مبدئيا علشان مايكونش فى أى سوء تفاهم
أنا مفيش بينى وبين العسولة اللى فوق دى أى تشابه شكلى
لكن ده مايمنعش تعاطفى الشديد معاها
واحساسى بمأساتها
الظاهر أنا كل فترة هاجى هنا أقولكم أنا خلصت المنهج
الغير مدرسين
هيقولوا ايه الصداع ده
ومدرسين المواد الاخرى
مش هيحسوا بمعاناتى
مين حبايب قلبى ؟
اه
كده بالظبط
مدرسين الدراسات الاجتماعية
المرحلة الاعدادية
أخباركم ايه ؟
خلصتم المنهج ؟
ربنا يعينكم
ايه اللى احنا فيه ده
الشهر الاخير فى الدراسة ده مشكلة
وارهاق وتوتر عصبى
هى الوزارة دى بتتعامل معانا على اننا ايه بالظبط
ماكينات
لا
أقوى
ايه التكدس الرهيب فى المناهج ده ؟
مش معقول لو كل الفشل منى أنا
كان زمانى مع السنين اتطورت وغيرت من نفسى
لكن
كلا البتة
انها مشكلة كل الاعوام
وفرحة كل عام
بنبارك لبعض
وبنحقد على بعض
لما حد يخلص المنهج بدرى شوية
أنا مش هطول عليكم
ومش هكلمكم فى مواضيع مش تخصكم أوى
بس أنا جاية أفضفض معاكم شوية
وأقول لكم
أنا مرهقة جدا
أنا قربت أخلص المنهج
أنا فاضلى فرنسا فى سنة تالتة
وعلى بن أبى طالب فى سنة تانية
أنا نفسى السنة تخلص
أنا مدرستى اتقفل فيها فصلين بسبب الانفلونزا
احنا مناهجنا طويلة جدا
ومرهقة جدا
ان عندنا تعليمات مش رسمية طبعا
ان الامتحانات تيجى مباشرة جدا وأسئلة كلها موضوعية
ان نسبة الغياب مرتفعة جدا
وانى مش عارفة البنات من بعض
ومش عارفة ياخدوا درجات شفوى ازاى
وأنا أساسا معرفهمش
وان السنة دى
سبحان الله
يمكن علشان مركزة شوية
بس الانفلونزا نسبتها عالية جدا
العادية الحمد لله
كل يوم على الأقل بنتين
حرارتهم عالية
وعندهم كتير من أعراض الانفلونزا
انى بهدد البنات لما يضايقونى
انى هشغل المروحة وهعليها على الأخر
بيسمعوا الكلام فورا
ان أنا وحشتنى الكتابة فى مدونتى حبيبتى
بس مرهقة وتعبانة ومش شايفة
ومركزة كل جهودى فى هدف واحد
انى أخلص المنهج
الدعاء الله يكرمكم
ربنا يقوينى ونخلص بقى
مدرسينى زمان كانوا بيخلصوا المنهج ببساطة
وكنا بنراجع كتير جدا
المراجعة دلوقت رفاهية
لا نتحمل تكاليفها
احنا بنستخدم مع البنات أساليب ترغيب وترهيب
علشان بس يتكرموا وييجوا المدرسة
وكل يوم للاسف فى وجوه جديدة
بلاقيها فى الفصل
أخيرا
الى كل وزراء التعليم اللى عاصرتهم
ماعدا أحمد جمال الدين
مبروك عليكم الانفلونزا
على الاقل عندكم سبب تتحججوا بيه
على فشل سياستكم
مع ان الكل متأكد
ان الجنازة حارة
والميت .............
51 التعليقات:
حبيبتى حاسة بكِ والله
معلش ربنا مش
حيضيع تعبك ولا
تعب البنات هـدر
وحيستر من الالف وزة دى.
من اسباب دخولى
العلمى هو التاريخ
بتاع اولى ثانوى حاجة
كده لا لها اول ولا أخر
وكان وصار ودخلت العلمى
بأوامر عليا من الوالد والولدة
وكمان من التاريخ والجغرافيا
(حليب قلبى من جوووووووه)
ربنا يعينك
طبعا اولا ربنا يعينك يارب ويوفقك وتخلصي المنهج
بما ان حضرتك مدرسة تاريخ وجغرافيا..هل مازلتي مصممه على رأيك بإن اللي قتل كليبر مش من الفصل بتاعك؟!
