أنا عارفة اننا فى عيد
وان الناس نفسها تنسى همومها شوية
لكن أنا شفت كام خبر
مكنتش أقدر مااتكلمش عنهم
أولا
إستقالة المستشار الخضيرى
أنا سعيدة جدا وحزينة جدا فى نفس الوقت
سعيدة انى اديت ثقتى لبنى ادم حسيت انه يستاهلها
سعيدة انى على غير العادة مش اتخميت فى حد
أنا من كام سنة فى ليلة كنت فيها مكتئبة جدا
وعمالة أقلب فى القنوات من غير هدف
وقفت الريموت على قناة عين
كان فيها القضاة ومن ضمنهم الخضيرى
فى بداية أزمتهم مع الحكومة
طبعا كلامهم نسانى أنا كنت زعلانة من ايه
وحسسنى ان الدنيا لسه فيها خيرلما مصر ربنا كرمها برجالة زى دول
وفضلت متابعة صراعاتهم مع الحكومة
والاعتصام الرائع اللى عملوه
لغاية ما الحكومة بطرقها المعهودة تدخلت واستغلت الاعلام
وطلع اللى ما يعرفوش ربنا يطعنوا فى الخضيرى وزملائه
ووصل الامر بالمستشار البسطويسى فى العناية المركزة
والاحوال بدأت تتدهور من بعدها
وانا رجعت نفسى اتسدت تانى
لغاية ماالمستشار إستقال
حسيت لما قرأت الخبر ان الخير رجع لمصر تانى
وحتى لو القضاة خيبوا التوقعات وماقدموش إستقالات بالجملة
زى ما كتير توقعوا
تضامنا مع موقف الخضيرى الرافض لتدخل السلطة التنفيذية فى كل شئون القضاء
وحتى لو الحكومة تجاهلت الاستقالة وضاع مجهود المستشار طول حياته
انا برده سعيده
ماهو مش واحد لوحده هيغيرأحوال بلد باكملها
بريطانيا ماخرجتش من مصر بثورة يوليو
بريطانيا خرجت بالأثر اللى تركه عرابى
وبالمنظمات السرية اللى قامت فى أول سنين الاحتلال
وباستقالة محمد شريف 1884
وبمصطفى كامل ومحمد فريد وزغلول وثورة 1919
وبالنحاس لما الغى معاهدة 1936
وبمئات التضحيات خلال 73 سنة
ايه درس التاريخ ده؟
مش عارفة
بس حاسة اننا ماشيين صح
وان النفق المظلم ظهر فى اخره نور
وحاسة بروعة الاية الكريمة
ويمكرون ويمكر الله والله خير الماكرين
وبقى عندى أمل كبير ان جمال مبارك مايكونش رئيسنا
ونفسى الخضيرى يرشح نفسه لرئاسة الجمهورية
وبعدين نعمل دستور جديدونقلص صلاحيات رئيس الجمهورية
ويكون عندنا الامكانية اننا نحاسب نحاسب بيها الرئيس وأى مسئول
أنا بحلم مش كده؟
مش مشكلة 00 00
أنا بس من موقعى هذا أمام الكيبورد
أحب أوجه كلمتين للمستشار
سعادة المستشار الخضيرى
أسعد الله أيامك كما أسعدتنى
طيب أنا حزينة ليه؟
لا خلاص أنا مش حزينة
أنا بس كنت خايفة المستشار يحس بالندم
والناس تفضل تزن فى دماغه انه ضيع حياته وخبرته وشغله هدر
لكن قلت لنفسى النفوس العظيمة دى مش مهزوزة
وان شخصية بخبرة وحنكة وحكمة الخضيرى
أكيد كان فى اعتباره كل الاستفزازات اللى هتعملها معاه الحكومة
وطمنى كمان كلام المستشارة اللى ماعنديش وصف ليها
نهى الزينى
لما قالت انها كانت متوقعة الاستقالة دى من سنة تقريبا
لما تدخلات السلطة التنفيذية بدأت تبقى مهينة لاستقلال القضاء
ثانيا
النهارده 21-9
ذكرى وفاة عرابى
وجورنال المصرى اليوم استفزنى جدا بكلامه عن عرابى النهارده
وبما إنى مشغولة جدا جدا
واختلست الوقت اللى هاكتب فيه الكلام ده
فانا إبراء لذمتى
