سيادة الرئيس شكرا
أنا متنازلة عن الصدقة اللى الحكومة الموقرة تفضلت بيها
وقررت اتبرع بيها
لحل الازمة الاقتصادية العالمية
وسد العجز فى الدين الداخلى
وتوفير فرص عمل جديدة
ومكافحة انفلونزا الخنازير والطيور وما قد يستجد
ومحاربة القراصنة فى المحيط الهندى اللى كانوا السبب فى انخفاض ايرادات قناة السويس
سيادة الرئيس شكرا
على المقلب الكبير اوى اللى خدناه من سيادتك
بس الحقيقة احنا نستاهل اكتر من كده
لانكم من فترة طويلة اوى بتلعبوا معانا على المكشوف واحنا مصدرين وش الغباوة ومش عايزين نفهم
تعليم وفشل الحمد لله وربنا ما يكلل جهودكم بالنجاح لانى واثقة ان الليل ليه اخر
اقتصاد انا معرفش فى عهدكم ايه هو مفهوم الاقتصاد
سياسة خارجية وبقينا كلنا موافى بنسهل مصالح اسرائيل
سياسة داخلية --------------
عدم انتماء وفقر وفساد وبلطجة وشغل جلا جلا لما طلعتوا العفاريت على جتتنا
لكن توصل ياظلمة تبقى العلاوة كده
مستكترين فينا بلدنا
هى كانت فلوس او بلد ابوكم
انا كل يوم والتانى بحس انى ظلمت الراجل الطيب
الخديو توفيق
لما قال لقد ورثت هذه الارض عن ابائى واجدادى
ماهو الراجل ماغلطش اهوه
سيادة الرئيس
انت وكل اعضاء حكوماتك الموقرة من اكتوبر 81 للنهارده
انا مش مسامحاكم
وميعادنا يوم القيامة يحكم بينا العدل
ولا يمكن -----
ربنا يسهل ونشوف ذنبنا خلصان فى الدنيا
الباشا الكبير اوى أحمد عز
والنبى ياشيخ تتله وتسكت
علشان انا مخنوقة منك ومن اشباهك
صعبانة عليك اوى الاجور بتاخد كام من الميزانية
بلاش يا باشا
مش لازم اجور
هى الناس دى يخدوا مرتب يعيشهم عيشة كريمة ليه ؟
خدنا عندك نشتغل بالسخرة فى مصانعك
انا مش بهرج
بس حقيقى سياسات غبية رجعتنا قرون لورا
لا وريسنا ملاح ومعدينا
بيغنى علينا فى عيد العمال وهيقاتل مع الحكومة علشان العلاوة
اللى جه على بالى الهتيفة بتوع عيد العمال
الهى ربنا مايحرمكمش من الهبل
انتهزتوها فرصة وقلتم نصر الله متخلف
مبروك عليكم
حالكم وغبائكم ونفاقكم
وحسبى الله ونعم الوكيل
13 التعليقات:
اها شكرا جدا يعنى
يعنى الراجل برضه تعبان معانا يا حبيبتى لازم برضه نراعى ده
اه يا مرارتى بصى انا مبقتش استنى حاجه بتعامل معاهم على انهم سراب وهم مش موجودين ناس بخلقهم فى دماغى علشان اضايق نفسى بيهم كل فتره انا قررت اعيش من غير الحكومه
ابى هانم بتنجانى عندنا
يامرحبا يامرحبا
ياريتنى شكرت الريس من زمان
عارفة كلامك مظبوط انا بعمل كده دلوقت مع البنى ادمين لما حد يضايقنى واكون مضطرة اشوفه اقول لنفسى انا مش شايفاه
ماعداش من ادامى
ده هوا
الظاهر الايام الجاية الحكاية هتقلب بتهييس فعلا واشغل غدة التطنيش مع الحكومة
بس هى والله اللى بتضايقنى
انا مبروحش عندها ولا حتى برن عليها
ههههههههههههه هى هيست من بدرى يا حبيبتى
يااااااااااه انت مشحونه ع الاخر وبعدين مش احنا متفقين انها مرارة واحده اللي عندك محدش يستاهل الصبر يابنتي ...... اصبر على جارك السو يايرحل يا.... انت عارفه الباقي بس انت ماقلتيش اللجنه عملت معاكم ايه وشدي حيلك
على حسب ما قريت فى اليوم السابع ان العلاوة 5 %
هشتكنا وبشتكنا ياريس ده انت رئيس حلو وكويس
يراه البعض بشر وانا اراه قدر
لقد خلقنا الله احرار ..
إنا لله وانا اليه راجعون
ابى
نورتينى يافندم مع ان الحكومة دى جابت اخرنا فعلا
ايمان
اه مخنوقه يااختى
ضحكوا علينا فى العلاوة
كل شوية احلامنا تتواضع اكتر وهما مفيش فايدة
well
عظم الله اجرك
ليه الطمع ده بس 5% حلو قوي
لو فرضنا واحد مرتبه 500 جم يبقى علاوته 25 جم ... وحشين .... دول يجيبوا 100 طعميايه وشوفي الطعميايه تكفي الواحد أد إيه :)
والله انا لو مكانه مديش حد حاجه ... ناس مغيبة ومعندهاش استعداد تقول كلمة آي .... كويس انهم سايبننا نتنفس ..:)
هيه العلاوة طلعت في البخ؟
ربنا يعوض عليكم
ده حضرتك شايلة كثير أوي
ربنا يعينكم
هي العلاوة طلعت كام ؟
أنا بعد ما إتهريت سنتين في دراسة الدبلوما
دبلوم الدراسات العليا
و كنت بأرجع من الشغل و طحنة الموقع في المحمودية أسافر جري أحضر المحاضرات بالليل في هندسة إسكندرية و أروح دمنهور آخر الليل
و بعد فحت سنتين أخدت علاوة دبلوما 7 %
عملت لها 25 جنيه بحالهم
:)
هي دي الحكومة و هو ده الميري و هي دي فلوسه
استاذ تامر
كلامك مظبوط كفايه انهم سايبنا نتنفس
بس حقيقى مستفزين
هما مش حاسين من كتر عشرتنا السودة معاهم انهم مكشوفين
يعنى لو عشنا للسنة الجاية اكيد مفيش علاوة خالص
أنا حاسة زى ما نوارة نجم قالت اننا هنشوف ايام سودة بسبب زيارة اوباما
مادام أبانا الذى فى البيت الابيض رضى عليهم يبقى احنا ضعنا
د/ياسر
اه والله شايله فى قلبى اصل معاملتهم لينا بايخة اوى
والبنى ادم المستفز غالى ده
بيحسسنى انه بيدينا من بيت ابوه
وبعدين أنا موظفة حكومة يافندم
يعنى ماليش نفس افرح ولو لمدة خمس دقائق بس
مهندس مصرى
أنا خدت علاوة الدبلومة الخاصة وكنت فرحانة اوى تمهيدى ماجستير --محدش ادى
اربعة جنيه سيادتك
واتأخروا سنة كاملة على ما ظبطوا حساباتهم وخدت السنة بأثر رجعى
كان مبلغ ايه ...ثروة
ما هو أنا علاوتي إتأخرت 7 شهور و أخدتهم بأثر رجعي برضه
:)
إرسال تعليق