ههههههههههه
سؤال ممكن؟
هو الدكتور احمد جمال الدين موسى وزير التربيه والتعليم السابق من وجهة نظرك كويس ولا لأ ؟
نورتي مدونتك من جديد وننتظر موضوعاتك
في حفظ الله
الله يكون فى العون
انتى بجد صعبان عليه
انا معاكى ان التاريخ يتاع اعدادى رخم
بالذات تاريخ الاسرات القديمه
بجد الله يعنيك
هو التعليم باظ من شويه
واضح إن حضرتك مش فاكرة بقية المثل
انا فاكره أنا فاكره
كان.. و الميت إيييه
الميت إيه يا واد يا نيجرو
الميت إيه يا أبو النجاجير
آه تقريباً كده : و الميت كلب .. صح مش كده ؟
:)
فكرتيني بالدراسات الإجتماعية بتاع الإعدادية كلها
ياااااااااه
ده أنا كنت بأعشقها
حتى الآن أنا لسه فاكر إني في الـ 3 سنين بتوع اعدادي مانقصتش درجة واحدة في الدراسات الإجتماعية غير في سنة تانية بس جبت 59 من 60 .. طب و ربنا كانت أيام عسل
بس أنا مستغرب حاجة
احنا كنا طول عمرنا - كتلاميذ - بنحقد على المدرسين عموما
لأنهم مش تعبانين في حاجة
بييجوا يرصّوا الكلمتين ع السبورة
و يقرأوهم
و كل عام و انتم بخير
و احنا بقى اللي علينا الهم كله و الحفظ و الفهم و المذاكرة
بس ده ما يمنعش طبعاً إني اقولك : ربنا يكون في عونك
لأن واضح ان تفكيرنا كان تفكير عيال و ان انتم كمان كمدرسين بتتعبوا أهوه
:)
كان الله في العون يا أفندم
إلا صحيح
هو حضرتك بتشتغلي في مدرسة خاصة ؟
علشان حوار المراوح ده
أنا بقيت بارغي كتير اليومين دول
معلش بقى
يلا سلام
ربنا يجعله بفايدة ان شاء الله عليكي وعليهن
انجاز المهمة له فرحة في القلب مهما كانت المهمة .. طبخ نوع من الطعام ..
تقفيل ميزانية .. توصيل طلب هوم دليفري .. كله انجاز لعمل طلب منك .. له فرحة في القلب حتي لو الاكل طلع نص نص والميزانية خرمت .. احساس ان في هم راكب علي القلب انزاح و افسح مجال لاخوه من الهموم الحياتية الاخري يركب بداله .. بردة بيحدث فرق
ربنا يوفقك ويكفيكن جميعا كل سوء والمسلمين جميعا يارب
كلامك خلاني اسرح كده في امتي مدرس عمل معايا فرق في حياتي ..
يمكن علشان الدراسة في المدرسة كانت فرض علي مش اختياري لان البديل اني اتحول من طالبة في مدرسة الي تعلم صنعة او حرفة ما .. فاخترت التعلم كبديل ارحم من بديل :)
وفي الكلية بالرغم من انها اختياري وعندت برغم من بعد المسافة جدا عن البيت والعقل بيقول اروح كلية اقل منها درجة في الجودة في الجامعة اللي قريبة بدل الشحططة .. بس عندت واصريت و كملتها حلوها ومرها .. وعرفت فيها حاجات حلوة وحاجات وحشة بس بردة مش هفتكر حاجة بعينها مؤثرة لاني اكاد اكون نسيت اللي درسته فيها من المنظور العلمي البحت وبقي جوايا المخزون الادبي من روائع الادب العالمي و حلاوة النقد والتحليل له .. بس كله كان ومبقاش :) وانصدمت بالدنيا الي مفيهاش اي وجه تشابه مع الحاجات دي الا بشخصياتها الشريرة اللي بردة في القصص والروايات والمسرحيات تبقي طيبة جنب الشخصيات اللي عايشة فعلا!!
في الماجستير كنت زي الطفل اللي مرمي في المية وهو عضلاته لا تسمح له حتي بالعوم الكلابي :)
حاسة ان العلم اللي بقي جوايا فعلا وعلم وأثر فيا هو العلم اللي انا سعيت اليه بمزاجي .. مش اللي اتفرض عليا .. العلم اللي مش بيتنسي بمجرد اني جاوبت في ورقة الامتحان ونتيجتي طلعت ونجحت وخلاص اترمي زي غيره وزي اللي قبله
بيتهيألي دا اللي باقي .. اللي دورت عليه .. زي زمان اللي كانوا بيهاجروا في بلاد الله سعيا وراء العلم والمعرفة .. دول اللي أثروا في الدنيا و سابولنا حاجات نتعلم منها ومنهم .. جايز اكون صح وجايز لا ..
