أنا بلاغيك فى السليم

طالبة من الله ولا يكتر على الله يلهمنى الصبر والصحة والبال الطويل لغاية يوم الخميس

سمعت حد بيسألنى اشمعنى الخميس

لانه نهاية امتحان الاعدادية الدور التانى

وانا مع كل السنين اللى عشتها بفضل الله فى التربية والتعليم

دى اول مرة اراقب على بنين فى الدور التانى

وما ادراكم ما البنين فى الدور التانى

معنى انهم دور تانى من الاول بعد كم الرفع الرهيب اللى بيحصل انهم فاشلين بامتياز

الاجمل انى فى ال3ايام اللى فاتت لاحظت تطور كبير فى سيكولوجية الغشاشيين

بترحم انا على طلبة زمان اللى كنت بقف عنيا فى وسط راسى طول اللجنة

علشان مااتخمش اوى ومايعرفوش يغشوا

والولد كان يتنرفز اوى ويقول انا مش بغش وهو كداب ونصاب دولى

الاسبوع ده الولاد حقيقى ماكانوش بيغشوا

بس ووالله ده حصل

بيمثل انه بيغش وانه معاه برشام علشان يغيظنى بس

الولد دلوقت داخل اللجنة لهدف واحد بس انى اترجاه انه يغش

وبما ان العرق الصعيدى بيلعب فى دماغى مع انى مش صعيدية

فاكيد مش بيعرف يغش

بس بعد ايه

بحس بعد الساعتين مدة اللجنة باجهاد ذهنى كبير

اكنى بحارب

وياسلام لو المراقب اللى معايا زى العادة مكبر دماغه او نايم فى اللجنة او ركبه بتخبط على الجيران

ويقولى انت مش عارفة دول ممكن يعملوا ايه؟

يبهدلوكى

ممكن يسرقوكى

ممكن يقولوا كلمة تجرحك

اشغل انا غدة الغباوة واقوله ابدا

الله خير حافظا واظبط اللجنة

اول يوم المرة دى كان امتحان عربى

اللجنة فيها 5 استحالة حد منهم ينجح

مفيش طالب كتب حاجة اصلا

وطبعا الدور البايخ اللى لازم اقوم بيه

انى احثهم بكل الطرق يكتبوا حتى الاسئلة فى ورق الاجابة

ولما اقول وانا مالى عنهم ما كتبوا

اعرف ان التربية والتعليم بتعمل تحقيق وخصم لو ورقة الاجابة فاضية

مش عارفة انا مش لاقية وزارة بايعة موظفينها زينا

مفيش اى نوع من انواع الحماية

تانى يوم

علوم

اللجنة فيها 15 السيطرة عليهم كانت اصعب

دايما اللجنة فيها ولد زعيم وفيها المساعد بتاعه

والباقى مشجعين حسب شخصية المراقب

الزعيم المرة دى عيل رخم حاطط غويشة فى ايديه

رحت اتفرج عليها

لقيتها شوكة

اه والله شوكة

والولد كلبوظة كده وتانيها على اد ايده

خدتها واديتها لمراقب الدور

الولد مابطلش زن

عارفين محمد هنيدى لما كان بيقول باشا ياباشا

هو ده بالظبط

ساعتين

ابلة ياابلة

جربت كل الطرق

الذوق

والتهديد

والرخامة

والتطنيش

والضرب

والتهديد بمحضر غش

والجديد التهديد بمحضر شغب

ونزلت ولد فعلا يتعمله محضر غش صورى كده علشان يتأدبوا

فين على ماربنا كرمنى واللجنة خلصت الحمد لله من غير ماحد يغش

الملاحظة اللى كانت معايا فى اللجنة كانت ست جدعة بجد

علشان كده عدت الحكاية

اجمل حاجة حصلت ان ادارية فى اللجنة فى عز القرف اللى انا فيه ده الاخبار وصلت اننا شدينا اللجنة

سابت مكانها وجت تقولى اديهم سؤالين بس دول غلابة علشان ينجحوا

طبعا رفضت

قالت لى ليه هما ضايقوكى فى حاجة

اخليهم يعتذروا

صعبت عليا نفسى

وقلت لها انا بعمل شغلى

انا جايبنى هنا وراكبة تاكسى كل يوم ب4 جنيه والاعدادية كلها بتاع اقل من 60 جنيه علشان اخليهم مايغشوش