بطلب منكم تفكرونى بعد فترة يمكن توصل لشهر
إنى أتكلم عن ظروف عودة عرابى من المنفى ووفاته
لان الراجل ده أنا بحس انه اتظلم جدا
وليه فى ذمتنا تقدير كبير هو يستحقه
ثالثا
أنا عندى إمتحانات بعد العيد مباشرة
فأنا بطلب منكم
إلهى ربنا يعمر بيتكم
تدعولى بشدة وبقوة وباخلاص
لان حتى مامتى حبيبتى لما قلتلها ادع لى قالت ازاى وانت مش بتذاكرى
طيب ادينى قاعدة فى العيد محبوسة اذاكر
ماتنسونيش الله يكرمكم
يقعد لكم فى عيالكم يارب
56 التعليقات:
هههههههههههههههه
تعملي تحديث من تحرير البوستات القديمة
ربنا يوفقك في إمتحانات الجودة و الكادر
مهندس مصرى
لا لا لا
كده ماينفعش
انا نجحت فى الكادر من زمان
من اول دور
اغسطس 2008
يانهار ابيض
الا امتحان الكادر
اما الجوده
فيؤسفنى ابلغ سيادتك
اننا رسبنا فيها
بس عندنا دور تانى فى 26-4
ادع لنا
انا عندى امتحان فى معهد اعداد دعاة
بس والله ماعنديش مواد ولا حاجة
انا مكنتش فاضية فاأجلت مواد للدور التانى
وشكلى بقعدتى كده ادام الكمبيوتر هفشل بجدارة
بالمناسبة المستشار هشام البسطويسى
كان حيلفقوله قضية اداب
!!!!
ربنا يوفقك يارب
بخصوص المستشار الخضيرى
هو اه شخصية كويسة
و محترمة و دفع ثمن مواقفه
بس الصراحة لا ارشحه للرئاسة
اصل الراجل سنه كبير برده
زائد انى ارفض اى حد لعب سياسة
انه يترشح
انا عايز ناس نظيفة
متلوثتش من السياسة
-----
و ربنا يوفقك يارب
فى الإمتحانات
-------
هو كلام المصرى اليوم عن عرابى
كان وحش
؟!
إن شاء الله تعب كل الشرفاء مش هيضيع هدر
وإن شاء الله قريب هنشوف نهاية النفق المظلم ده ,, ونشوف نور الشمس بقي
كل سنة وحضرتك طيبة
وربنا يوفقك في امتحاناتك
بدراوى
اللهم امين
كلامك جميل جدا على فكرة
اولا
الظاهر ان مبارك عقدنا فعلا
اه الخضيرى سنه كبير
لكن احنا لما نغير الدستور
الريس مش هيقعد مدة طويلة
ومش هتكون فى سلطات كتير فى ايديه
وهيتحاسب
فالسن وقتها مش هيفرق كتير
ثانيا
موضوع التلوث برده عندك حق
لكن انا شايفة ان الخضيرى لم يلوث
هو بحكم شغله ماانضمش لاى حزب او حركة سياسية
هو كان بيطالب بحقه
كلام المصرى اليوم
مأخوذ من جريدة المقطم
الموالية للاحتلال
اللى كان عنده منهجية فى تلويث صورة عرابى
وللاسف نجح فى كده
انا اول مرة اسمع موضوع البسطويسى ده
حسبى الله ونعم الوكيل
شرفتنى
دكتور ياسر
اللهم امين
أنا حاسة بتفاؤل شديد
أصل الناس دى كانوا عندهم حرص شديد
يظهروا لنا
ان البلد مافيهاش غيرهم
ارحمنا منهم يارب
تحياتى لحضرتك
ده لينك الحوار
اللى اجرته المصرى اليوم مع المستشار هشام البسطويسى
المستشار هـشام البسطويسى يخرج عن صمته بعد عامين من إعارته للكويت (١-٢): تركت مصر لشعورى بتقييد حركتى وكلمتى وتعرضت لمحاولة تلفيق قضية جنسية
http://www.almasry-alyoum.com/article2.aspx?ArticleID=222808
المستشار هشام البسطويسى يستكمل حواره الساخن: التنظيم السرى لايزال موجودا بالقضاء والدولة تمارس عملية إفساد للقضاة(٢-٢)
http://www.almasry-alyoum.com/article2.aspx?ArticleID=222889
سيدتى ..