دوشتك عارفة بس اخدت عندك هدنة من الدنيا :)
ان شاء الله تكوني دايما بخير و جزاكي الله خيرا علي حسن الضيافة :)
السلام عليكم
ربنا يقويكى
ويقوى الطلبه يارب
وفقكم الله
وتخلص السنه دى على خير
دمتى بصحه وعافيه
norahaty
متأكدة انك حاسة بى
بس المشكلة بعد كل الشكوى دى
انى فعلا بحب التاريخ جدا جدا
وكنت مستمتعة بدراسته وتدريسه طول حياتى
بس الكم الكبير
والطرق البايخة فى عرض المناهج بهدلتنى فعلا
انا دخلت ادبى بدون تفكير
بس مايمنعش انى فى اولى ثانوى
قررت ابقى شقية
واغير اسلوب حياتى وادخل علمى
وبعدين مدرسة الفيزياء
رجعتنى لعقلى تانى
انا ماليش فى قوانين كوبرنيكوس يابنتى
انا اخرى
لقد خلقنا الله احرارا
ربنا يكرمك ياحبيبتى
ويستجيب منك ويسترها معانا كلنا
نورتينى وشرفتينى
استاذ أحمد سمير
اهلا بحضرتك
اللهم امين
شكرا جزيلا على الزيارة والدعاء
قلم رصاص
أهلا وسهلا بحضرتك
بالنسبة لكليبر
مفيش حاجة مضمونة يافندم الايام دى
وانت عارف ان عندنا جهاز ...... كفء
ممكن يخلينى اعترف
ان انا اللى قتلت توت عنخ امون
دكتور أحمد جمال الدين
زى ماحضرتك عارف
مدته كانت قصيرة
لكن احساسى به
انه كان عنده رغبة قوية وجادة فى الاصلاح
كفاية ان الحكومة مش طايقاه
وعزلته بسرعة
متهيألى علشان ليه أقارب من الاخوان
كمان لى ناس كتير أعرفهم من خريجى جامعة المنصورة بيتكلموا عنه بكل خير
موضوع حضرتك الاخير كان اكتر من رائع
بس انا كان تركيزى قليل جدا
مقدرتش اشارك
وأدلى بدلوى
والكلام الكبير ده
تحياتى لحضرتك
اسامة
أهلا بك
بتختفى كتير ليه
تعال هنا
تاريخ ايه اللى رخم
انا بقول للبنات
اللى بيكره التاريخ
يبقى بيكرهنى انا شخصيا
لا عندك حق
هو أسلوب العرض بايخ جدا
بس فى أمل
عارف منهج تانية اعدادى السنة دى
أجمل منهج شوفته طول عمرى
ناس بتمتلك الفضيلة والملكة الغائبة
اللى هى الفهم
بجد نفسى أشوفهم واشكرهم
تحياتى لك يااسامة
نيجرو باشا
أهلا بك
هو انت كنت من الطلبة اللى بيحبوا الدراسات وبيجيبوا فيها الدرجات النهائية ؟
أهلا بك مرة تانية ياباشا
انا فى اعدادى اختارونى من اوائل الطلبة علشان الدراسات بس
بالنوسبة لاجابة السؤال
حضرتك عارف ان الاجابة المعتمدة
تونس
لكن نتيجة للظروف السابق ذكرها
اللى انت تقوله صح
كلب
مش كلب
مش فارقة كتير
أنا فى مدرسة خاصة !؟
لا طبعا
انا فى مدرسة حكومية عشوائية فترتين
بس الدنيا اتطورت من ييجى سنتين كده
وركبوا لنا مراوح
والبنات
قال خايفين من الانفلونزا
فقافلين الباب والشبابيك
وقاعدين بيدفوا فى الفصول
بدخل الفصل
بيحسوا انى بكرههم لما افتح الباب والشبابيك
ولاعقاب المروحة
بيأثر جدا
لما الظروف بتتغير
وبرجع تانى اقعد مكان الطلاب
بحس بتعاطف كبير معاهم
هو مفيش رحمة
حصص ورا بعضها
واحنا قاعدين وبيرموا معلومات بس فى دماغنا
لا وكمان
بيرهبونا ويقعدوا يسئلونا
ايه الناس المفترية دى
انت كده بترغى !؟
سيادتك انا كلمتى المفضلة لما البنات
يختصروا فى الاجابة
اننا مدرسين الدراسات
اللى اخترعنا الرغى بين البنى ادمين
