أنا زهقانه وطهقانه ومضايقه
بس مش زى ريكو
انا زهقانه من الشغل والناس
مطحونه ايام الامتحانات
ونفسى فى اجازة ارتاح واخلص مشاويرى واشوف اللى ورايا فى البيت مش عارفه
لا وكمان تلاقى كل واحد والتانى مش بيرحمك
انت بتشتغل
طيب
خد على دماغك واشتغل كمان
لكن فلان
لا ده رايق
ده ممكن مايعرفش يشتغل والدنيا تبوظ
يقعد من غير شغل احسن
واللى مزهقنى اكتر
انى مضايقة من نفسى مش عارفه الاقى طريقة بعد العمر ده اتعامل بيها مع الناس
ارتاح ويريحونى
لو اخدت كل حاجة على اعصابى زى عادتى
الكل يزعل حتى ولو كان بيدلع فى الشغل
لو جيت على نفسى وتماسكت وحاولت اكون هاديه واطنش وافوت واستحمل
الناس زى ما يكون بيصعب عليها يعدى يوم واتنين عليا فى المرحلة الجديدة يقوموا يجيبوا اخرى
واقعد مع نفسى تانى واقنعها زى المدمنين انى هاتغير
لكن
مش عارفة اتغير يابشر
انا باخد كل حاجة على اعصابى ودمى بيتحرق بسرعة
وده طبعا بيشل تفكيرى وبيخلينى اتعصب
طبعا انا مش بغلط فى الناس
بس العصبية بتديهم مبرر للزعل واكون انا فى النهاية الغلطانة
طيب اسكت مكلمش حد ؟
مش عارفة
بيصعب عليا نفسى وبحس انى هيجيلى اكتئاب
وبعدين ده امتع حاجة فى الشغل هى كلامنا مع بعض
لو رحت الشغل ومكلمتش مع الناس دى متبقاش عيشه
جربت من كتر خنقتى
انى اقلل كلامى شويه ومبقاش عبيطة واتكلم كتير لكن طبعا الطبع غلب التطبع وبرجع لعادتى تانى
كنت كتبت فى بوست قبل كده عن الاشراف العام فى المدرسة وخدت قرار ان السنة الجاية ان شاء الله اذا عشت هكون اشراف دور وبس
وده طبعا بعد مااعترفت لنفسى انى فشلت فيه
ياترى اسيب الكنترول كمان
ما هو ده سبب تعب اعصابى دلوقت
خنقة بجد كل واحد عايز مصلحته وبس والباقى يولع
كنت مهديه اعصابى على الاخر
وصدقت الابتسامة المرسومة على وشى
لغاية ما حصل اكتر من موقف النهارده خلانى جبت القديم والجديد
المهم
نختصر الكلام
انا بسأل دلوقت
افتح الشبك ولا اقفله
الشباك اللى هو قلبى
افتحه للناس واتعامل معاهم بقلب صافى
واستحمل المقالب والرخامة
ولا اصدر الوش الجبس
ولا اخد بعضى واطلع على احمد عكاشة
بس هو الكشف بتاعه 250 جنيه
ده انا ممكن يجيلى استبحس من تمن الكشف بس
الا من ناصح ؟
25 التعليقات:
يا ستي ما هو المفروض إنتي من كتر التعامل تكوني عرفتي زمايلك و صنفتيهم
مين الكويس اللي يتفتح له القلب
و مين الرخم اللي عايز الوش الجبس
و مين المؤذي اللي مش عايز تعامل معاه خالص
مش كله زي بعضه
و لكل مقام مقال
و لا إيه ؟
والله من واقع خبرتي معظم الناس تقفلي الشباك :)))
لاوم يكون عند حضرتك تصنيف وقدرة على الحكم على الناس .... يعني في بداية العلاقة لازم يكون في تحفظ مع الوقت الناس بييضح معادنها ويبان اللي ممكن نفتحله الشباك من اللي نرميه من البلكونه ..لكن عادة في ناس اسلوبها بيعجبني جداً وهم "حبايب الكل " يعني مالهمش أعداء أبداً ولا حتى أصدقاء مقربين لأن كل الناس أصدقاء في حدود معينة ...هي صعبة لكن عاوزة بس شوية "كونترول" وتيجي :)
وبعدين بلاش أحمد عكاشة علشان غالي قوي وبرضه مفيهوش فايدة ... خليكي مع ربنا أحسن :)
تحياتي :)
انا اخدت اجازة يومين هديت وارتحت وبعدت عن النت تماما واى اخبار واى مكالمات
مهندس مصرى
شرفتنى يافندم
لكن هو مش بتبقى فى ناس بتتخم فيها برده ولا ايه
مفيش ناس فتحت لها قلبك ولقيتها ما تستاهلش
ولا انا بس اللى حصل معايا الموقف ده
استاذ تامر
شرفتنى يافندم
ورأيك مقنع جدا
فعلا المفروض فى البداية يكون فى تحفظ
لغاية مايعدى وقت وتحصل مواقف تخلى الواحد يقدر يصنف نوعا ما
وشكرا على النصيحة بتاعة اخلينى مع ربنا
لانى بعد ماكتبت البوست ده حسيت انى غلطانه وانى لما اكون مخنوقة مفيش غير ربنا سبحانه وتعالى يفك كربى ويرشدنى للصح
شكرا ليك يافندم
ابى العسولة
حمدالله على سلامتك ياقمر
شرفتنى ونورتينى
كلامك صح ياابى
انا فعلا كنت مضغوطة جدا السنه دى ومحتاجة اجازة بجد وهى هانت فعلا
واكيد لما ارجع من الاجازة ان شاء الله هيكونوا وحشونى جدا ومش هكون مخنوقة وزعلانة منهم زى دلوقت
حاجه تخنق حاجه تغيظ
