فى المصرى اليوم النهارده مقال عن دكتور يونان لبيب رزقفرحت جدا لان العظيم ده أستاذى
هو مش درس لنا غير مادة واحدة فى سنة رابعة
وهى تاريخ مصرا لحديث والمعاصر
كنا زعلانين جدا إنه هيدرس لنا
وقلنا لنفسنا
الدكاترة الكبار المشهورين دول
مش بيشرحوا حاجة وبيتعاملوا بكبر ملحوظ
وكمان المادة دى احنا زهقانين منها وحافظنها
إيه يعنى الاضافة اللى هتحصل لنا بدراستها؟
وكمان المحاضرة 8 صباحا
يعنى لازم البهدلة فى المواصلات على الصبح
وشاء الله سبحانه
ان دكتور يونان يخيب كل توقعاتنا
أولا
واقف مستنينا قدام المدرج
بينادى علينا بحنان وأبوة كانت غريبة بالنسبة لنا
أنتم سنة رابعة ؟
أتكسفنا من نفسنا ودخلنا المحاضرة
واحنا مشاعرنا بتتراوح بين الدهشة والخجل منه
وبدأت المحاضرة
لا
وبدأت المتعة
شرح وافى وجميل جدا
والاجمل الطريقة اللى عرض بيها التاريخ
كان بيدرس لنا الاحتلال البريطانى
ودرس لنا بطريقة جديدة
عرض علينا تقرير مهم جدا لسياسى بريطانى شهير هو ا للورد دافرين
ومن دراستنا للتقرير ده بنفهم سياسة الاحتلال البريطانى فى مصر
محاضرات كانت شيقة جدا
والجديد كمان ان المحاضرة ساعة ونصف
بيشرح الراحل ساعة كاملة
ونصف ساعة بتاعتنا احنا
لطرح الاسئلة فى أى موضوع يخطر على بالنا
كنا محتارين نستمتع بالشرح الجميل والمعلومات الجديدة المعروضة بأسلوب رائع
ولا يكون استماعتنا بوقتنا احنا
اللى أزعم أنه شكل كتير من وعينا السياسى
أنا كنت خايفة أتكلم معاه
علشان ماأتعرضش لسخرية أو تجاهل لسؤالى
وفاكرة انى سألته عن حماس وحزب الله
اللى كانوا بالنسبة لى وقتها حاجات جديدة تماما
وكنت عايزة أعرف ليه بيتقال عليهم ارهابيين
وأنا مش حاسة منهم بكده
لكن
مش ممكن
إبتسامته الحانية
وكلامه الهادى وهو بيناقشنى
وبيقول لى أنت اللى هتجاوبى
وأنت اللى لازم تحددى
مين الوطنى ومين الارهابى
شوفى وقررى عملياته بتوجه لمين وقررى أنت
منى الشاذلى كانت عملت معاه حوار رائع
وكنت هموت قدام التليفون علشان أكلمه
لكن الكنترول ربنا يسامحه رفض إتصالى أكتر من مرة
لانى معنديش سؤال ليه
كنت عايزة أشكره بس
ياريتهم كانوا خلونى أكلمه
أول مرة شفته وأنا فى سنة اولى
كانت الكلية عاملة ندوة بمناسبة عودة طابا
وهو كان فى الفريق المصرى
وحكى لنا فى مسرح الكلية عن جهوده هو والفريق المصرى
والمناورات الاسرائليية لكسب القضية
وأنا فى الدبلومة
كان من حظى اننا خمسة أخترنا المادة اللى بيدرسها حضرته
عارفين يعنى إيه
أنا وأربعة بس من زملائى نقعد مع دكتور يونان
ويشرح لنا
مع أن حالته الصحية لم تكن مستقرة بالمرة
واثار التعب كانت بتظهر كتير على وجهه
لكن عمرها ماظهرت فى المجهود المبذول معنا
كفاية انه لما اتوفى بعد تخرجى
قريبة لى كلمتنى تعزينى فيه
من نعم ربنا على
انى خريجة كلية البنات جامعة عين شمس
وبقول بصوت عالى
انى اتهنيت
اه والله اتهنيت
سنة رابعة كنت فى حالة نفسية غريبة
مش عارفة أستمتع بالمحاضرات
ولا أحزن على الوقت اللى بيعدى
لانى خلاص هتخرج
دكتور يونان
واحد
من الاساتذة اللى ربنا كرمنى بيهم
على سبيل المثال
الدكتورا للى بحس ان عنيا بتدمع لما بفتكره
دكتور محمد عبد الرءوف
ودكتور سعيد اسماعيل على
درس لى فى الدبلومة
لا
ماينفعش دلوقت
هظلمهم
لكل واحد منهم بوست مستقل ان شاء الله
وأملى أن يكتب لهم مجهودهم فى ميزان حسناتهم
34 التعليقات:
و انا اللى جاى اعلق على البوست اللى فات و اقولك
مش ناوية تكتبى بوست جديد بقى
عشان معلقش عليه
الاقيكى كاتبة بوست جديد فعلاً