سلام
أليس
ازيك ياجميل
فهمتينى جدا فى أول فقرة
فعلا انا بحس فى الفترة دى انى مخنوقة
وفى هموم كتير على قلبى
لكن بحس انى خفيفة وسعيدة
وتصدقى بحس انى بصغر فى السن
لما بخلص المنهج
بجد من غير مبالغة
هم
ربنا يبعد عننا الهموم
اما المدرسة
مع انى كنت بلعب طول السنة
وبذاكر بعد مااعيط شوية فى الاخر
لكن دايما كان فى مدرسين أثروا فى جامد
وغيروا جوايا حاجات كتير
وفاكرة كلامهم لغاية النهارده
الكلام ده كان واضح اوى فى اعدادى والجامعة
فى الكلية كان فى محاضرات بتسحرنى
كنت بتمنى ان الوقت مايعديش
والدراسة كانت تقريبا اختيارى الوحيد اللى أصريت عليه
لان ماما كانت عايزانى ادخل قسم انجليزى
وانا خيبت أملها ودخلت تاريخ
وكانت بتتكسف فى الاول تقول للناس
ان بنتها تاريخ :)
لما جبت سيرة الماجستير
وجعت قلبى
علشان ده حلمى اللى انشغلت وماكملتوش
المخزون الادبى كان فى فعلا
وراح تماما
وانا فى تالتة ثانوى
لما كنت أحب العب وأعمل نفسى بذاكر
كنت اذاكر وأحل أسئلة بلاغة
وأحفظ كل بيت شعر يقع فى ايدى
هييييييييييييييييييي
دنييييييييييييييا
انت بتنورينى ياجميل
وبتدينى مساحة جميلة جدا للفضفضة
فين حسن الضيافة ده !؟
ده انت بتمشى كل مرة من غير ماتشربى حاجة :)
المجاهد الصغير
أهلا وسهلا بحضرتك
اللهم امين
جزاك الله خيرا
على الزيارة والتعليق
والدعاء
تحياتى لحضرتك
يااااااااااااااااااااااااااااارب
يااااااااااااااااااااااااااااارب
يقدرك وتخلصي المنهج
وييجوا اللي عاوزين يبقوا مدرسين يتفرجوا!!
تحياتي ودعواتي
السلام عليكم
جزاكم الله خيرا على الاهتمام بالطلبه
انا فاكر لما كنت فى المدرسه كان قليل من المدرسين اللى بيهتم انه يخلص المنهج
منهم اللى بيتحجج ان الوزاره عايزاهم يخلصوا المنهج قبل الامتحانات باسبوعين بس
ومنهم اللى بيعتبر الطلبه مش فارقه معاهم
بس بصراحه كان فيه ناس بيهتموا جامد وبيحببواالناس فيهم وفى الماده
اما الدراسات الاجتماعيه فانا بصراحه منهح جغرافيه 3 اعدادى وتاريخ2 اعدادى
هم صحيح فيهم مواضيع كتيره
بس فى 2 اعدادى كان فيه ملخص عن التاريخ الاسلامي وجغرافيه 3 اعدادى فيها معلومات عامه عن العالم
ودى ثقافه كويسه
انا صحيح مش عارف دلوقتى المناهج اتغيرت ولا لا
خاصه ان اغلب وزراء التعليم كل واحد منهم ييجي يغير فى اللى فات وبالذات فى الثانويه العامه
ربنا يصلح الاحوال
ربنا يكرمك ويوفقك
ههههههههههه
ههههههههههههههههه
ههههههههههههههههههههههه
والله الضحك ده ما سخرية من الموضوع ولا حاجة انا بس استغربت من اهتمامك بتخليص المنهج ده !! ما يخلص ولا ما يخلصش ولا الله لا يجعله يخلص !! مش دفاترك سليمة ؟!
الحقيقة احنا ظهر عندنا حالتين انفلونزا فقفلوا فصلين وكان فاضل حالة واحدة ويقفلوا المدرسة فاحنا " المدرسين " طلعنا الاشاعة دى وقفلوها فعلا والعيال ما بقتش تيجى والمناهج خلصت فى شهر 10 وكل سنة وانت طيبة .
انا كتبت التعليق علي مرتين وفي النص كنت بحل مشكلة كده في الشغل والحمد لله ربنا يسرها ..
