ويارب العود يكون احمد
خلصت امتحانات الحمد لله وربنا يستر
الدراسة بدأت وبدأ معاها التعب والارهاق المستمر
أهم حاجة لفتت نظرى
ان الوزارة زى العادة رمت طوبتنا و مهتمة جدا بصحة البنات
وأى زائربيكون كل همه
انه يطمئن على توافر حجرة العزل ووجود الطبيبة
والنظافة ودى حاجات كويسة
بس الكائنات الحية اللى بيشتغلوا مدرسين
ايه ظروفهم بالظبط ؟
البنت بتلبس كمامة أو بتحط منديل على فمها
طيب أنا احمى نفسى ازاى ؟
انا مش مرعوبة أوى ولا حاجة
ومفوضة أمرى لربنا
وبكتب دلوقت وأنا عندى كحة وانفلونزا شديدة
بس بجد فى واحدة صاحبتى سألتنى هى ليه الوزارة مش مهتمة بينا كده
لو احنا جرالنا حاجة هيعملوا ايه فى التعليم؟
طبعا موتتنا على روحنا من الضحك
وقلنالها انها عبيطة
لان فى مليون واحد هيشتغل مكاننا وبأقل من نص مرتبنا كمان
طبعا الانفلونزا بتأثر جامد على الغياب اللى معدلاته بزيادة أوى
وده مخلى كل بنت حضرت يوم وغابت اتنين وجاية لا فاهمة احنا قلنا ايه
ولا بنقول ايه
فى بنات كتير عايشين فى الاستعباط
لما يحبوا يزوغوا من الحصص
أنا تعبانة يا أبلة وهروح غرفة العزل
وبتروح يلاقوا حرارتها عادية يرجعوها
وطبعا بنلاقيها طول النهار بتجرى فى الحوش زى الحصان ولا هاممها حاجة
كمان المدرسة غصب عننا فوضى
لان التعليمات ان البنات ينزلوا يغسلوا ايديهم كل فترة
وكمان الفسحة اتقسمت 2 واحدة لسنة اولى وتانية وواحدة لتالتة
وبتكون عندنا حصص مستمرة وقت الفسحة
باختصار فى شعور بالفشل وعدم التركيز مسيطر علينا
مش عارفة
ربنا يكون فى عون الطلبة
أنا عن نفسى موافقة جدا على اقتراح تأجيل الدراسة لغاية شهر مارس
ونختصر شوية من المناهج البايخة وتكون الدراسة كلها فى الصيف
مش فاهمة ايه الغلط فى اقتراح زى ده
البيئة عندنا حول المدرسة بشعة جدا
الناس عايشة فى ظروف وبيوت مش ادمية
اكيد من حقهم مايكونش عندهم اى خطة أو وعى بالوقاية والنضافة والكلام ده
أنا لازم أفهم الناس فى الاول انهم بنى ادمين
وبعد كده انصحهم يعملوا ايه فى الانفلونزا
الناس معندهاش رفاهية تشترى لولادها ديتول وكمامة
لانهم اساسا بيحاربوا علشان يأكلوهم
ياولى الأمر
لما حصل زلزال بالمدينة على عهد عمر بن الخطاب
ضرب الار ض بالدرة
وقال لها اثبتى
الم أعدل فوقك
اكيد مفيش كلام بعد كده
40 التعليقات:
جاى امسى على حضرتك
و بعدين اعلق
ازيك يا استاذة
يا حالولى
تانى تعليق
لووووووووووووووووووووووولى
العود احمد
فينك يا تيمووووووووووووو
ليك وحخشة جامدة جدا
وناخد كمان التالت
عشان التالتة تابتة
ونقول ازيك عاملة ايه من غيرى كويسة مش كده
الحمد لله خلصتى امتحانات
كفاااااااااااااااااااارة
وطالع خلاص بكرة براءة عانام وعاصحى على رواقة
بالنوسبة للبوست فمعاكى حق الصراحة انا اول ماعرفت نظام التلات ايام ده
والله صعوبتى عليا
وقولت حرام عليهم ماانتو برده بنو ادمين
بس هى دى مصر ياعبلة
لالا استنى اما اضحكك
كل يوم واحنا داخلين الكلية من البوابة يرشوا علينا سبرتو احمر عارفاه اللى العيال بيشربوه ف الشارع