ههههه
حقراه و ارجع تانى
تعليقك ده
أجمل حاجة حصلت النهارده
أنا مستنية التعليق التانى
وش محمر و مكسوف
لا أجمل و لا حاجة
و بعدين انا بتكسف من الكلام ده
هههههههههه
بوست جميل اووووى
انا عندى كتاب لدكتور يونان الله يرحمه
اسمه تاريخ الأحزاب السياسية فى مصر
كل ما ابتدى اقرا فيه يكبس عليا النوم
شكراً على البوست ده
يونان لبيب رزق
لازم لما أسمع الاسم ده افتكر قيمة كلمة دكتور
مع اني مش بحب التاريخ لأنه نسبي و كذاب
نسبي لأنه شبه مستقر و شبه متغير
و كذاب لأنه نسبي
لكن معرفة وقائع الواقع
م الآخر الدكتور يونان و الدكتور عبد الحليم نور الدين
مع انهم كبار جدا جدا علينا اننا نفهمهم ، الا انهم أبسط مننا في طريقة التعامل ، و ده يخلينا نرتبط و نتقدم بيه
لا مفيش حاجة تكسف
مش قلت لك انك زى أخويا الصغير
بعد اذنك صحصح شوية وكمل الكتاب
علشان الراجل المحترم ده يرتاح فى تربته
بس هو فى كتبه
مش لذيذ اوى زى محاضراته
شرفتنى
ومستنية بوستك الجديد
رجل تحت الصفر
أهلا بحضرتك فى أول زيارة
واتمنى ماتكونش الاخيرة
هو فعلا ودكتور عبد الحليم وناس كتير يستحقوا الاحترام
لعلمهم وأخلاقهم العالية
رأى حضرتك فى التاريخ
هيخلينى مش هنام لغاية مااحس انى دافعت عن حاجة من أجمل الحاجات اللى حبيتها فى حياتى
للاسف مش هقدر أناقش حضرتك دلوقت
لان النت
عامل مشاكل كتير
وخايفة يبوظ وانا بعلق
لنا عودة ان شاء الله
للنقاش حول رأيك فى التاريخ
شرفتنى
ما هو واضح مش لذيذ خالص
ههههههه
ما هو لو لذيذ مكنتش نمت
و انا بقراه
كتاب ممل اوووووى
ان شاء الله قريب بس مش قريب اووى
بوست جديد
هناك أقلام حرة ولها مداد عالي الفكر وله طنين يبقى أثره في ذكريات التاريخ سواء في الماضي أو المستقبل أو الحاضر، والدكتور يونان لبيب رزق هو أحدهم.
خلاص فكرة
وقت ما تنزلي بوست تدافعي فيه عن مادتك
هاجي أسلم عليكي و أناقشه و امشي و ارجع تاني
خلاص المدونة دي بقت زي مدونتي
قُـم لِـلـمُـعَـلِّمِ وَفِّهِ التَبجيلا. كـادَ الـمُـعَـلِّمُ أَن يَكونَ رَسولا
تحياتى لمعلمك
الجامعه مجتمع واسع
لكن قليل منهم المحترم
ولكن هذا الرجل مشهور - على غير المتوقع انه يتعامل بعدم تعالي!
استاذ بدراوى
ماشى ياعم
مبروك العودة للتدوين
للاسف مش هقدر اسمعك شرح دكتور يونان
فمفيش قدامنا دلوقت غير الكتاب اللى مش لذيذ
انا فعلا درست كتاب ليه بس مش هو اللى كان بيشرحه
اسمه اوربا فى عصر الرأسماليه
كان خنقة فعلا
لكن الكتب اللى شرحها
انا لسه فاكره كلامه ونبرة صوته
الشجرة الام
شرفتينى بالزيارة
هو فعلا دكتور يونان ينطبق عليه وصف حضرتك
والاجمل انه مش لوحده اللى كان كده
انا فى المدرسة بيستغربوا عليا انى فاكرة الحاجات اللى اخدتها فى الكلية
بالرغم انى غالبا مش فاضية اراجع عليها
بسبب مجهودهم
ربنا يجازيهم عنا كل خير
الله يكرمك ياويل
نفسى اوصله تحياتى وتحياتك مش عارفة
ربنا يسهل
رجل تحت الصفر
اتفقنا
انا يشرفنى ان حضرتك تعتبر المدونة زى مدونتك
ومستنية نقاش وكلام حضرتك فى اى وقت
شرفتنى بالزيارة
قرأت لحضر تك تعليق عند اليس
ربنا يجازيك عنه خير
زاد من احترامى لحضرتك
لورنس العرب
اهلا بحضرتك
هو فعلا كان غير متعالى
ومش بخيل ابدا بعلمه
ومش لوحده الحمد لله
مرة كنت فى اول المدرج
ولقيته كل فترة بيبص ناحيتنا اوى
وانا مستغربة لاننا كلنا منتبهين ومستمتعين
وفوجئنا بيه بيقوم من مكانه
وبييجى ناحيتنا
وبيشيل مقشة مسنودة على اول صف واحنا مش واخدين بالنا