من ناحية الضيافة، ربنا يجعله عامر دايما ومنور باصحابه ودايما خيرهم سابق :)
ومن ناحية الماجيستير انا نكدت علي روحي اصلا اني افتكرته و ياريتني فضلت ناسياه
شفتي حد عامل عملتي دي يعني انا خلصته كله وفاضلي اكتب الرسالة واناقشها واخلص .. واقفه في زوري الكتابة دي .. مش قادرة اعملها اكمني عارفة انها اخرتها هتترمي علي رف ياكلها التراب ومن بعده الفيران :( احساس غبي ان مجهود وتعب هيضيع هدر بدون فايدة .. العلم انا استفدت منه جدااااااا و الحمد لله بس ليه ابقي مجبرة اعمل ورقة بحثية ظهرت فجأة بدون سابق اتفاق لما اشتركت فيه :(
ربنا يهديني وابقي اعملها قبل فترة السماح دي ماتخلص فات سنة ونص اهو من ساعة ما خلصت امتحانات و حاسة اني اخدت العلم اللي عايزاه والباقي بصراحة اهدار مجهود ووقت و خسارة عملها اصلا بس مجبر اخاك ويا عالم هتنتهي علي ايه
اتشجعي و قدمي .. مهما كان انشغالك ووقتك ضيق.. صدقيني لو جواكي رغبة هتقدر وهتنجحي فيها ان شاء الله بس انتي خطي رجلك علي اول درجة .. العلم جميل و فرحة معرفة معلومة جديدة مفيدة مبهجة وتحسي الواحد دماغه نورت كده و نضفت :)
فكرتيني بمدرسين عدوا عليا زمان في ابتدائي .. وكان منهم اللي ساهم بشكل كبير جدا في زيادة كرهي للرياضيات بكافة اشكالها لوصول الكره لشكل الارقام نفسها ..اتعقدت ولله الحمد علي كل حال .. وفي منهم اللي كرهني في الساينس وطبعا كانت كل المواد الادبية بالنسبة لي نعمة
حلوة متعة البلاغة دي .. فكرتيني بواحد اعرفه كان متعة بالنسبة ليه يحل مسائل رياضية و يألف مسائل ويحلها علي عكسي طبعا انا كبرت بكرهها حتي كانت عندي سعادة بالغة اني اخر سنة اخدت فيها اي مادة رياضية اولي ثانوي و دخلت تانية ثانوي وتالتة بكل ما هو ادبي حتي المادة العلمية اخدتها جيولوجي مع ان كل الناس كانت بتاخدها اقتصاد واحصاء .. بس انا عندي امشي 100 كيلو ولا اني اعدي متر واحد فيه مسألة رياضة .. مش لصعوبتها بقدر ما انا جوايا ذكريات سيئة تجاهها قفلاني منها وكنت بنجح فيها بدرجات كويسة بس مبحبهاااااش بس طبعا في الشغل مقدرش انطق بتعامل معاها علي امل اني في يوم من الايام اعرف اتعالج من عقدتي تجاهها .. الله المستعان :)
التاريخ دا جميل و مليان قصص وحكايات جميلة بس اللي يحزن اوي التزوير اللي بيتحط في الكتب المدرسية علشان فلان ميزعلش وعلان مياخدش علي خاطرة .. بوظوه وكرهوا الناس فيه وبردة ارجع واقولك اللي ميعرفش قديمه عمره ما هيبقاله جديد لان التاريخ بيعيد نفسه دي حقيقة بس نتعلمه صح بما يرضي الله
دوشتك تاني بس اعذريني الكلام جاب بعضه:)
رأيك في الدكتور احمد جمال الدين في محله وهو رأيي بالظبط ..على فكرة الرجل درس لي اقتصاد في كلية الحقوق بالمنصورة ..وبالفعل هو كان عنده برنامج اصلاح شامل للتعليم في مصر عشان كده صيف بدري ..في بيته طبعا ..مش مارينا زي غير المغضوب عليهم هههههههههه