لأ واى واحدة تقوله لأ عنيك ماتشوف الا النور
اما بقى الموظفات ولا الدكاترة فطبعا على رجليهم نقش الحنة
يعنى الاية عندنا بالعكس
يلا عشان ماطولش عليكى اصلى لسه راجعة من المدعوقة
وليا عودة عشان اكمل رغى
لانك وحشتينى مووووووووووت
وسلمى على زوزة والطور قصدى الدكطور
ابلغ كلمة فى البوست هى ديه
لازم أفهم الناس فى الاول انهم بنى ادمين وبعد كده انصحهم يعملوا ايه فى الانفلونزاالناس معندهاش رفاهية تشترى لولادها ديتول وكمامة لانهم اساسا بيحاربوا علشان يأكلوهم
استاذ بدراوى
الله يكرمك ويسلمك
انا عارفة انى اكبر منك سنا
بس حضرتك واستاذة دى
محسسانى بالتوتر شوية
هعمل نفسى ماقرأتش تعليقك
علشان اكتب تعليق تانى
ست الدكتوره
ازيك ياقمر
والله كنت على بالى النهارده
وقول لنفسى زمانها مطحونة ومخدتش لسه على جو الكلية
انت ليك وحشة اكتر بكتير
ست الدكتوره تانى
انا لسه اخر امتحان كان امبارح وحاسة انى عايزة العب شوية
احب اعرف سيادتك
ان اللمبى خد براءة
اللمبى خد بررررررررراااااااءة
استاذ بدراوى
الله يكرمك
ماهما دول اهم كلمتين
بس انا عايزة اقول لك على حاجة
انت مش ناوى تفتح المدونة قريب
مش عارفة مع انى لسه جديدة خالص فى التعامل مع الكمبيوتر والنت والدنيا دى
بس اتعلقت بيها جامد
وحاسة انى مش قادرة استغنى عنها
وبحس انى مدونتى دى فى مقام بنتى حبيبتى
اقولك على حاجة
انا عاملة مدونة تانية انا بس اللى بقرأها
بفضفض فيها مع نفسى بعتبرها مذكرات الكترونية
اعمل كده لو عايز تحس انك لوحدك
وبعدين ما تحرمنيش انى اشوف القالب بتاعى
بروح تانية
تحياتى لك
ارجو انى مااكونش صدعتك
او ادخلت فى مواضيع متخصنيش
ست الدكتوره تالت
الفراغ وحش يااوختشى
ههههههههههههههه
باباك حكى لى على الموضوع ده النهارده
طيب ماالناس مش مقصرين اهو
ايه مفيش رحمة؟
لا بس بجد عندنا
اول مرة احس ان الموضوع بيطبق صح على اد مايقدروا
مع ان فى ناس كتير مش مدرسين بس
فى التربية والتعليم
شغلهم اتضاعف
ربنا يعينهم
بس ضميرهم صاحى اوى المرة دى
ربنا يسترها علينا كلنا
استاذتنا
من الحاجات اللى هتحصل عن قريب انى بمجرد دفع مصاريف الكتب المدارس هتقفل
واللى كان بيحارب الدروس الخصوصيه دلوقتى غصب عنه بيدعوها لتقوم بدور المدرسه وانا اسف مافيش حاجه اسمها تعليم فى مصر
اسمها اشترى شهاده سواء كان تعليم حكومى اوخاص
دى وجهة نظرى
اشكرك بوستك ده اتاخر اوى
دمتى رائعه
اسف ليه يااسامة
كلامك صح
وكلنا بنقوله
فعلا مفيش تعليم فى مصر
والاسوأ قادم
انا واثقة من كده
بس ادينا بنعمل لربنا
لغاية مايرحمنا من اللى احنا فيه
البوست فعلا متأخر
لانى مكنتش فاضية
كنت بدخل بعض المدونات بس علشان احس انى لسه عايشة فى الدنيا
وفكرة انه مستنى يلم المصاريف
دى واردة جدا
وكمان هو قال ومعاه البيه بتاع وزارة المالية
اللى بيصرف علينا من جيب السيد الوالد
ان الغاء الدراسة هيكلف الدولة مرتبات وكادر المدرسين على الفاضى
طبعا لاتعليق
تحياتى لك يااسامة
لقد خلقنا الله احرار ..
