في حضرة المسلمين في نهار رمضان .. حفاظا علي مشاعرهم .. ومنها الجاره اللي بيخبز كعك لجارتها في زفاف بنتها وتكون اول المهنيين..
ومنها كتير من ناس اتربوا بنضافة و عاشوا مع غيرهم بنفس النضافة اللي كبروا عليها
الفتنة اللي والعة في القلوب دلوقتي .. اشك ان في حد عارف سببها ايه اصلا ولا المسيحي بيكره المسلم ليه ولا المسلم بيكره المسيحي ليه
مع ان اصلا عندهم تعاليم السيد المسيح بتقول احبوا اعدائكم .. والرسول صلي الله عليه وسلم كان خير مثال للتسامح والمحبة مع جاره اليهودي اللي كان مداوم علي ايذائه !!
الدولة مستفيدة ان الجانبين ميبقوش علي وفاق .. و العالم الخارجي كمان باعتبار المسيحيين مسمار جحا اللي كل شوية يهوهوا علشانه ..
لو يرجع المسلم بتاع زمان اللي قلبه ابيض نضيف مليان حب وخير للناس اجمعين ..
ولو يرجع المسيحي لاخلاق اجداده اللي بتحترم الاخر وتقبله و الاتنين يتعايشوا في سلام علشان المركب تمشي بيهم .. مش يولعوا في المركب ويقعدوا يصرخوا انهم بيغرقوا..
معذرة للاطالة بس كلامك السبب :)
السلام عليكم ورحمة الله وبركاته
جزاكِ الله خيرا علي الطرح
وطرحك دا خلاني افتكر سنوات عمري و حكاياتي مع المسيحيين في حياتي
انا تعايشت مع اكتر من نموذج في خلال مراحل حياتي .. جيران ومعارف وعشرة عمر مع الاهل وزمايل
بس ممكن اعتب عليكي في حاجة في الاول :) ؟
انتي ليه بتلقي عليهم السلام ؟
وتفرضي عليهم انهم يردوا "وعليكم السلام "
في حين لو واحد علي غير دينك قالك السلام عليكم ..
سنة نبيك المصطفي صلي الله عليه وسلم بتقول انك تردي ب "وعليكم" ؟؟
الاولي يا اختي انك تحيي الاخر بتحية محايدة .. ولن تنقص من رغبتك في افشاء السلام و لا القاء تحية الاسلام بس علي المسلمين والله اعلي واعلم
وقد قال رسول الله صلي الله عليه وسلم :
لا تبدؤا اليهود ولا النصارى بالسلام وأما إذا سلموا فإنه يرد عليهم (وعليكم) بدليل ما رواه مسلم في صحيحه : صحيح البخاري الاستئذان (6258) ، صحيح مسلم السلام (2163)
احساس المسلم باعتزازه بدينه اتنقل منه لأولاده ..
بس الانتقال دا في حالات كتير متنقلش صح ..
لان المسلم الحق عارف هو معتز بدينه ليه و ايه السبب و عارف ليه الدين عند الله الاسلام ومتبع لأوامر الله ونواهيه..
ياستي مش انتي اللي اتريقتي
اصل اصحابي بيشوفوني ومش بيعلقوا
بينتظروني باليل وكل واحد يقول اللي هو عاوزه
انا شاعر بالذنب من الصبح
ولله ما انتي المقصوده يا استاذه
اليس فى بلاد العجائب
وعليكم السلام ورحمة الله وبركاته
يانهار ابيض
اقول ايه انا تانى دلوقت
قلت كل اللى فى نفسى وزيادة كمان
اولا
جزاك الله خيرا على اهتمامك واصرارك على النصيحة
لانى شايفة ان اهم اسباب فشلنا بعدنا عن اننا ننصح بعض مع ان ده جوهر الدين
الامر بالمعروف والنهى عن المنكر
ثانيا
عتابك فى محله
بس نقطة القاء السلام عليهم
انا كنت عايزة اعرف عنها معلومات زيادة
علشان كده قلت انى مش عارفة اعمل ايه
حضرتك قلت ان الحديث فى الصحيحين
بس فاضل نقطة صغيرة
عايزة ان شاء الله اتعرف على تفاصيله
او بمعنى اصح
الفقهاء زمان تعاملوا معاه ازاى
والتعامل والفهم ده للحديث كان نتيجة لفهمهم المجرد ليه
ولا ده كان مرتبط بالظروف وقتها
ان الاسلام دين وليد
والتصرفات البسيطة ممكن تدى اصحاب الديانات الاخرى انطباع ما عن اعتزاز المسلمين به
انا مش بقول رأى
انا بستفسر
لانى حاسة ان دى من الحاجات اللى انا مش فاهماها بوضوح
ثالثا
كلامك عن المسلمين والمسيحيين موافقة عليه جدا بكل حذافيره
بس انا البوست اللى كتبته كان نارى شويه
فاختصرته
وقلت ابدأ بداية هادئة
لكن انا معاك تماما
انهم لا اقلية ولا مضطهدين
بالعكس
المضطهد هو المسلم
الجملة اللى خلتينى اقول الله عليك