يكفي انه اول ما مسك الوزارة ..ومن منطلق انه استاذ وخبير اقتصاد ومال ..اول حاجة عملها اتلقى 3 مليار جنيه من موازنة الوزارة تذهب كمرتبات مسشارين اجانب..فلغاهم وقال هو احنا قلة ناس بتفهم في مصر عشان تيجبوا نس من الفرنجة ..وهو صاحب فكرة كادر المعلم بس مش بشكلها المنيل الحالي ده ..وحط فكرة ان المليارات بتاعة الاجاتب دي تدخل في تمويل مشروعه لتحسين دخل المعلم المصري ..وكان عامل تصور مبدأي الف جنيه لكل مدرس عند التعيين ..طبعااااااااا المشروع اتقتل والراجل تم ازالته من الوزارة بفعل فاعل..وربنا يجازيهم بقى
واشكرك بشدة على قراءة الموضوع الاخير عندي حتى وان لم تدلي فيه بدلوك
دمتي في تميز وابداع
سلاموا عليكم
اخيراااااااااا لقيت حد يقول نفس كلامى
مدرسة دراسات اجتماعية بجد المناهج كتيييييييييير اوووووووى خاصة اعدادى فعلا بجد تعب اعصاب
بجد ببقى حاسة انى امتحن بدلهم احسن
والدراسة اصلا السنة دى زى الزفت
انا اشاسا بحس بتوتر عصبى مع قرب الامتحانات و تيجى كمان الظروف دى تسوء الوضع اكتر حاجه صعبة بجد
ربنا يعينك و يوفقك
فى الإمتحانات و فى التدريس
فاكرة حضرتك الحديث
اللى بيأمر بعدم السلام على اهل الكتاب و لو لاقيناهم فى شارع نضيقه عليهم
اهو الحديث ده طلع مش مقصود بيه اهل الكتاب خالص
و انه كان ليه ظروفه و هو ايام ما كان فيه حرب بين المسلمين و يهود بنى قريظة
لسة عارف الكلام ده امبارح
مش تايه
أهلا بحضرتك
يارب يارب يستجيب دعاء حضرتك
ويوفقك فى كل حياتى
شرفتنى
تحياتى لحضرتك
م/ محمود فوزى
أهلا بحضرتك
كل الاصناف اللى حضرتك ذكرتها موجودة
وأكتر كمان
احنا فى دنيا
بس أنا حظى فى الاغلب كان طيب جدا
لان النماذج السيئة من المدرسين
كانت قليلة جدا فى حياتى
وكانت فى مواد ومراحل دراسية
مش مؤثرة أوى بالنسبة لى
المناهج حاليا
منهج اولى اعدادى
كويس
بس طويل جدا جدا
وبعض الاجزاء محتاجة تبسيط شديد
وكمان الوقت بيضيع فى ملف الانجاز
ومدرستى فترتين
فالحصة نصف ساعة بدل ساعة الا ربع
واساسا هى لو ساعة الاربع
مش هتكفى المنهج
بنضطر ناخد حصص كتير تانى فوق جدولنا
المكدس أصلا
مدرسين التربية الرياضية والاقتصاد المنزلى واللغة العربية
بيحسنوا علاقتهم معانا جدا
علشان ناخد حصصهم:)
طيب مش كده نستحق الدعاء لنا
اما منهج تالتة اعدادى زود حضرتك فوق اللى قلته على سنة اولى
منهج تانية اعدادى يستحق جائزة بصراحة
فعلا ممتاز
هو جديد
دى اول سنة ليه
بس هو محتاج بوست لوحده
انا اسفة على الرغى
تحياتى لحضرتك
استاذ هانى زينهم
أهلا بحضرتك
احنا كمان كان نفسنا المدرسة تتقفل
بس بدرى فى الاول
لما الايام عدت ومفيش أمل لالغاء الدراسة
الوضع اتغير
كان لازم ندخل طاحونة المنهج
تحياتى لحضرتك
أليس
ازيك
انت اللى زعلتينى بموضوع الماجستير ده
حرام عليك تعبك
هما يضيعوه
ياخدوا جزاءهم
لكن تعبك مش تكمليه ليه ؟
أما انا حاليا مش هينفع خالص لانى واخدة سكة تانية
والاتنين مش هينفعوا مع بعض
نفسى أكمل المعهد
وبعدين اعمل دراسات عليا فيه
أو الاجمل انى التحق بجامعة الازهر
ربنا يسهل
تصدقى انك شبهى فى موضوع الرياضيات ده
انا احساسى بنفسى طول عمرى
انى كان ممكن أفهمها
لكن العقد النفسية بعدتنى عنها تماما
تعرفى انى فى الدبلومة
كان كل خوفى من الاحصاء لمجرد انها فرع من الرياضيات
ولغاية دلوقت
لما يكون عندى امتحان
أحلم بكابوس
انى هامتحن رياضة
لا انا عبقرية جدا
التاريخ
رائع
وبيزعلنى جدا
لما سنين أدرس معلومات غلط
ببقى مش عارفة أجيب البنات اللى بوظت لهم دماغهم منين