اولا ...حمدالله على السلامة ..و يارب تنجحى فى الامتحانات
ثانيا ..الحال من بعضه انا كمان عندى انفلونزا..ادعيلى وادعيلك.
ثالثاً..الدرس انتهى لموا الكراريس (الدرس طبعا ..ان الحكومة أو الوزارة فاشلة فى كل حاجة )
رابعا .. يانهار ابيض هو لسه فى رابعاً..ايوة طبعا ...رابعاً = تحياتى
بخصوص استاذة او حضرتك
هو انا مش بقولها عشان حضرتك اكبر سناً منى لانى طبعاً معرفتش سنك
انا بقولها لأى حد يستاهل انها تتقاله
ده حتى ناس اصغر منى بقولهم حضرتك
لدرجة بيستغربوها
بس مش اى حد يتقاله حضرتك الناس
اللى تستاهلها
و اسف لو الكلمة ضايقتك
----------
بخصوص المدونة
انا فتحتها تانى
بس مش حكتب فيها لفترة اخرى
بس موجودة و قالب المدونة زى ما هوا
اما بخصوص مدونة تانية انا بس اللى اقراها
لو حابب اكتب شىء يبقى لوحدى
اكتبه فى مدونة ليه ، ممكن اكتبه فى ملف وورد و احتفظ بيه من غير ما نشره
على فكرة اللينكات اللى فوق فى هيدر المدونة ممكن تستفيدى منها انا عملت كدة
حتى لو دخلتى المدونة عندى حتلاقيها فوق اتغيرت
لو عاوزه تستفيدى من اللينكات اللى فوق ممكن حضرتك تبعتيلى كود المدونة كله
اغير فيه تغيير بسيط و ابعتهولك تانى
تحطيه فى ايديت html
ماينفعش نأجل الدراسه - العيال هاتتشر في الشوارع
على اسوأ الفروض الوضع كده أفضل كثيرا
وقالوا ان الوبار سيكون متوطن داخل البلد 5 سنين - وعلينا التعامل مع الموقف
أما عن الطلبه - احمدي ربك على اللي انتي فيه
انا اختي الكبيره كانت بتدرس لتجاره بنات
عارفه يعني ايه ثانوي تجاري بنات
أكيد طبعا عارفه
ومصلحة المعلم لن يراها أي احد
المهم ان الطالب يكون تمام التمام
ومن امتى اصلا حد بينظر للمدرس
المدرس من زمان اتهان بسبب الاعلام
من ايام نجيب الريحاني مرورا بمدرسة المشاغبين وفيلم الشقه من حق الزوجه
احنا محتاجين نعمل -فورمات- للبلد بالكامل
well
اولا
الله يسلمك واللهم امين وجزاك الله خيرا على الدعاء
ثانيا
ربنا يشفينى ويشفيك ويشفى الجميع يارب
ثالثا
اصل انت مش واخد بالك
انا مدرسة
ماينفعش معايا الدرس خلص دى
خلص يتعاد تانى يابابا
هيتقال السنة الجاية واللى بعدها
مفيش درس عندنا بيخلص
الدفعة دى خلصته
لسه فى اجيال كتير مكتوب عليها الهم ده
ارحمنا يارب
معلش اصل انا لسه جاية من عندنوارة مخنوقة جدا
رابعا
دى اهم حاجة
لا يااستاذ
انا اللى تحياتى لك
بداروى
حضرتك انا مش عارفة اشكرك على ايه ولا ايه
على ذوقك
ولاأدبك
ولامجاملتك الرقيقة
ولا على روح التعاون اللى عندك
ولا على المتابعة والاهتمام
ولا على الخدمات الله يكرمك اللى انت بتتطوع تقدمهالى
فكرة انى اكتب على ملف ووردبالرغم من بساطتها
تصدق ماخطرتش على بالى
يمكن علشان انا لسه جديدة ومبهورة بجو المدونات والصور والادوات
بس لو بتتكلم على الامان
هى مجرد فضفضة وجداول لتنظيم الوقت
ومفيهاش اى حاجة شخصية اوى