الاحتلال الانجليزى انتهى رسميا بااتفاقية الجلاء1954 وخرج آخر جندى فى 18 يونيو1956 ولكنهم بعدتأمميم القناه
فى 26 يوليو1956 عادوا فى 29 اكتوبر 1956 وخرجوا فى 23 ديسمبر 1956 ..
آسف ..لكنها تواريخ لاتنسى..
بدراوى
جزاك الله خيرا على اللينك
سيدى العجوز والبحر
حضرتك عندك حق طبعا
وانا بصلح الغلطة امبارح
عمالة ابص لتاريخ 26-يوليو ومستغرباه
انا حافظاها
هى طبعا تواريخ لاتنسى
بس انا ماكنتش مركزة معلش
بس انا حسبتها على تاريخ الجلاء اللى هو18 يونيو
26 يوليو تأميم القناة
شكرا جزيلا لحضرتك على التوضيح
انا اسفة ياجماعة للمرة التانية
انا زعلانة جدا من نفسى
غلطت امبارح غلطة
حاولت اصلحها
الحمدلله جبت الغلطة التانية
اولا الاحتلال البريطانى حسب مابندرسه فى المدارس 74 سنة
الكلام ده لو حسبناه من تاريخ دخول الانجليز القاهرة
14 سبتمبر 1882
لغاية
18 يونيو 1956
تاريخ خروج اخر جندى بريطانى
لكن الاصح طبعا
انه يتحسب لغاية 19 اكتوبر 1954
اتفاقية الجلاء مع بريطانيا
التى نصت على خروج القوات الانجليزية فى مدة أقصاها 20 شهرا
انا اسفة تانى وتالت وعاشر
هى غلطة صعبة بس نتيجة عدم تركيز
يبقى تسيبك من السياسه والدكتور وكل حاجه وتروحي تزاكري فورا
لا صوت يعلو على صوت الامتحان
لورنس العرب
جزاك الله خيرا على النصيحة
علم يافندم وجارى التنفيذ
ابله
كل عام وانتى حره عاشقه للحريه
كل عام وانتى ومدونتك منورين
لا امل في الاصلاح في مصر في ظل النظام الحالي .. مات الكلام
وبعدين سيبك من الكلام ده وروحى امسكيلك كتاب زاكرى فيه .....hahaha
..ربنا يوفقك فى الامتحان وفى الحياة الدنيا ويرزقك الجنة فى الاخرة..يارب
انا زعلى ان الناس الكويسه بتمشى والوحش اللى بتفضل دى بقت منظومه فساد فى البلد كلها والوحش اللى هيستمر
ربنا معاكى يا قمر
اسامة
شكرا جزيلا على الكلام الجميل
الاستاذ عبد الوهاب الشهير بويل
لك يوم ياباشا
جزاك الله خيرا على الدعاء
اللهم امين
ابى هانم بتنجانى
نورتينى ياعسولة
فعلا عندك حق
هى بقت منظومة
الفاشلين دايما بيتصعدوا
ربنا يستر علينا
لايمكن ان يضيع محهود شخص مناضل لعدم رؤيته ثمار تضحياته فكما قلت التغيير هو ثمرة تراكمية لمجموعة تضحيات
فعلاً عرابي لم يأخذ حقه وتم تزوير تاريخه وتوجهاته ليظهر بصورة أقل من حجمه وبعيداً عن توجهه الحقيقي
وفقكم الله في كل أمرك وأدام فرحكم :)
تحياتي :)
الخير فىّ وفى أمتى
الى يوم الدين
ورسولنا لا ينطق عن
الهوى ابــداً ابــداً
ربنا ينجحك وينحج كل من
قاصد خدمة دينه ووطنه
ونفسه كمان علشان ما
أبقى خيالية!