هو ده الكلام
ان الدولة فعلا هى المستفيدة من حالة الاحتقان بين الطرفين
مادام الاحتقان ده تحت سيطرتها
حسب وجهة نظرها
هو ده بجد اللعب بالنار
لانها لو اشتعلت فعلا ربنا يتولانا ساعتها
انا سعيدة جدا بتشريفك لى
ونصائحك وعتابك وكل حاجة
باختصار يعنى
ابقى تعالى دائما
معلش حاجة كمان
هو مش تطفل والله
بس حواء
صاحبة مدونة ست من الصعيد الجوانى
اخبارها ايه
هى فاتحة المدونة من فترة لقراء محدودين
انا كنت عايزة اطمن عليها بس
لانى اعرف مدونتها هى وزوجها من فترة
تحياتى لك
لورنس العرب
لا خلاص حصل خير
اصل انا
راجعت تعليقى اكتر من مرة
مش لاقية فيه حاجة
وصعبت على نفسى
ان كلامى واللى اقصده مش واضح للدرجة دى
فدماغى سخنت شويتين
حصل خير
شكرا على اهتمامك
والله يا ريت انتي لو عرفتي عنها حاجة تقوليلي
انا سالت عليه موناليزا اكتر من مرة ومعرفش حد تاني اساله عليها .. ربنا يطمنا عليها ان شاء الله
استني عليا حبة هجيبلك حاجات علي موضوع السلام
انا راعيت ان ممكن يقرأ الموضوع احد المسيحيين فاخترت حديث و سيبت حديث تاني صحيح بردة بس زي ما اتفقنا كده نتبع قول رسول الله صلي الله عليه وسلم ان المسلم كيس فطن :)
هجيبلك كام حاجة بخصوص السلام ولي عودة ان شاء الله
اليس
انا ادعى انى عارفة الحديث التانى
بس مش عارفة اذا كان فى الصحيح ولا لا
عموما
انا مستنية
جزاك الله خيرا على الاهتمام
اصل انا كنت بستسهل
وبعمل بحث سريع من النت
وبعدين نصحونى
مش اعتمد اوى على كلام النت
جزاك الله خيرا
http://www.islamway.com/?iw_s=Fatawa&iw_a=view&fatwa_id=9310
دا كمان فيه تفسير للحديث وسبب قوله في التلت الاول من الصفحة http://www.islamtoday.net/salman/artshow-78-119612.htm
http://www.islamonline.net/servlet/Satellite?pagename=IslamOnline-Arabic-Ask_Scholar/FatwaA/FatwaA&cid=1122528614290
http://www.islamweb.net/ver2/Fatwa/PrintFatwa.php?lang=A&Id=32758
شوفي دول كده و استفِ قلبك وان افتوكِ .. ربنا ينور بصيرتك ويرشدك للحق :)
و معلش عالدوشة اللي عملهالك بس الموضوع اكبر من اللي اتقال بكتير اوي اوي
بصي هو البحث عالنت سلاح ذو حدين ... يعني لما تلاقي المعلومة لازم تتأكدي انها صح من مصادر موثوق منها وفي مواقع كتيرة نحسبها علي خير موثوق في رواياتها
حتي لو عارفة المعلومة لازم تتأكدي منها و من كذا مكان و سندها واصلها كويس .. بقينا في زمن بيخلطوا ويلخبطوا كل حاجة ..
علي اد ما المعلومات ميسرة علي اد ما فيها مغلوطات كتيرة حتي حاجات كنا نعرفها من واحنا صغيرين واهلنا بيتعاملوا بيها كانها صادقة 100% وبعدين الواحد يكتشف ان الحديث دا موضوع ودا ضعيف و هكذا
فنتأكد علشان نرتاح و القلب بردة بيدل علي الحق بفضل الله .. نأخذ بالاسباب في البحث وراء المعلومة و نستفت القلب والله المستعان وهو اعلي واعلم ..
ايو ه ايوه
خلص الدرس يا مس
خلاصة الدرس انى البابا راجل سياسى من الدرجه الاولى
ولما قال انى جمال يمسك بعد ابوه
ده لانه عارف انهم هيستطيعوا يخدوا من وراءه حاجه
ومن الاخر البابا وعن ثقه بيتعامل معنا باجندة خارجيه
ممكن تسالى نفسك البابا بيسافر ليه امريكا كل شهر
على العموم الخلاصه انى الاحتقان زاد
وربنا يستر وميسمعوش كلام الغرب لانهم هم الخاسرون الاكثر خساره
دمتى رائعه يا مس موضوعك لذيذ
اليس
اولا انا اسفة على تأخير الرد
ثانيا
جزاك الله خيرا على تعبك ومجهودك
انا لسه صحيح لم اقرأها
لكن ربنا يسهل
اتشغلت كتير امبارح بعد مانشرت البوست التانى
اقراها ان شاء الله
واكمل كلام معاك
اسامة
شكرا على زيارتك ومجاملتك
ربنا يهدينا جميعا لمصلحة البلد
لان الاحداث بصراحة ماتطمنش
ربنا يستر
إرسال تعليق