مثلا قصة التحكيم
وعمرو بن العاص وأبى موسى الاشعرى
ياما بوظت الدنيا فيها
ربنا يسامحنى
شرفتينى ياجميل
قلم رصاص
أنا سعيدة جدا
انك أكدت رأيى فى الدكتور أحمد
مع ان كل المعلومات دى عنه
مكانتش عندى
فرصة جميلة ان الواحد يتعرف على شخصيات محترمة
وفرصة سعيدة
ان رأينا فى الحكومة صح
وانها بيصعب عليها
تعين عندها رجل محترم
تحياتى لحضرتك
جارة القمر
أهلا بحضرتك
أفهم من كده انك مدرسة دراسات
ياحبيبتى
قلبى معاك والله
معلش ابتلاء من ربنا
وتكفير ذنوب
ربنا يصبرنا
شرفتينى ياجميل
وأتمنى أتعرف عليك أكتر :)
بدراوووووووووى
يانهار أبيض
فينك
سيادتك شوف نزلت كام بوست دلوقت
ومعرفتش أعلق على أى واحد فيهم
ايه حكاية صفحة التعليقات الصغيرة دى
مش بعرف أستخدمها ابدا
مش عارفة المشكلة فين
شكرا جزيلا على الدعوات
والف حمدلله على السلامة
من اللقاء التدوينى
موضوع الحديث
ياريت تسيب لى تفاصيله
وعرفت ايه جديد عنه
بس انا قلت لك كده
فى اشكى الظلم لسعد 2
اول تعليق لى
وانت داخل صفحة التعليقات كده يمين
تحياتى لك :)
هو بالنسبة للصفحة
ياريت تقوليلى المشكلة فين
لإنى عامل كدة عشان البوست ميتنقلش من صفحة التعليقات
بخصوص الحديث
انتظرى حضرتك لحد ما جيبه
من اخت مدونة هى اللى قالت لى
ولا يهمك فضفضى زى ما انتى عاوزة
بمناسبة الارهاق ..الحال من بعضه
وكل سنة وانتى طيبة ومتنسيش تصومى عاشوراء
صحيح بمناسبة وزراء التعليم "إنا لله و إنا اليه راجعون "
تحياتى ...
بدراوى
مش بعرف اكتب ابدا فى مربع التعليقات
حتى لما بعمل كليك فى الاول قبل مااكتب
مش عارفة اوصفها ازاى
هو اكيد المشكلة فى المتصفح بتاعى
بس دى مش اول مرة تحصل
لما عملت الصفحة الصغيرة دى قبل كده عندك
كانت نفس المشكلة موجودة
باشمهندس ويل
سلامتك من الارهاق
صايمة ان شاء الله
جزاك الله خيرا
ومش هجيب سيرة اللى متجوزش عليهم الا الرحمة دلوقت
تحياتى لك
طب فيه حل بسيط
اى بوست جديد
حضرتك ممكن تعلقى عليه
فى مدونة بلال فضل عشان عامل اشراف على التعليقات
http://belal-fadl.blogspot.com/
و انا بنفسى حنقل تعليقك فى المدونة بإسمك
اوك ؟!!
و بعدين انا عرفت المشكلة
قصدك صفحة التعليقات مش بتحمل
صح ؟!
أعانكم الله على هذه السنة الكبيسة :)
وممكن تدي الطلاب عنوان المدونة وتشرحي الدروس ليهم واحنا معاهم :9
بدراوى
شكرا على ذوقك
واهتمامك بتعليقاتى
اللى هتغير مسار ومصير حركة التدوين
فى مصر :)
استاذ تامر على
أهلا بحضرتك
فكرة حضرتك مميزة كالعادة
بس كده
مش هشتغل دروس خصوصية
اللى توسعت اوى
مع الغياب :)
تحياتى لحضرتك
ربنا يقويك وتخلصى المنهج ان شاء الله
ده اللينك كاملاً
http://islamic-vision.blogspot.com/2008/05/blog-post.html
ربنا يعينك يارب
اكيد منلهج مش سهله والتعامل مع الطلبه مش أسهل امانه فى رقابتك ربنا يعينك عليها
وربنا يسامح كل مقصر
اه على رايك جالهم شماعه يعلقوا عليها اخطائهم
تحياتى ومرورى الاول
السلام عليكم
جزاكم الله خيرا
طبعا المدرسين اللى قابلتهم كتير
بس بصراحه فيهم ناس كويسه كتير
وللامانه فانا لسه فاكر منهم ناس وهم فاكرنى
المدرس احيانا بيحبب الطلبه فى مادته واحيانا بيكون سبب قطيعه وخلاف حاد بين الماده والطالب