بعد اذنك ياميس:)
اريد أن أشكر
بدراوى لوضعه
رابط الحديث
مع
المستشار هشام
الـــبسطويسى
حبيت اشكره عنده
وجدته جاعل المدونة
(للقراء المدعويين )فقط
استاذ تامر على
اللهم امين
جزاك الله خيرا على الدعاء
وعلى المتابعة
norahaty
انا بفرح جدا على فكرة بالدكاترة الادباء
جزاك الله خيرا على مشاعرك الرقيقة
وبالنسبة لاستاذ بدراوى
هو قافل المدونة تماما
مش عامل دعوات لحد
انا عرفت الكلام ده
من مدونة سبهلله
من تعليق ليه هناك
ولك وله جزيل الشكر على المتابعة والاهتمام
كل سنة وانتى طيبة
ووفقك الله
سبهلله
وانت طيبة
اللهم امين
كل عام وانتم بخير :)
اقصوصه
كل سنة وانت طيبة وبالف خير
اشاطرك اسمي المشاعر ايتها المصرية الرائعة الوطنية كيف لا وانتي مربية اجيال فاضلة كما انتي..
كم كنت حزينا عندم ايت مقابلة الاستاذ الخضيري مع احمد منصور في قناة الجزيرة:
1-انا ليس مصري وان كانت تجري في دمي
كما المصرين لانني في بلدي درسة مقررات جامعة القاهرة في كلية الحقوق ومقررات دول عربية اخري كانت علي سبيل الاستئناس لان الاساس مصر مش في القانون في كل حاجة..
ومن حسن حظ دفعتي كان المحاضرين كلهم معظمهم حاصلين علي دراساتهم العليا من مصر..
فكانوا يدرسون مفخرة التدريس في الحيادية والنزاهة والفقهاء والقضاة...الخ في مصر
واصبحت تواقا وحلمي حتى اليوم ان اذهب الي مصر واجلس في مقاعد كليات الحقوق هناك واجلس في محاكمها لتلقي العلم لكي اخدم بلدي بالرغم اننى محامي معروف في بلدي وجهدي منحي قدرا
اشكرالله علية
كانت المفاجاة عندما سمعت ان محاكم مصر تخضع لهيمنة السلطة التنفذية وليس قانون السلطة القضائية والخبر من اعلي منصب قضائي نائب ر النقض
لا تتصوري كما زهلت وزعلت وكانني فقدت عزيزا
2-حينما سال الاعلامي احمد منصور الاستاذ الخضري عن راتبة بعد43سنة خدمة
في ساحات العدالة
المصيبة(1800)جنية راتب اعلي منصب في مصر..