فحتى لو حصلت مشكلة وحد قرأها مش هتمثل اهمية يعنى
بس برده انت قلقتنى ملف الوورد امان اكتر
عرضك الكريم
هو اللى خلانى اتأخر فى الرد فى التعليق
لا والله انا مكنتش اقصد انى استعير حاجة
ده مايمنعش ان مدونتك مميزة ودى مش مجاملة
بس انا كنت بقرأتعليقاتك كتير عند نوارة وسبهلله ومدونات تانية
ودخلت مدونتك وهى بالقالب القديم
وعدت فترة
ولما شفت تشابه القالب
عجبتنى جدا فكرة الروح المختلفة
انى اشوف الشكل اللى عجبنى بروح حد تانى
علشان كده
ده من ضمن
مش كل اسباب انى اتضايقت من قفل المدونة
بصراحة
حضرتك ومجموعة كبيرة من المدونين
بتفرحونى
لما بتضيق الدنيا
وبشوف اخلاقكم الحلوة دى
بقول لنفسى ما شبابنا كويس اهوه
وبكره ان شاء الله احسن من النهارده
معلش على الرغى
بس ده طبع وطبيعة عمل
واسمح لى لو ده مش يضايقك
انى بعتبرك
اخويا الصغير اللى انا فخوره بيه
لانك فعلا زى اخويا الصغير
مش انت لوحدك
ويل واسامة ومصعب ومهندس مصرى واحمد سعيدوناس كتير اوى
لا كفايه كده
انا رغاية اوى
لورنس العرب
وجهة نظر حضرتك معقولة جدا
فعلا اكيد هما قلقانيين من الفراغ اللى هيكون موجود عند الولاد لو الدراسة أتاأجلت وخصوصا شباب الجامعة
بس بجد
احنا عندنا مشاكل كتير
والانفلونزا والاجراءات المصاحبة ليها
بتزود مشاكلنا ومخليانى بحس بالفشل كده من اول السنة
انا كنت بابدأالسنة متفائلة
وفرحانة وانا بشترى الدفاتر ولا اكنى طالبة
السنة دى خنقونا بدرى اوى
مع كل همومنا فى التعليم
نفسنا مسدودة
ومتوترين وعايزين نرسى على بر فى دراسة ولا لا
مش عارفة انا بجد
مش عاجبنى تصرف الحكومة دى فى اى حاجة
قلبى مع اخت حضرتك
فعلا انا فى رحمة
وانا طالبة
كنت بحس ان بنات الثانوى التجارى دول
كائنات غيرنا تماما
لا بناتنا رحمة وتحت ايدينا ومهما عملوا
ممكن السيطرة عليهم
ربنا يقويهاويسترها معانا دنيا واخرة
لقد خلقنا الله أحرارا
اولا البوست جميل ولازع فى نفس الوقت فجميل لانه يناقش مشكلة إجتماعية ولازع لاننا نعلم ذلك ولا نستطيع فعل شى
وللأسف كل ما تفعله الدوله من أجل المظهر العام فقط ولا يهما العملية التعليمية كاملة معندنا المناهج أصبحت للأغبياء من الطلبة والمعلومات فى الكتب تدرس على انها حديثة وهى فى أمريكا بيدرسوها كتاريخ والهيئات التعليمية إللى فى مناطق بعيدة عن العاصمة عبارة عن مقالب زبالة وغيره وغيره
واظن إن المقولة دى صعب تحقيقها فى العصر الحالى
لما حصل زلزال بالمدينة على عهد عمر بن الخطاب
ضرب الار ض بالدرة
وقال لها اثبتى
الم أعدل فوقك
شكرا على البوست
المهاجر
يانهار ابيض
حمدا لله على السلامة
ايه الغيبة الكبيرة دى
شرفتنى يافندم
كلامك عن الدولة والتعليم صح طبعا
معنديش تعليق عليه
اما عمر بن الخطاب
فده اللى فى الحتة اللى فى القلب من جوه
مالوش حل
يعنى هيبقى مفيش عمر ومفيش كلام عنه كمان
ادينا بنصبر نفسنا
تحياتى لحضرتك