دى وظيفتى

خلصت لجنة العلوم الحمد لله

نزلت تحت

استلمتنى نصايح من عينة علشان خاطراهاليهم غلابة

كنت متنرفزة جدا شغلت غدةا لغباوة برده

وقلت لها

انا بعمل شغلى

اهاليهم بقى يعملوا شغلهم ويربوا عيالهم

لان ربنا هيحاسب كل واحد فينا لوحده

واحنا بنتكلم كانوا الولاد ماشيين فى الحوش بالسجاير ادامنا كلنا مفيش حد فتح بقه

دى فسحة لا ولا الشتايم بتكسف منها والله

اه افتكرت حاجة

مرة فى تصحيح الاعدادية كان فى ورقة فاشلة جدا

ولاحظت ان فى ييجى نص صفحة كده متشخبط على الاجابة

عدوة نفسى انا

الفضول خلانى اشوف الولد كان كاتب ايه وشطبه

لقيت كلام لايتشاف ولا يتقال ولا يتسمع

تنحت وبرقت واحمريت واسوديت وزمايلى سألونى مالك

قلت مفيش حاجة

زمايلى البنات بعد ما خلصنا سألونى شكلك اتغير ليه

قلتلهم الولد كاتب كلام فى حق الملاحظة اللى كانت بتراقب عليه يعاقب عليه القانون

قالوللى طيب ما قلتيش ليه

كان ردى

انى مقدرتش اقول لان كل واحد هيمسك الورقة وهيحاول يقرا الكلام زى ماانا عملت

وانا مش قادرة اتخبل مجرد تخيل ان زمايلى يعرفوا ان عينى وقعت على كلام بالشكل ده

المهم

سمعت من زمايلى ان فى عندنا لجنة منازل فى المدرسة

وان مدرسين عتاولة كانوا بيقسموا بالله ليهم انهم مش لاقيين مدرس علوم يغششهم

لان طلبة المنازل فتحوا الكتب والمذكرات وماعرفوش يغشوا ومحتاجين مدرس

والباشا الملاحظ بيقسم بالله علشان مايغضبوش عليه انه مش لاقى

المهم انى رحت اللجنة النهارده لقيتنى فى لجنة المنازل

قلت لهم معلش بدلولى اللجنة

الادارية بتاعة امبارح معاها اللجان

قلت لها انت عارفة انا مش هاغششهم وهتحصل مصيبة النهارده

الاجراء اللى بيتاخد فى اوقات زى دى

ان راجل عتويل كده هو اللى يروح اللجنة دى وانا اروح لجنة تانية

الادارية عملت موقف فطسنى من الضحك

اصرت انى ارتاح واقعد احتياطى وهى عندها عجز فى الملاحظين

الناس كان مستغربة جدا

لكن انا قلت لها انت بتدورى على مصلحة العيال مش بتجاملينى انا

انت بتعملى ثواب فيهم وبتنقذيهم منى

لسه ماحكيتش على لجنة الرسم

لا انتم زهقتوا من الرغى بتاعى

اكمل بعدين

اخر الاسبوع

اذا كان فى العمر بقية

لا لازم اقولكم دى

الولد النهارده فى الرسم عمل لى فيلم رعب

وان عمر مامدرس اتجرأ يزعقله

وان الكلاب البوليسية لازم تملى المدرسة اخر يوم فى الامتحانات

وان انا احسن لى اغيب فى اليوم ده

وانا من كتره عاملة نفسى مش سامعة

لغاية ما قالى

انا بلاغيك فى السليم

رحت ضربته على كتفه

حسيت بحرقان فظيع فى صوابعى وبعدين سكت

ومن ساعتها وانا صباعى فى لون ازرق عمال يزيد

هى الضربة ماكانتش جامدة

ومش حاسة بالم دلوقت بس اللون الازرق المتزايد ده مضايقنى

مفيش دكتور يقولى ايه ده

وينوبه فى ثواب