واللة يحصل عليها اتعس محامي في العالم العربي في صياغة عقد او تقديم عريضة او طلب بسيط
مايزعجني حقا الرقصة تحظي بمكانة وحياة افضل من اكبر خدم العدالة هذة هي العدالة من قال هذا ؟ هذا ظلم يقع بالدرجة الاولي علي من ينصف الناس ويرفع الظلم ويحقق قسطاس العدال
مصر العظيمة تجعل من الهاربين من بلدناهم ومنبذين فيها نجوم في الفن
وتساهم في تمليكهم ملاين الدولارات
وتتجاهل اعلام القانون والنظام والقضاء في اى شرع هذا يا ساسة مصر؟؟
لماذا تريدون ان تغتالوا الامل النامي في احشائنا نحو قبلة الحضارة مصر؟
انتم ياساسة مصر حينما تهملون الاعلام القضائية وتسيئون لهم تعتدون علي كل رجال القانون في العالم العربي والاسلامي
انتم الامل والقدوة والقبلة لنا
نحن نتعلم منكم ونحترف من فقهكم
ياساسة مصر لا تقتلوا الامل فينا
الاولى بالرعايا خدم العدالة قبل الكرة والطبل والفن
بدونها لن تتقدم مصر
وشكرا لاعظم مصرية عرابية وطنية سمحت لي ان امر بين سطور مدونتها الرائعة
انا حلم
حلم
انا بجد مش عارفة اقول ايه
اولا
شكرا جزيلا على الاطراء الشخصى
ثانيا
مش عارفة هو ينفع اشكرك انك بتحب مصر
هو فى عربى بيحب مصر دلوقت ؟
والله اديتنى امل
انت فعلا حلم يارب يتحقق
ثالثا
كلامك عن المستشار والسلطة القضائية والحكومات والامل ومكانة مصر اللى بتضيع
انا بجد معنديش رد عليه
غير انك اديتنى امل كبير ياحلم ان حلمنا يتحقق
سعيدة جدا بزيارتك وتعليقك
طب وبالنوسبة ليا انا يا ابلة طب انا ماعنديش ولاد هيعود لى فى مين هه
وعلى العموم مش خسارة فيكى يا قمر
بس على فكرة انا دعتلك من قبل ما اجاى هنا ماشى يعنى ليا حلاوة النجاح
تفتكرى اطلب ايه يا تيمو
لاف توب على راى محمدينو
ولا ايه؟؟؟؟
بجد ربنا يقدرك وتحفظى اللى عليكى وتجيبى احلى تقدير وتفرحى به
وماتنسيش الحيلاوة ماشى
اما بالنسبة للبوست
اينعم انتى عارفانى مش من هواة الاخبار اشاسا بس كلامك عن المستشار عجبنى اول مرة اعرف ان فى حد محترم فى بلدنا بياخد منصب كبير زى ده بس يافرحة ماتمت
يلا ان شاء الله هاخلص بيطرى
وارشح نفسى لرئاسة الجمهورية ايه رايك؟؟؟
وانتى هتكونى مشرفة على برنامجى الانتخابى
كده تمام عدى الجمايل بس ماشى
سلام يا جميل
لك منى ارقى واخلص الدعوات من صميم قلبى
بيطرية
ههههههههههه
حلوة حكاية لاف توب دى
محمدينو ده مشكلة
بطلوا حقد 0000ايه ده
كله الا اللاب توب بتاعى
ده جاى بالغالى
وفى مقام ابنى حبيبى
لا بجد اطلبى ياقمر اللى انت عايزاه
وانت عارفة انا كريمة اد ايه
انا تيمو
مش كريمة
اما بالنسبة للمنصب
فأى حاجة تيجى منك تجنن ياقمر ونحن فى الانتظار
بس ربنا يستر علينا
انا كنت جاية اسلم
حتى لايعود الصمت بيننا
فوجد
فوجدت بوست المستشار الخضيرى
وكنت اعرف الخبر مسبقا
وزعلت للخبر ولكن احترمت الخطوة
ومش عارفين لسة احنا رايحين على فين
ربنا يرينا يوم فى الظلمة
ربنا يوفقك فى الامتحان
ابقى طمنينا
تحياتى