مش كل صوابعك زى بعضها
لعلاج هذه المشكله حاجه من اتنيين
( البرود ) او ( الغتاته) فكلا الحالتين نجاحتين عن تجربه
بصى يا استاذتنا ..اعملى اللى المفروض يتعمل ..واللى يزعل منك قوليله انا كدة ..عاوز تتعرف عليا كدة اهلا وسهلا مش عاوز براحتك
اعملى الصح واللى يزعل يزعل
خليكى على طبيعتك
وعلى فكرة صعب انك ترضى كل الناس
وبخصوص التعامل مع الناس انا ليا نصيحة ليكى اقرئى كتاب كيف تكسب الاصدقاء وتؤثر فى الناس ..على فكرة ده من الكتب اللى بحبها اعملى عليه بحث فى جوجل
تانى نصيحة ..اسمعى برامج ابراهيم الفقى ..الراجل ده انا بحبه قوى ..اعملى عليه بحث على http://www.youtube.com/
وتقبلى تحياتى
هوه علي حسب الناس
والله التعامل مع الناس ده مشكلة كبيرة
لو لقيتي حد يقلك الحل تبقي قوليل عليه
اسامة ---شرفتنى يافندم
حلوة برده فكرة البرود والغتاته
بس اللى يقدر على نفسه
هو الحل الوحيد -الله المستعان
شكرا ياويل على النصيحة وانا فعلا مستنية اخلص امتحانات بس واعمل بحث عن الكتب دى
شكرا ياويل
انا فعلا كنت محتاجة حد يقولى خليك على طبيعتك
استاذ ياسر
اهلا بيك يافندم
اخبار الامتحانات ايه ؟
ربنا يوفقك
بصي با ابله هو التعامل مع الناس زي ماقال - مش فاكر كدة - المهم واحد حكيم (( تعملي مع الناس شعره ان شدوها ارخيتها )) وبالمبدا دا اباداي تعالمك مع الناس
ويارب يحببلك كل اللي بتحبيهم وغفرلك ويوفقك
الاصدقاء وتغيير المكان والاندماج ولو
لفتره قصيره هم روشتة العلاج..
وعندها لن نحتاج عكاشة او عادل صادق..
محمد صلاح
فينك ياراجل من زمان
نورت المدونة
انا كنت قلقت عليك بجد
شكرا على النصيحة
بس ده معاوية بن ابى سفيان يامحمد
اكون انا ايه في مرونته ودبلوماسيته
العجوز والبحر
اهلا بيك يافندم
انا فعلا اخدت اجازة وبدايتها النهارده
وحسيت ان اعصابى هديت كتير لمجرد احساسى انى هخلص من كم الضغوط اللى عليا
وحسيت انى كنت مكبرة الموضوع شوية وانى بعد الاجازة ان شاء الله هرجع المدرسة وصحابى هيكونوا وحشونى وهكون نسيت كل حاجة ضايقتنى
بس ده ميمنعش انى قررت اخد دروس تواصل جيد
شكرا على الزيارة والنصيحة
سيدتى العزيزه
فاتنى شكرك على نزول اسم مدونتى على
الريدر عندك .وتمنياتى باجازه سعيده..
العجوز والبحر
لاشكر على واجب يافندم
السلام عليكم
انتم زهقانين عشان الشغل
طب دا حتى الشغل نعمة بس للرجالة
واخدة بالك للرجالة
تقبلي موروري
مصعب صلاح
نورت المدونة يافندم وشكرا على الزيارة
بس معلش وضح لى --تقصد ايه بأن الشغل نعمة للرجالة
لانى دورتها فى دماغى وادت معايا معانى كتير مش عارفة انت تقصد اى منها
تقبل تحياتى واتمنى زيارتك ماتكونش الاخيرة
يا اهلا بتايوان والتايوانيين
اكتب ياتاريخ --سجل يازمان
اتحاد مدونى افريقيا وجنوب شرق اسيا
انا سعيدة جدا بزيارتك ومش قادرة اقولك غير الكلمة الانجليزى اللى انا فاكراها من اعدادى welcome
السلام عليكم
الشغل للرجاااااااالة فقط
ليه عشان بهدلة ووجع قلب وطلعان عيونهم
أما الانسات والسيدات فياريت يريحوا نفسهم من الشغل
ودا لمصلحتهم والله
دي وجهة نظري
طبعا متخلفة ومش متحضرة خالص
بس عادي أنا منوفي يعني من نبت الارض الخضرا
تقبلي مروري
مصعب صلاح
لا يافندم وجهة مظر محترمة جدا وهى الاساس والصح بس هو تعود واختلاف شخصيات يعنى انا مثلا رغم شكوتى المريرة من متاعب الشغل لكن مقدرش اقعد فى البيت
اهلا بيك دايما
والله بجد انا زعلانة منك بقى تبقى مخنوقة وزعلانة وماتكلميش معايا اينعم كنت اخنقك اكتر بس خنقة الحبيب زى..... ولا ايه؟؟؟؟وبعدين انا بتحضر ف الاجازة عشان نسافر سواتيكا ف البلد نقضى اسبوع لذيذ تدوقى فيه الغتاتة اللى على اصولها وبعدين المفاجاة الكبرى ان ابو الرخامة هيكون معانا يعنى انتى هتتظبتى على الاخر بس المهم دلوقتى وبالامر ان كل اللى على المدونة بتوعك وانتى اولهم تدعولى يحسن انا عايشة ف الفيزياء اخر حاجة
اقولك حاجة يا ابلة رشا احسن حاجة تسكى الناس بانك تجيبى ليهم بتزا من المحل وخلاص وهم ولا هايعصبوك ولا هاينرفزوك هههه حبيبك ابو الرخامة
إرسال تعليق