اولاالكلمه الاخيره خلت رعشه غريبه تمشى بجسدى رضى الله عنك ياعمر
وبجد ربنا معاكم
والعبال فعلا سايقه فى الاستهبال على الاااااااااااااخر
بيحكولى برده البنات نفسه غياب واستعباط وفسحه
اه لما نراقب نفسنا وضمايرنا مش هيبقى فى اوبئه
وحشتييييييييييييييييييييييييييييييييييييييييييييييييييييييييييييييييييييييييييييييييينى
اللهم اهدى الياهو امين يارب
ازيك يا ميس
حمدا لله على سلامتك
والله الكل مرعوب
مش من المرض من الاجراءات اللى اى مستشفى بتاخدها لما بيجيلهاواحد متأكد انه عنده انفلونزاخنازير
كانت منى الشاذلى جابت صحفى عنده انفلوانزا خانزير وشرح لها قد ايه هو اتبهدل فى مستشفى الحميات
لول ان عنده واسطة كان زمانه مات من غير علاج
ربنا يلطف بينا
ويستر على العيال وعلى المدرسين
============
حلوة اوى المقولة بتاعة عمر ابن الخطاب
اول مرة اسمعها
قشعرت لى جسمى
جى جى
عاملة ايه ياحبيبتى
انت اللى وحشتينى اوى والله
والياهو بقى كويس الحمد لله
بس انا مش رضيت اتكلم حسيت انك ممكن تكونى مش عايزة كلام دلوقت
طمنينى عليك
اماعمر بن الخطاب ده زى ماقلت قبل كده
هو اللى فى الحتة اللى فى القلب من جوه
بيمثل الحاجات اللى انا عايزاها بالضبط
رجال صدقوا الله ورسوله
سبهلله
اهلا بك ياباشمهندسة
نورتينى
درجة الخوف كل يوم بتزيد
مثلا
كل اللى عنده طفل صغير بيمشى فى اجراءات كتير دلوقت علشان ابنه مش يطعم فى المدرسة
انا لسه جاية من عند نوارة
قلقتنى بزيادة
الواحد مش عارف الحكاية هتوصل لفين
ربنا يستر
اختي كانت اول ما اتعينت -هي حاليا عندها 40 سنه وهي اكبر مني ب 10 سنين- اتعينت في مدرسة في منطقه اسمها المشروع الامريكي بحلوان
المدرسه دي ثانوي تجاري ومشتركه
يعني فيها اولاد وبنات
بس كده - كفايه عليكي - تخيلي انتي الموقف!
لورنس العرب
شكررررررررا
تخيلت !!!
ده ابتلاء مش شغل
ربنا يعينها ويقويها ويصبرها
انا متأسف جدا على حذف الموضوع
الحقيقه ده من المواضيع النادره اللي قمت بحذفها بعد ان كتبتها
انا لا أحب الفتنه
واقدر تماما اخواني العرب
لكن مع الاسف هم لا يقدروننا على الاطلاق
والبوست كان بيقلب المواجع
فقلت احذفه افضل عشان الوضع العام اصلا مش ناقص
انا بعتذر لك عن جهدك اللي اخدتيه في كتابة الرد
لورنس العرب
حصل خير
انا افتكرت الكمبيوتر خرف
لانه عذبنى ومش عايز يقبل التعليق
وجهة نظر حضرتك لها احترامها
مهو ده هايعمل لي مشكله
كل اللي هايظهر عنده هايروح يتفرج على الموضوع مش هايلائيه!
ده على الرغم ان تقريبا محدش بيزورني إلا كام واحد
صحيح
انتي مش بتيجي الاتوبيس ليه؟
لورنس العرب
هو صحيح الوقت كان متأخر
بس انا اتفسحت شوية فى الاوتوبيس
مدونة لذيذة بجد
وفكرة جديدة
بس ياريت مع رقم المحطة تديها اسم كمان
السلام عليكم
العود احمد ومحمد ومحمود كمان ياستى
ههههههه
حمدالله على السلامة
وان شاء الله موفقه وناجحه باذن الله
....