أم مالك
أهلا وسهلا بك نورتينى
تصدقى بالله
ده كان نفس شعورى
لكن بالامس
حضرتك سبقتينى
انا سعيدة جدا بزيارتك
السلام عليكم ورحمة الله
تحياتى
ربنا ينجحك ويوفقك ويكتبلك الخير دايما يارب
وعقبالى انا كمان (داخل على دبلومه وكادر وايام مايعلم بها الاربنا)
هههههههههههههه
بالنسبه لموضوع المستشار الخضيرى بلاش اتكلم علشان مااجيبلكيش احباط
(مش عشان الراجل وحش لاسمح الله انما عشان الظروف المحيطه بيه)
ســــــــــــــلام
المعتصم
زميل الهم التدريسى
اهلا بحضرتك
اللهم امين
ربنا يوفقك فى الكادر والدبلومة وكل حياتك
ارجوك
انا كنت بكتب البوست انا متفائلة
وعايزة اخزن التفاءل ده للايام الجاية
شكرا لعدم احباطك لى
ربنا يوفقك ان شاء الله
تحياتي
استاذ طارق
اهلا وسهلا بحضرتك
اللهم امين
فى نفس الوقت اللى حضرتك تقريبا كنت بتكتب فى تعليقك
انا كنت بفكر اكتب لحضرتك تعليق
لانى شايفة ان حضرتك بتغيب كتير
حمدا لله على السلامة
يا تيمو يامش كريمة
الملوك وصلوا بالسلامة الحمد لله
ونايمين على العرش دلوقتى
بعد ما شهرزاد حكيت ليهم هما الاتنين حكاية كلياتها فى اليوم الاول
طب والله فكرة ممكن ابقى اعمل زى ونيس
واكتب يوميات بيطرية وعائلتها
ههههههههه
اما بقى بالنوسبة للشخص الكريم
اللى ذكرتى اسمه
فانا عن نفسى مش عارفة ماله
كل كلامه دبش يا اختى
وتعليقات غامضة ومش مفهومة مع انها لو حد فهم معناها هتجرح اوى وتوجع كمان فظيعة تعليقات جبارة لا والمهم ان مدونته مفهياش اى حاجة اطلاقا تستدعى المشاهدة كله كلام فاضى
ويجى هو........يلا ربنا يهديه
بصى انا هاقوم بقى عشان بكرة عندى سيكشن وراثة ولسه واخدة المحاضرة النهاردة وانى افهم كلمة ابدااااا
شكلها سنة فل على الاخر
ربناااااااا يستر
اه صحيح اخبار النتيجة بتاعتك ايه هتطلع امتى؟؟؟
انا كمان معاكى هقوله اسعد الله ايامك كما اسعدتنا
و انتى بتحكى رجعتينى لأيام حلوةعشت تفاصيلها تقريبا زيك و إن اختلف المكان و الظروف ..
بس انا كمان زيك كنت مستغربة وقتها من الحاصل
واستوقفنى عنوان فى أحد الجرايد وقتها اظن كان الدستور لما وصفوا الوقفة بتاعت القضاة بعبارة جميلة قوى
( ربيع القضاة فى الإسكندرية )
كنا داخلين على الربيع فعلا و حسيت إن الجملة دى متوافقة مع الحال
و إن الورد بيتفتح و يزهزه على إيدين ناس محترمة زى دول ابوا على انفسهم الذل و المهانة
الراجل دا محترم قوى
و يستحق كل الخير
و خلاص هوه دخل التاريخ المصرى من بوابة الشرف و الإجلال
مش زى الآخرين اللى دخلوه من الباب الخلفى
ربنا يوفقك فى الإمتحانات إن شاء الله
و عودا حميداً يا أستاذة
بيطرية
الف حمد لله على سلامتهم
حاسة بك والله
وعارفة انك هتنامى النهارده براحتك
ومتحسى بالامان بعد شهر من الضنا
ربنا يخليهم ومايحرمكيش منهم ابدا
معلش مش قادرة اكلمك على الياهو
لا سباب كتير
اولا عندى امتحان فقه بكره
هه
فقه
ادع لى الله يكرمك
ثانيا
مورا باشا