وبيضحك وبيقول بتشتتنى ومخليانى مش عارف اركز واتكلم كويس
:(
السلام عليكم ورحمة الله و بركاته
انا مش عارفة اشكرك اد ايه او اتاسف اد ايه اني اتاخرت في الرد عليكي
بس حتي مدونتي لم تنصفني و قفلت بابها في وشي:( علشان تبقي هي والدنيا كده في نفس واحد
الحمد لله علي كل حال
بردة مش عارفة اشكرك بس شكر الله لك سؤالك
ربنا يبارك فيكي وينورلك بصيرتك
يابختتتتتتتتتتك
انا قاقعد انق عليكي و احسدك لحد اما اموت
فعلا رجل عظيم و غير عادي
كتابه"مصر المدنيه"كان ليه تأثير كبير عليا و علي طريقة تفكيري
شكرا علي التدوينه الحلوه دي
تحياتي
سورى سورى
انا قراته بس نسيت اعلق
بجد بوست رائع
بيعظم احترام المعلم
ولكن للاسف نحن فى زمن قل فيه احترام وتقدير المعلم
وبالنسبه لاستاذك يونان لبيب
انا بعتبر انهو من القلائل المحيادين للتاريخ
لأ خالص الموضوع مالوش علاقة بحضرتك
كل الحكاية انى حسيت انى غلطت لما حاولت اشارك الناس فى مشاكلى و ده لانى كنت منتظر ناس معينة تعلق و تفيدنى
خاصة الناس ديه انا بعزها اوى و بحترمها
بس للأسف مش كل الناس اللى انا توقعت الاقى تعليقها علقت
بس واضح انى بدى عشم كبير فى الناس
تعليقك فادنى جداً
شكراً ليكى
اليس
حلوة الدعوات اللى باخدها منك دى
اللهم امين
ربنا يفتح ابواب الدنيا والاخرة فى وجهك
ويصلح لك الاحوال
يسارى نوبى
أهلا بحضرتك
تصدق انا لم اقرأ كتابه مصر المدنية
لما اشوف كده اقرأه
فعلا انا اتهنيت انه استاذى
شرفتنى
شكرا يااسامة على مرورك وتعليقك هو كان فعلا من الدارسين الاكاديمين للتاريخ
وبيتعاملوا معاه بحب وغيرة عليه
شرفتنى
استاذ بدراوى
ماتندمش على اى حاجة عملتها بنية كويسة
انا كتبت تعليق عندك
السلام عليكم
احييكي على مدونتك الجميلة الرائعة بأمانة
واحييكي اكتر على البوست الاخير ده
الدكتور يونان الله يرحمه كان علم من اعلام التاريخ والفكر المصري اللي عمرنا ماهننساه ابدا
كنت بحب اسلوبه جدا في سرد الوقائع التاريخيه وكأنها حكايات من الف ليله وليله
أسلوبه كان رصين قوي ومرسل في ذات الوقت
الله يرحمه
دمتي في حفظ الله
قلم رصاص
سعيدة جدا بتشريفك لى فى مدونتى
وسعيدة جدا بمجاملتك الرقيقة
شرفتنى
واتمنى الزيارة تتكرر
د.يونان لبيب رزق.من اساتذة التاريخ
الذين اثروا الدراسات التاريخيه لمصر المعاصره .ومن الذين بذلوا جهد فائق
فى موضوع تحكيم طابا..
وموضوعك جميل ومن القلب.
شكرا.
سلوى
أهلا بك فى أول زيارة مكتوبة
شكرا على مجاملتك
هو فعلا من الاساتذة الكبار
بس انا اللى عجبنى فيه غير المادة العلمية اللى ممكن تكون موجودة عند غيره
تواضعه
وانه بيشرح باستفاضة ومش بيبخل بعلمه
واسلوبه الهادى والحانى فى التعامل معنا
تحياتى لك
صراحة الدكتور يونان لبيب رزق
من القلائل المحترمين
فكما فادك و علمك
فاد الالاف من الناس بكتاباتة الرائعة
تقبل مرورى
مع خاص احترامى و تقديرى
الزنارى
أهلا بك فى اول زيارة
اتمنى ماتكونش الاخيرة
ماشاء الله دكتور يونان معجبينه كتير
تحياتى لحضرتك
لسة ما سافرتش
حاليا الحمد لله التأشيرات كلها طلعت
وانا فى انتظار التذاكر
خلال يومين تلاتة
بس ماليش نفس اكتب او اعمل اى حاجة
شكرا يا حبيبتى على سؤالك
سبهللة
المهم انك والولاد بخير
ربنا يكتب لك الخير والسلامة دايما
وماتنسيناش لما تسافرى وتبعدى عن المدونة
كنت بحب اوى
أقرأ مقالته
الاسبوعية بالأهرام
واحد فاهم وبيفهم
الناس معــــــــاه
norahaty
هو فعلا كلامه يستحق الاعجاب
بس الاجمل كلامه المباشر
أروع كتير جدا من كل كتاباته
شرفتينى
إرسال تعليق