طبعا عارف كل اللى بتحكى عليه لانى عايش فيه
ومش هقدر اعلق على حاجه
لانى هطق ومش عاوز اتكلم
بس احنا خلاص فى مدرستنا سيبناها على ربنا
رجعنا المدرسه كلها بعد ماكنا قاسمينا 3 ايام و3 ايام
3 للولاد و3 للبنات
لا حد عارف يشرح ولا حد فاهم حاجه ولا حد ملتزم
قلنا مش هينفع كده
يبقى ترجع زى ماكانت واللى يحصل يحصل
وربنا هو الستار
المهم حمدالله على سلامتك
نورتى بلوجر من تانى
تحياتى
المعتصم
نفس شعورى والله لما أقرأ كلام حضرتك عن التدريس
بس هو انا غلطت فى حاجة
بدأت الدراسة وانا حاسة انها هتتعلق بعد فترة
لكن بداية من يوم الاحد ان شاء هكيف نفسى على الوضع الجديد
علشان القلق والتوتر ده
بيقلل الانجاز بجد
لكن اللى انا متأكدة منه تماما
ان بلدنا دى ربنا يستر عليها
محتاجة معجزة تخلصها من الفاشلين
اللى على درجة وزير ومافوقها
تحياتى لحضرتك
وربنا يصبرنا
فى إطار حملة مدونتى عنوانى تستضيف رابطة هويتى إسلامية المدون محمد غالية صاحب مدونة هل تبحث عن السعادة
فى نقاش عام وحوار مفتوح حول موضوع الحملة .
والدعوة مفتوحة للجميع للمشاركة معنا فى النقاش من أجل الإفادة والإستفادة
نتمني منكم مشاركتنا من أجل تدوين أفضل
تحياتنا
أسرة رابطة هويتي إسلامية
رابطة هويتى اسلامية
اهلا بكم
علم
وجارى التنفيذ
والله ياأبلة
أحنــــا كمان
هيئتنا مهتمة
بالعيانين بس أما
الاطباء فدول بقى
يروحوا يموتوا مش مشكلة
المهم العيانين ما يشتكوش منك!!
انا عندى تعليمات ملزوقة على
الحوض بطريقة غسيل الايدى
وكده يعنى بس معنديش ميه!!
والله الحنفية فى الاوضه عندى
مقطوع عنها الميه بقى لها
كذا شهر وما راضين
يصلحوها!!
المهم عملتى ايه
فى الامتحانات ؟
norahaty
ازيك يادكتورة
اولا نورتينى
ثانيا انا اسفة فى تأخير الرد
ثالثا
احمدى ربنا ان عندكم حوض ياماما
انتم طماعين كده ليه
عارفة النهارده كان عندنا زيارة من مدير الادارة
احنا بقينا عايشين فى هنا
محدش بيقولنا انتم بتعملوا ايه
ولا تقويم شامل ولا تعلم نشط
ولا اى حاجة
كل اللى بيزورنا بيدخل رأسا على دورات المياه
والراجل زعق للمديرة المطحونة بجد
ليه؟
لانه جه بعد الفسحة مباشرة
والبنات كانوا شالوا الصابون من على الحوض
ايه اخبار الصابون عندكم؟
الامتحانات الحمد لله كويسه
والنتيجة على وشك الظهور
ادع لى
شكرا على سؤالك
طبعاً مفيش أهتمام بالمدرسين
والأهتمام كله للطلبه
لأن خطه الوقايه التى وضعها الوزير
خطه منظره وتصوير
لو فيه خطه وقايه بجد كان المدرسين وضعوا فى الحسبان
وربنا يحفظنا
ولله الأمر من قبل ومن بعد
السلام عليكم
دي أحدث صيحات الهاء الناس عن مشاكل المصريين
واحد من العمال
اهلا بك يافندم فى اول زيارة
يارب ماتكونش الاخيرة
كلام حضرتك صح
بس بالرغم من ضيقى بخطة الوزير
لكن انا مكنتش مصدقة حتى انهم يهتموا بصحة الطلاب
هما وصلونا لمرحلة
كتر خيرهم على أى حاجة يعملوها
ربنا يديهم على اد نيتهم
تحياتى لحضرتك
مصعب صلاح
ازيك يامصعب
عامل ايه فى المذاكرة
بس الالهاء عن مشاكلنا
كتر اوى
وصل لمرحلة الغباء
المشاكل عدت كل خطوط الاحتمال
تحياتى لك
إرسال تعليق