هيقضى الليل كله مشاوير وواخد سيادتك اللاب توب بتاعه
خدى بالك من الكلام الجاى ده
والشاحن بتاعى انا
والكمبيوتر الحقير التانى
بدور فيه يااوختشى على البتاعة بتاعة الياهو دى مش لاقياها
تصدقى كده احسن
يمكن اخلى عندى دم واذاكر
الف حمد لله على سلامتهم
وربنا يهدى زوار مدونتك
واسمعى بشدة وبقوة كلام دكتور احمد لاشين
وسلم لى على محمدينو اوى اوى اوى
مش الوراثة دى بتاعة مندل برده
لا ماانا واخدة علمى لغاية تانية ثانوى
الله اكبر انا فظيعة
مش دى بتاعة فار اسود اتجوز فار بنى
ربنا معاك
يانهار ابيض
روح قلب يوسف عندنا
يامرحبا يامرحبا
نورتينى والله
ماشاء الله عليك رقيقة جدا حتى فى كلام السياسة
انا معنديش رد بجد على كلامك
غير انى اقولك انى بقيت من مدمنى مدونتك انا واخواتى وولاد خالاتى حتى زمايلى فى المدرسة
مش بسكت دايما بحكى لهم عنك
عارفة بيطرية ؟
تبقى بنت خالتى
انا حتى كنت لسه عندك حالا
ربنا يريح قلبك
ويرجع لك يوسف
انه ولى ذلك والقادر عليه
ان شاء الله تكوني بخير:)
حبيت بس اسال عليكي واقولك ان ربنا كريم و كل قضائه خير ان شاء الله .. ردا علي استفهام :)
السلام عليكم
ما دام هؤلاء الرجال في مصر فمازال الامل موجود والحمد لله
الله يرحمك يا عرابي وسيبك من المصري اليوم لانه اثبت فشله كجريدة ذات فكر ومفيهوش غير بلال فضل
---
ربنا يوفقك ف امتحاناتك يارب
اليس
معنديش كلام اقوله بصراحة
غير انى احسبك على خير ولا ازكى على الله احدا
وبدع ربنا يجعل صبرك وابتلاءك وذوقك فى ميزان حسناتك
مصعب
حمدا لله على السلامة
انت كنت فين ده كله
خلى بالك من مذاكرتك مقلناش حاجة بس طمنا عليك
شكرا على زيارتك
اجمل رد فعلا
لا تزكي علي الله احدا ابدا مهما شفتي منه
لقد خلق الله بني آدم خطاء و لكل خطأ توبة ومغفرة وعفو باذن الله
اسال الله لنا جميعا العفو والعافية وان يرزقك تمام العافية :)
لسة فى خير فى بعض الشرفاء
تحياتى
اليس
جزاك الله خيرا على النصيحة
ربنا يكرمك
نهر الحب
اهلا بك نورتينى
فعلا كلامك مظبوط
الخير موجود دايما بس صوته مش عالى
استاذتنا
وحشتنا بوستاتك الرائعه
ياريت ماتتخريش علينا
وانا عارف انى فى طوارى فى التعليم عشان الانفلونزا ارجوك ماتتخريش فى بوستاتك الرائعه
اسامة
شكرا جزيلا على مجاملتك الرقيقة
وعلى سؤالك
لكن هانت انا وحشتنى الكتابة
بس عندى امتحان يوم الاحد
ومشغولة جدا فى المدرسةوورايا فيها مليون حاجة
وكمان الجديد
انى عندى انفلونزا
ادع لى
انا دلوقتي بافكرك بوعدك عشان تشرحي ظروف عودة عرابي من المنفي لكن خدي بالك( وعلي راي السادات: كله بالقانون): كله بالمراجع
تقديري وربنا يوفقك في الامتحانات
تايه فى وسط البلد
أهلا وسهلا بك فى اول زيارة
يارب ماتكون الاخيرة
شكرا على التذكرة والدعاء
لكن انا لسه ماخلصتش امتحانات
وكمان الايام الاولى من الدراسة
بتكون صعبة جدا
معلش شوية وقت كمان وافوق لعرابى باشا
تحياتى لحضرتك
إرسال تعليق