بصراحه انا مش فاكر منهج اولى اعدادى اوى
لكن اللى اثر فيا زي ماقلت لك
تاريخ تانيه اعدادى وجغرافيه 3 اعدادى
واضح انك بتبذلى مجهود كبير جدا
ربنا يكرمك ويوفقك
الكلام ده اصبح قليل ان لم يكن نادرا
ربنا يكثر من امثالك
بس فيه حاجه
بالنسبه لاحمد جمال الدين
فانا فعلا استغربت ساعتها انه مشى بسرعه
اسرع من الطبيعي
حسيت بعدها انه كويس لانه مشي بسرعه
فيه اشاعات طلعت انهم مشوه عشان طلع انه ابن خاله الدكتور جمال حشمت من الاخوان وهم مكنوش يعرفوا
وان كان هو نفسه مش من الاخوان
ولكن احمد جمال الدين بيقول ان الامن يعرف انه ابن خالته من زمان حتى من قبل ما يكون رئيس جامعه المنصوره قبل ان يكون وزير
ولكن المهم هنا
ان الوزير الاسبق بيقول انه كان معه خطه طموحه للتطوير وفى حين كان بيناقش نظيف عن مؤتمر لتطوير التعليم وهم بيختاروا اللى بعده
امر عجيب
هو صعب نلاقى التعليم بتاعنا بيتطور
بمناسبه التطوير
انا فاكر فى ايام الزلزال 1992 كان فيه مدارس كتير اتبهدلت واصلا كان فيه مدارس 3 فترات
ورغم كده اتلغت تقريبا الفتره التالته فى وقت قصير
طيب ليه بعد السنين دي كلها ميلغوش الفتره التانيه بانهم يعملوا مدراس اكتر
ربنا يرحمنا
ربنا يكرمك ويوفقك ويسعدك
انفلونزا الخنازير السنه دي كانت مصلحه للمدرسين
الدروس كترت والدنيا احلوت معاهم على الآخر
أما المنهج هايخلص هايخلص ان شاء الله
بس بدون استعجال
.............................
لعلمك
انا كان المفروض اني انزل موضوع في الميكروباص من 3 أيام
لكن منتظرك تعلقي على القديم
منزلتش الموضوع مخصوص لأني منتظرك
ومش عاوز أقولك ان وانا بكتبه كنت شايفك ادامي!
شفتي انتي مأثره فيا ازاي؟
اوعي تكوني تضايقتي
انا بهزر معاكي
بدراوى
شكرا جزيلا
سبهللة
الله يكرمك ياجميل
مدونتى اسمها مرايتى
أهلا وسهلا بحضرتك فى أول زيارة
شرفتينى
جزاك الله خيرا
على الدعاء
والتعاطف
هى الانفلونزا فعلا شماعة
لان المشاكل كتير جدا فى التربية والتعليم
تحياتى لحضرتك
م/ محمود فوزى
شكرا جزيلا لحضرتك على المتابعة والاهتمام
بالنسبة للدكتور احمد جمال الدين
كلام حضرتك مظبوط بالنسبة له
وكمان حضرتك
ممكن تراجع تعليق قلم رصاص
جزاه الله خيرا
ادانى معلومات كتير عنه
بالنسبة للتطوير
فعلا فى تطوير بيحصل
بس ببطء شديد
وبعدين ده حقنا يافندم
مينفعش نرضى فيه بالقليل
تحياتى لحضرتك
لورنس العرب
مفيش حاجة بتستخبى فى البلد دى
فعلا الدروس زادت السنة دى بسبب الانفلونزا والغياب
والمنهج ربنا يسهل
بس لازم بالكتير اوى يخلص الاسبوع ده
علشان المراجعة
وغيابهم كمان بيزيد
أنا فهمت تعليق حضرتك بالمعنى التالى
ان حضرتك
كنت متوقع زى العادة تلاقينى بصدعك فى صفحة التعليقات
ولما ده محصلش
حضرتك استغربت
فجيت تسأل ايه السبب
خصوصا
وان حضرتك متعود
ان المواضيع السياسية دى بتستهوينى
بس كده
مش أنا فهمى صح ؟
يبقى مفيش حاجة تزعل
جزاكم الله خيرا على كلامك
وانا اصلا قرات تعليق الاخ قلم رصاص من قبل
فجزاه الله خيرا على التعليق والمعلومات
اما عن التطوير فربما انتى ادرى منى لتواجدك فى المجال التعليمي
ولكنى لا الحظ هذا التطوير جيدا
وطبعا ده حقنا
ربنا يصلح الاحوال
ربنا يوفقك ويكرمك
إرسال تعليق