عيد ميلاد

النهاره عيد ميلاد مدونتى

قبلها كان فى محاولات كتير فاشلة وحياتى كانت بعيدة تماما عن النت

وطبيعى فى الدستورلما كنت اقرأعن المدونات كنت فاكراها حاجة كده بتاعة الشباب الفاضى فطبيعى أنا ماليش فيها

بالصدفة

اتعرفت على مدونة عايزة أتجوز وعجبتنى جدا ومش قرأتها تقريبا أنا أ كلتها فى وقت قليل

وشوية وقرأت مقال بيتكلم عن نوارة نجم وانها عاملة مدونة اسمها جبهة التهييس الشعبية

شدنى اسم المدونةوشدنى اسم نوارة اللى كنت ارتبطت بيها جدا بعد حلقة ليها فى العاشرة مساء مع والدتها وحكت نوارة بكل صدق وعفوية لما السادات فى سبتمبر 81اعتقل والدتها ومتهيألى كان والدها أصلا معتقل وازاى ان والدتها فهمتها
انها ماتعيطش لان ولاد المسلمين مايظهروش ضعفهم أمام اعدائهم وطبعا عيطت كتيرلما نوارة بطلت شقاوة فى المدرسة

وبقت بتسمع الكلام وبتعمل الواجب علشان السادات يرجع لها باباها ومامتها واستغربت جدا ازاى الانسان ممكن يظلم كده

من غير مايحس

اكيد السادات مكانش فى دماغه نوارة ولاغيرها وهو بيسجن والديها

ما علينا

كان محل اقامتى وقتها عند نوارة أقرأ البوستات القديمة والجديدة ويصعب على أقفل الصفحة وعايشة حياتى مع ال refresh وعرفت يعنى ايه الاكل يتحرق ومفيش أكلة تطلع مظبوطة على أساس انى كنت محصلتش قبل ماأعرف النت

فوتوها معلش عيد ميلاد وكده

المهم

فى ليلة ليست ليلاء

قررت أضغط على الكلمة الغريبة اللى فى أول مدونة نوارة واسمها انشاء مدونة اليكترونية

وبدأ السحر

وعملت اكتر من مدونة

واستغربت جدا انى مش بلاقى المدونة على جوجل ووصيت قرايبى يدوروا معايا

لكن محدش لاقينى غيرى طبعا لانى حافظة المدونة على الجهاز

كانت فترة بايخة أوى ووصل أول تعليق وكان من سبهللة

وتوالت التعليقات

من استاذ طارق مؤمن

ومن استاذ احمد زوج مخنوق

او من العائلة الكريمة اللى الجيل الصاعد فيها فرح جدا بالفكرة أو الكباراللى كانوا شايفين ان المدونات دى حاجة خطيرة

وحسسونى فعلا ان أنا عرابى وماشية أقول لقد خلقنا الله أحرارا

وبعد صعوبات البداية واجهتنى مشكلة عويصة

اكتب ايه ....؟

عارفين

بعد الشر عليكم الخواء الفكرى
عارفين

الدماغ الفاضية
لما نفسك تقول حاجات كتيرولسانك وايديك عاجزة عن الكتابة

لما الناس بتقول كلام جميل جدا وبتعبر عن أفكارك أحسن منك وانت معندكش غير

الله

ايه الجمال ده
يعنى ياربى مش كفاية مش عارفة أكتب

لا كمان مش عارفة أعبر عن نفسى وعن رأيى فى تعليق
الحالة دى لسه موجودة بس أنا بقنع نفسى ان حدتها قلت شوية وان السنين اللى ضاعت وأنا مشغولة بمشاكل

مالهاش أى معنى اكيد أثرت على قدراتى الذهنية والتعبيرية

لا وكمان المهنة أجاركم الله مش هيحس بكلامى غير المدرسين بعد فترة من التدريس شئت أم أبيت

بتحس بحاجات كده لا مش هتكلم عنها بعدين وخصوصاانى كنت بعتبر نفسى لغاية مااتخرجت مشروع قارئة جيدة جدا

ماعلينا
نطلع من البوست ده بأيه على رأى خيخة
ان النهارده عيد ميلاد مدونتى

ان أنا بحب مدونتى

ان أنا متأكدة انها مش مؤثرة ومش لذيذة
بس بحبها يابشر

انى لاول مرة احس انى بحب وبحترم ناس من غير مااشوفهم

وكتير منهم مش يعرفوا مدونتى أصلا

وانى أتمنى أحضر لقاء تدوينى بس أكون غير مرئية

لانى غير اجتماعية بالمرة ومش عايزة أخنق الناس بصمتى وابتساماتى المتكلفة اللى بتلازمنى لما اتعرف على ناس فى أول مرة
انا طولت عليكم اوى معلش

ياحبيبتى

كل سنة وأنت و أنا وأحبابى والدنيا بخير